1 Wawu nali pe wawu pisu nongno iyahapwen, ara akapwes kiya kili Yapan! Pe kinmbusi ndriyo kiporu para kuratuluwi hu nongan kiya harong o kisa kili wawu paiwe yi, ara pwi. Pe hu nongan ara, ara para kiro penani wawu.

2 Pe wawu koro hinehes kiyata hu ndramat ngara hu kambusi hu kultuw pwassin tehe hu mwiy puyap, mepo hu ngara kasosondrih sangi ndramat. 3 Paratesah, yihu mepo hu kanwiri sosondrih ndrokonan, mepo yowu ngara katotohun kiya kili Ngindrai iyau kili Mwoiwan Haiyan isopwat tou. Pe yo usikiye yo iro kili Kristus Yesu, pe yowu konho rahatini lohonga yowu kinna tahu ndramat sosondrih iya sangi hu, ara pwi. 4 Pe yo mbukeno ara urahatini lohongo, ara ma ndroiyin. Pe kapa hamou kipa yiy ma ndroiyi lohongan, pe kirahatini lohongan i kiya hu melit para nombuwe ndramat, pwen yo, ara lohongo soyon iya. 5 Yo ara sosondrih iya sangi iro mwonen lang mandrolwoh, pe yo ara ndramira Yisrayel hamou, pe uyau ndraye Penyamin, pe yo ara hamou Hipuruw, pe yo ara ndraye Hipuruw imwonen iho ndruwa nongan para pwahanou, pe yo ara hamou Parisiy, 6 pe lohongo ipwoke imwonen para kupwalngani sios; pe iho ndruwa nongan para pwahanou, tesah umbusiy ara kultuw imwonen, pe mwomwan handra kinto aliy pwi.

7 Hapeko hu melit mepo ngara kuwiri hiyan kiyau aliy, ara mahapo unimei tehe iya mwaihei o tunan iya tesah Kristus kinmbusiy kinsa to. 8 Pe tesah i, unimei tehe hiyan kinyau aliy pwi ko, iro mwonen unime pwoke pe usa pahasani Kristus Yesu Yapan to. Pe tunan yiy opu, melit masih ara, ara hu tali yo. Pe unimei tehe melit masih, ara iya mwaihei o isa kili yo, pe andre kuwiri hiyan ara kiyau kili Kristus opu. 9 Pe andre kuppai sura yiy, pe kunto ndruwa Nongan Para Pwahanou pe urayah mbukena kultuw imwonen ara pwi, hapeko uiki lohongai ndrisiyon to iya kili Kristus—pwen uwiri kultuw imwonen mepo iyau kili Ngindrai iyau lohongai ndrisiyon. 10 Pe yo unamiliy para kupahasani Kristus—pe kupahasani pwoke para kimat pe titine tan, pe kususuye sura yiy kiya nondriya hu nopwaran tan mepo ikuniy, pe kurayah tehe yiy, iya kimat tan. 11 Pwen pe tehen aliy o, lohongo ara kiro mwonen lang para kumat pe kusa tine.

12 Pe kunpwai tehe mbulyo masih kinsa hapwen, ara pwi, ndre Ngindrai kinmbusi yo kunsa rayah imwonen, ara pwi, hapeko urupo nohonou para kupwokeyani yo para kuwiri kene, paratesah, Kristus Yesu kinwiri yo, para kurayah atan. 13 Pwen wawu nali pe pisu, mbulyo para kumbusiy, ara kupa kunmbusiy kinsa hapwen, ara pwi. Hapeko melit handra hiyan masih, ara koyu kimayit tesah kinna, pe lohongo kiya tesah itapo isa. 14 Pe upwokeyani yo iya tesah kantakiniman ita para kuwiri kene mepo Ngindrai kintakinimo pwen iyau kili Kristus Yesu para kuya kol paingan yang.

15 Pe worou masih mepo lohongarou iman, ara tukawiri lohongai para hu melit iye. Pe kapa akanlohonganiy kinna aharong tehe yo pwi, pe wawu lohonganiy handra, ara Ngindrai andre kimbusiy kileu kisa kili wawu yi. 16 Pe akapwokeyani kultuw hiyan, mepo worou kanwiriy pwen.

17 Wawu nali pe wawu pisu, akoropolo yo pe akoro ndruwa kultuwayi, pe akoho ndruwa kultuw tehe towu, pe mara wawu kiro ta hu mepo humbusi hu tehe yowu yi. 18 Paratesah, tehe lang masih mamu kinna ngara kupwai kisa kili wawu, pe mahapo upwai paiwe yi iyapolo ndruimoro, pe hu ndramat soyon, ara kultuwayihu ngara kimwisnani kei tondrih ta Kristus. 19 Hu ndramat tora, ara kamulan tahu ara andre kapohonani mwomwan, pe ngindrai tahu ara purahu, pe huhuri ngalahu iya tesah mepo andre kiyki masirai kiya kili hu. Pe lohongahu ara ngara kiro hu melit para kol pwan. 20 Hapeko worou ara kolo rou kol paingan yang. Pe lang masih ngara tukalonge Ndramat para Sopwat tou kiyau ara, mepo Yapan Yesu Kristus, 21 yiy mepo pwoke imira kili yiy para melit masih kiro pahandra pwoke tan, pe andre kisuluyani nombuwe worou para kol pwan kirayah tehe nombuwen mepo nganan iya.