1 Yo Pol, aposel hamou—hu ndramat kanpwandrisa yo pwi, pe ndramat hamou kiniyki yo kunna mbulen pwi, hapeko Yesu Kristus pe Tamarou Ngindrai mepo kinhingini Yesu kintine kimat, ara ipwandrisa yo— 2 yo iyasura nalihu pe pisuhu masih hutopo sura yo,

ara yowu ratuluwi nongan aro isa kili wawu hu sios para kol namandran iya Kalatiya:

3 Pahas pe ndriya wayis iyau kili Tamarou Ngindrai, pe Yapan Yesu Kristus isa kili wawu, 4 yiy mepo iyki yiy mbukenan para kimat kiya hu pakut mwomwan torou, pe isopwat worou tusa mawen kultuw pwassin para lang mahapo. Yiy ara iho ndruwa namiliwa pwokeyan ta Ngindrai pe Tamarou,

5 yiy mepo andre kahari ngalan kinto pe kinto. Ndrokonan.

6 Pe mwoiwo ihin ta wawu tehe wawu hileh opu pe akantali Ngindrai mepo iyoh wawu iyau pahas ta Kristus, pe wawu tora ndruwa nongan hiyan handra masih— 7 nongan hiyan mepo kinmwonen pwi masih. Ndrokonan para aliy, ara hu ndramat hu pakarawani wawu pe hu pakanohonou para kasuluyani nongan hiyan ta Kristus. 8 Hapeko konan kapa yowu ndre angelou hamou para kol paingan yang kipohowe nongan hiyan handra yi, pe kinna wule pwi tehe yowu kanpohowei pwen kinsa kili wawu, pwen yiy andre kikuni koran mepo andre kinto-kinto! 9 Pe tehe yowu kanpwai pwen, pe mahapo nakupwai paiwe yi: Kapa ndramat hamou kipohowe nongan hiyan mepo handra masih, pe kinna wule pwi tehe nongan hiyan mepo wawu kanwiriy pwen, pwen ndramat ara, ara andre Ngindrai kiten annan!

10 Yo mahapo urupo nohonou para kuluwi lohongahu ndramat, ndre Ngindrai? Ndre urupo nohonou para hu ndramat kasomwani yo? Kapa urupo nohonou para kupwesani hu ndramat manau, pwen yo andre kuntayah ndramat hamou para poya mbulya Kristus pwi.

11 Pwen wawu nali pe pisu, yo unamiliy para wawu kapahasaniy tehe nongan hiyan urupo pohowei, ara kinyau ndruwa lohonga ndramat, ara pwi. 12 Yo kunwiriy kinyau kili ndramat hamou pwi, pe hamou kinhinuwani yo kinna aliy, ara pwi yi. Uwiri nongan kokohon iye, ara iyau kili Yesu Kristus.

13 Paratesah, wawu kanhilong hu kultuwayi para mipwan to mepo mamu para kowase hu Yutah, mepo uiki nopwaran namandran iya kili sios ta Ngindrai, pe uro nohonou para kupwalnganiy. 14 Pe yo ara ngara kuhondruwa hu kowase hu Yutah hiyan iya. Pe uramwaitini hu hasap para mahapo. Pe lohongo ara iman iya hu kultuwayi hu kowase hu tumbu. 15 Hapeko tino kinmwalahiy isato mapu, ara Ngindrai ipwes isato pe iyoh yo, pe kintakinimo iyau pahas tan 16 pe kipwaingani Norun Kamai iripo kili yo, para kupohowe nongnan kiya kili hu Ndramira Lah. Pe kunwiri pwahanou kinyau kili ndramat pwi. 17 Pe yo uya paingan Yerusalem para kuya nime hu aposel mepo huho mu kili yo, ara pwi yi. Hapeko uya kol Arapiya, pe iyamulan umui uya kol ngawan Tamaskus.

18 Pe hayou marayoh ihipwen, pwen uya paingan Yerusalem para kuya wong kiyapolo Pita, pe uro sura yiy hu lang songui pe yimah. 19 Pe kunnime hamou ta hu aposel pwi—unime Yamis opu, yiy mepo nali Yapan. 20 Pwen upwai ndrokonan isa kili wawu iya mbulmara Ngindrai, tehe tesah urupo ratuluwiy isa kili wawu, ara pwasoyou pwi. 21 Pe iyamulan uya kol namandran iya Siriya pe uya kol Silisiya. 22 Pe hu sios hutora Yutiyah mepo hutora kili Kristus, ara hu mbukenahu hukowu to. 23 Pe huhilingi titiye to ko toro: “Ndramat mepo iro iyki nopwaran isa kiltou, ara mahapo ita pohowe nongan hiyan para lohongai ndrisiyon mepo mamu iro nohonou para kipwalnganiy.” 24 Pwen huhuri ngala Ngindrai, paratesah, iya sehe melit Ngindrai kinmbusiy iyau kili yo.