1 Pwen tehen torako wawu nali pe pisu mepo ndriyo ngara kimbulihi wawu, pe lohongo ita kili wawu, wawuiki pwesai isa kili yo, pe wawu ara kasapai to. Pwen wawu koro tine pwokeyan kiya kili Yapan kiya sai aro. Pe wawu ara kowase pe nere imwonen.

2 Pe yo urakamam iya kili Yuwotiya pe urakamam iya kili Sintaike para lohonga hilu, ara kiyawule handra ko kiya kili Yapan. 3 Pe usok wawu yi, susuyo imownen, tehe wawu kasopwat hilu pihin iye mepo hilu susuye isa sura yo iya nongan hiyan. Pe iyapolo Kelement, pe hu nali masih mepo hu pwotisingi lohongahu pe ngala hu, ara ita puk para taleh.

4 Pe akapwes kiya kili Yapan lang masih. Pe nakupwai paiwe yi tehe: Akapwes! 5 Pe kultuwayi wawu waison ara, ara akapwainganiy kiya kili hu ndramat masih. Yapan pakeh andre kisa. 6 Pe wawu mbuna akalohonge soyon kiya melit handra, hapeko kiho nondriya hu nopwaran masih, ara akatohun pe akarawuloh, pe akaiki soksok tawawu kiya kili Ngindrai. 7 Pe ndriya wayis ata Ngindrai mepo iyki lohongai ileu masih, ara andre kiro penani ndriya wawu pe lohonga wawu kiya kili Kristus Yesu.

8 Pwen wawu nali pe pisu, nongno isahapwen toro, tesah ndrokonan, tesah hiyan, tesah imwonen, tesah howen, tesah wawu namiliy, tesah mepo lohonga wawu inamiliy tisingiy—pe kapa tesah hiyan masih pe andre kihari ngala wawu—ara akalohongani hu melit aro kene. 9 Pwen akatokuyani tesah mepo akanwiri hinonou para aliy, ndre tesah akanwiriy, ndre akanhilingiy—ndre akannimei kili yo. Pe Ngindrai para ndriya wayis andre kiro sura wawu.

10 Pe upwes namandran iya, iya kili Yapan tehe mahapo lohonga wawu ara itti yo paiwe yi, pe lohonga wawu ara iripo kili yo. Pe ndrokonan ara lohonga wawu itti yo, hapeko sai para akapwainganiy, ara pwi. 11 Pe yo kunpa toro paratesah, undroisi melit, ara pwi, tunan ara kunpahas pwen iya kultuw para kuwayis o kuro, konan tesah mwomwan kirayah kili yo. 12 Pe upahasaniy andre kuro tapeh konan undroisiy, pe upahasaniy andre kuro tapeh kapa sohoyo soyon. Pe kunwiri hinonou pwen tehe kuya nondriya nopwaran masih ara, ara hiyan o isa kili yo, konan anandrino soyon, ndre soyon pwi, ndre sohoyo hape ko. 13 Pe ulahi para kumbusi melit masih kene aro kiyau pwoke ta Kristus mepo iykiy isa kili yo.

14 Hapeko hiyan para wawu kasusuye kisa sura yo kiya hu nopwaran to. 15 Pe wawu para Pilipai ara wawu pahasaniy tehe hu lang kanna, wawu sopwat mbulya nongan hiyan, iro mwonen uyau uya kol namandran iya Masetoniya, ara sios sih kinhang handra melit pwi iya lohongai para yukyuk, pe lohongai para akapo, ara wawu ko, 16 paratesah, iro mwonen uro kol ngawan Tesalonaika, ara wawu rapeye melit ken iho ken isa kili yo iro mwonen undroisiy. 17 Pe mbuna akapandre unamili hu yukyuk ta wawu, ara pwi, tesah unamiliy, ara para Ngindrai kipo hiyan kisa kili wawu. 18 Pe kunwiri kene topwei pe melit ara ipep masih, pe hu yukyuk mepo wawu pwandrisa Epaprotitus pe iwiriy isa, ara kunwiriy. Hu yukyuk ta wawu, ara tehe yukyuk ngonohon layin mepo hiyan masih, pe Ngindrai ipwes iya yukyuk ara. 19 Pe Ngindrai to ara menmenan soyon iya, iyau kili Kristus Yesu, yiy andre kiyki melit masih mepo wawu ndroisiy.

20 Pe andre tukahari ngala Ngindrai Tamarou, mepo andre kinto pe kinto. Ndrokonan.

21 Pe akapa ndrokololang kiya kili hu yau ta Ngindrai haiyan kili Kristus Yesu. Pe nali hu pe pisu hu mepo hutopo sura yo, ara hupwanos ndrokololang isa kili wawu. 22 Pe hu yau ta Ngindrai haiyan masih hutopo iye, ara hupwanos ndrokololang isa kili wawu, hapeko yihu ndramat mepo hupwotisingi lohongahu mepo hu ngara kapo mbulen kiro suwe Sisar opu.

23 Pe pahas ta Yapan Yesu Kristus, ara kiro sura mwoiwa wawu. Ndrokonan.