1 Pwen hayou songui pe haahiu ihipwen, yo uya paingan paiwe uya Yerusalem iyapolo Parnapas. Pe uwiri Titus iyapolo yo yi. 2 Paratesah, Ngindrai ipwaingani nongan kokohe handra para kuya. Pe upwai iya kili hu iya nongan hiyan mepo upohowei iya kili hu Ndramira Lah. Hapeko umbusiy kokohon o iya kili hu mepo hu pohon para hu kanimei, paratesah, unoh pe mbuwali para mbulyo para mamu pe para nahapo, ara kiya mwaihei o. 3 Pe konan Titus mepo yiy ndramira Krik hamou iropolo yo, hapeko hu kantakekei para kasondriti sangin pwi. 4 Lohongai aro irayah, paratesah, hu nalirou hayah ara hurapihiye hu tehe hu pwotisingi lohongahu, hapeko hu kanpwotisingi lohongahu pwi, ara husa kondrimi rou para tutopo mwoimwoi tapeh kili Kristus Yesu. Pwen andre hu kambusi worou karayah hu ndramat para pwandrendres. 5 Hapeko yowu kanyos kanna nima hu pwi, pwen nongan ndrokonan para nongan hiyan ara andre kiro ndron sura wawu.

6 Pe hu mepo hunime hu tehe hu mangalahu—sehe melit hu mbusiy, ara kiniyki handra nimnim kinsa kili yo pwi. Ngindrai kinho pire tehe ndramat ngara kipire—pe hu ndramat ara, ara sehe melit humbusiy, ara kinlahiy para kiposura nongno pwi. 7 Hapeko uposusura nongno, ara yihu yirowei tehe Ngindrai welen iso sato pe iyki mbulen para pohoweya nongan hiyan isa kili yo, para kupohowe nongan hiyan kiya kili hu Ndramira Lah, pwen tehe Pita kinpohowei kinna kili hu para Yutah. 8 Paratesah, Ngindrai mepo iyki pwoke iya mbulya Pita tehe aposel hamou iya kili hu para Yutah, ara ipwokeyani mbulyo yi, tehe aposel hamou iya kili hu Ndramira Lah. 9 Pe Yamis, Pita pe Yohanes, ara yihu tehe pahut para sios, pe yihupa hiyan isa kili youlu Parnapas para youlu kasusuye kiya wule, pe kasotini sios iro mwonen hu yirowe pahas ta Ngindrai kiniykiy kinsa kili yo. Pe hupa hiyan para youlu kaya kili hu Ndramira Lah, pe yihu kaya kili hu para Yutah. 10 Pe nongan handra ko mepo hu sok para yowu koro mbusiy mannau, ara youlu kalohongani hu ndramat mepo hu ndroisiy, lohongai ara ko, ara uro lohonganiy pwokeyan para kumbusiy i.

11 Pe iro mwonen Pita isa Antiyok, yo upwatahaniy mwomwan iya mbulmaran, paratesah, kultuw imbusiy ara mwowmwan masih. 12 Paratesah, hu ndramat hayah huro kili Yamis mapu hu kansa, ara mamu Pita ngara kiro namnam iyapolo hu Ndramira Lah. Hapeko iro mwonen hu ndramat ara husarayah, yiy itali hu pe indrih iya mawen kili hu Ndramira Lah, paratesah, inoh tahu ndramat mepo hu ngara kapa kasosondrih sangi ndramat. 13 Pe hu Yutah hayah, ara hu rapihiye hu pe hususuye iya kultuw mwomwan ta Pita iro mbusiy, pwen kultuw mwomwan tahu ara, ara imbusi Parnapas irapihiye yiy i, pe iluwani yiy iya mawen iro ndruwa kultuw mwomwan tahu.

14 Pe iro mwonen uyirowei tehe kultuwayi hu kinto ndruwa nongan ndrokonan para nongan hiyan pwi, pwen upwai iya kili Pita iro mbulmara hu masih upa, “Wou ara ndramira Yutah hamou, hapeko mipwan tam, ara pwen tehe Ndramira Lah hamou, pe oho ndruwa kultuwayi hu, pe anmbusi wou tehe hamou Yutah pwi. Pwen pe paratapeh pe arakekeyani hu Ndramira Lah para hukoro ndruwa hu kowase hu Yutah?

15 Pe worou, ara worou ndraye Yutah, pe tukanyau ndraye hu Ndramira Lah mepo pakut ta hu mwomwan, ara pwi. 16 Pe akapahasaniy tehe ndramat hamou andre kinto mwonen kapa kiro ndruwa nongan para pwahanou o, ara pwi, hapeko iya lohongai ndrisiyon iya kili Yesu Kristus. Pwen pe yowu ara tehen aliy i, yowuiki lohonga yowu ndrisiyon iya kili Kristus Yesu, pe imbusi yowu irayah ndramat imwonen iya lohongai ndrisiyon towu iya kili Kristus, pe yowu konto ndruwa nongan para pwahanou pwi. Paratesah, kapa yowu koro ndruwa nongan para pwahanou, ara andre kinmbusi ndramat hamou kinto mwonen pwi.

17 Pe kapa tukanohonou para tukarayah ndramat imwonen, kapa tukoro mwonen kili Kristus, ara ipwainganiy tehe worou Yutah mbukenan, ara pakut torou mwomwan i. Pwen ara ipwai tehe Kristus ipwes iya pakut mwomwan? Pwi yoh! 18 Pe kapa tesah kunpwalnganiy ara andre kupwiliy paiwe, pwen ara iyinganiy tehe yo ara ndramat ngara kundrihisani nongan para pwahanou. 19 Paratesah, iyau ndruwa nongan para pwahanou, ara kunmat iya nongan para pwahanou, pwen iyau ara ko, urupo mwalen kili Ngindrai. 20 Pe kantapaingi yo kunna kei tondrih iya polo Kristus, pwen kunto mwalen pwi, hapeko taleh ta Kristus iripo kili yo imbusi yo urupo mwalen. Pe lohongai ndrisiyon to iya kili Noru Ngindrai Kamai mepo ndriyan imbuluhi yo pe iyki yiy masih para kimat isato, ara iyki taleh isa nombuwe. 21 Pe kunho lowani pahas ta Ngindrai pwi, paratesah, kapa nongan para pwahanou kinmwaniyani rou karayah ndramat imwonen, pwen kimat ta Kristus ara mwaihei opu!