2
Akaiki wawu kaya pwan pe akoro ndruwa kultuw ta Kristus
1 Pe tehen torako, wawuppai iyapolo Kristus ara imbusi wawu tora tine pwokeyan, pe ndriyan imbuluhi wawu pe ipwokere wawu. Pe wawu ngara katotohun kiyapolo Mwoiwan Haiyan, pwen Kristus ipwaingani kultuw hiyan pe koyun isikirani wawu. 2 Pe akoro ndruwa lohongai aro, pwen andre akambusi yo kupwesai, pe namiliwa wawu kiro handra ko, pe wawu karayah hamou o kiya mwoiwa wawu, pe lohonga wawu kiro handra ko 3 Pe wawu mbuna akambusi wawu tehe wawu hiyan iya, iya kili hu hayah, pe mbuna akambusi handra melit para akahari ngala wawu kiya aliy, hapeko akaiki wawu kaya pwan, pe akanime hu hayah ara tehe hu hin isata wawu mbukenan. 4 Pe wawu mbuna kanimnim para hiyan ta wawu mbukenan, hapeko kanimnim kiya tesah hiyan ta hamou-hamou ta wawu yi.
5 Pe susuye tawawu kiya kili hamou-hamou tawawu, ara lohonga wawu kiro handra ko tehe ta Kristus Yesu.
6 Pe Kristus ara kultuw tan iya harong o tehe ta Ngindrai, hapeko kinlohonganiy pe kinkekei tehe pwoke masih iro kili yiy iya harong o tehe ta Ngindrai, ara pwi.
7 Hapeko yiy imbusi yiy mbukenan irayah mwaihei o, pe iwiri kultuwayin ndrokonan, tehe ndramat hamou para poya mbulen,
pe iwiri kaipisa ndramat pe irayah tehe ndramat.
8 Pe iya mulan para irayah tehe ndramat,
iyki yiy iya pwan, pe ihilingi nongna Ngindrai para kimat, pe rapaingi yiy iya kei tondrih tehe ndramat hamou para tandroindroi.
9 Pe tehen tora ko, pwen Ngindrai isoli yiy iya kol paingan masih,
pe ngalan iykiy, ara ihohin masih iya hu ngalahu melit masih.
10 Pe iya ngala Yesu opu, hu ndramat masih kene, ara andre katukuruhu, hu melit para kol paingan yang, pe hu melit topo ndrita kol pwan, pe hu melit para pahandra pwan,
11 pe andre hu ndramat masih, ara andre kapohowei tehe Yesu Kristus ara yiy Yapan.
pe andre hu kahari ngala Tamarou Ngindrai.
Melit masih wawu nakambusiy, ara wawu mbuna akawong soyon
12 Pwen tora ko wawu kowase mepo nere imwonen, wawu ngara kahalong nongna Ngindrai—pe konan kuro sura wawu ndre kuro mawen, hapeko iromwonen kunto pwi—wawu koro pahandra nohowai namandran ta Ngindrai para akawiri sopwat hiyan ata wawu. 13 Paratesah, Ngindrai mbukenan, ara ita pombulen kili wawu, pe iyki namiliwan pwokeyan para akambusiy, pe yiy mbukenan ipwokeyani wawu para akoho ndruwa namiliwan hiyan.
14 Pe melit masih wawu kambusiy, ara mbuna akapanguluwaniy ndre akapepet, 15 pwen pe andre akoro mwonen pe akoro howen, pe hamou kinlahiy kipa mwomwan ita kili wawu, ara pwi. Pwen tehe hu noru Ngindrai, tokuya wawu, ara hape mwomwan mbuna kiro aliy mwalinga hu hasap mepo kultuwaye hu kimwonen pwi. Pwen andre wawu kalenganiy mwalinga hu tehe hu piriy huhora yang. 16 Pe akapwahatini wawu kiya nongan para taleh. Pwen kapa akambusiy tehen toro, pwen kiro mwonen lenge Kristus kimui kisa, ara andre kusikiye yo kiya aliy. Paratesah, andre kileu tehe mbulyo masih umbusiy mwalinga wawu, ara kinna mwaihei o pwi. 17 Hapeko konan kapa ndreye kimuw tehe wain hutilingiy tehe yukyuk sih, iya ndrita yukyuk, pwen ara tehe lohongai ndrisiyon tawawu, mepo wawuikiy tehe yukyuk iya kili Ngindrai. Pwen upwes isasura wawu masih. 18 Pwen wawu yi, ara akapwes kisa sura yo.
Timoti hilu Epaprotitus
19 Pe kapa namiliwai pwokeyan ta Yapan Yesu, pwen ulohonganiy tehe andre kindrou pwi ko, andre kupwandrisa Timoti kisa kili wawu, pe andre kiyki pwesai kisa kili yo kapa kuhulong titiye ta wawu. 20 Pe hamou kinto iye ara tehe yiy pwi, mepo andre kipwaingani ndriyan hiyan para pwokere ta wawu kiya sehe melit kapa kirayah. 21 Pe hu ndramat masih ara hu ngara kannimnim kiya namiliwahu mbukenan, pe hukanlohongani hiyan ta Yesu Kristus pwi. 22 Hapeko wawu pahasaniy tehe Timoti ara kinpwaingani yiy mbukenan, paratesah, ipo mbulen sura yo iya mbulya nongan hiyan, tehe mbunah kamai hamou ngara kisopwat taman. 23 Pe tehen torako, ulohonganiy para kindrou pwi ko andre kupwandrisa yiy kisa kili wawu para kisa nime wawu kiya tesah iripo rayah kili yo tapeh. 24 Pe lohongo ipwoke iya kili Yapan tehe kindrou pwi ko andre yo mbukeno kusa kili wawu.
25 Pe ulohonganiy i tehe hiyan para kupwandrisa Epaprotitus kimui kisa kili wawu, yiy mepo nali pe ndramat ngara kipombulen sura yo, pe yiy ndram hamou. Pe yiy i, ara ndramat hamou para sapiya nongan tawawu mepo wawu pwandrisa yiy para kiro sopwat yo kiya tesah undroisiy iya aliy. 26 Pe lohongan ara itti wawu masih pe inamiliy para kinime wawu paiwe yi, pe lohongan ara kinikuw pwi, paratesah, wawu kanhilong yiy tehe imwa. 27 Pe yiy ara imwa ndrokonan, pe pakeh kimat. Hapeko Ngindrai ara koyun isikirani yiy, pe koyu Ngindrai kinsikirani yiy o pwi, hapeko koyun isikirani yo yi, pe andre kisopwat yo pe andre kunkuni nopwaran kiropo kiya manau pwi. 28 Pwen tehen tora ko, ndriyo itine para kupwandrisa yiy kisa, pwen kiro mwonen akanime yiy, ara andre wawu kapwes, pe ndriyo andre kinpworu pwi. 29 Pwen pe akarawulohani yiy kiyapolo pwesai namandran ta Yapan, pe hu ndramat tehe yiy, ara akahaiyani hu. 30 Paratesah, sopwat mepo wawu mbukenan kanlahiy para akasopwat yo kinna aliy pwi, ara iwiri noku pe iyki mwoiwan para kisopwat yo kiya aliy, pe pakeh kimat kiya mbulya Kristus.