1 Wawu ndramira Kalatiya, ara lohonga wawu pwi! Hiyeh kinpakarawani lohonga wawu? Yesu Kristus, ara rapaingi yiy iya ngawan iho kei tondrih iro mbulmara wawu. 2 Unamiliy para akasomwi soksok handra iye na: Wawu ndra wawu wiri Mwoiwan Haiyan ara wawu ho ndruwa nongan para pwahanou, ndre, wawu pwotisingi lohonga wawu iya nongan wawu hilingiy? 3 Lohonga wawu kinna pwi masih ara. Wawu randroyi mbulya wawu ara iyasura Mwoiwan Haiyan, pwen mahapo wawu pakanohonou para kambusi mbulya wawu kiya hapwen kiya pwoke ta wawu mbukenan, ndre? 4 Hu nopwaran wawu kanna nondriyan ara, ara wawu pa ndre para mwaihei o, ndre—pe kapa ndrokonan tehe nopwaran ara mwaihei o? 5 Pwen pe Ngindrai iyki Mwoiwan Haiyan tan isa kili wawu, pe hu ndraikiya pwoke imangsaniy mwalinga wawu, ara paratesah, wawu ro ndruwa hu nongan para pwahanou, ndre wawu pwotisingi lohonga wawu iya tesah wawu hilingiy?

6 Pwen pe akanimnim kiya nongan iwong iyata Apraham toro: “Yiy ipwotisingi lohongan iya kili Ngindrai, pwen Ngindrai ipohowe yiy ara ndramat imwonen.” 7 Pwen pe lohonga wawu kileu tehe yihu mepo hu pwotisingi lohongahu, ara hu ndraye Apraham imwonen. 8 Koluw kinna nongan haiyan ta Ngindrai kinpwai pwen toro, imbusi hu Ndramira Lah hu rayah ndramat imwonen, ara iya lohongai ndrisiyon tahu. Pe Ngindrai ipohowei imu iya kili Apraham toro: “Hu ndraye ndramat masih para kol pwan andre kawiri lomwes kiyau kili wou.” 9 Pwen pe hu mepo lohongahu ndrisiyon ita kili hu, ara andre hu kawiri lomwes kiyapolo Apraham mepo ndramat para lohongai ndrisiyon.

10 Paratesah, pwayan kinpwai pwen iya kili hu ndramat masih toro: “Ngindrai andre kiten ana hu masih mepo hu konho ndruwa hu nongan masih kantatuluwiy ita nondriya Puk para Nongan Para Pwahanou.” Pe hu masih mepo hu ngara koro ndruwa nongan para pwahanou, ara andre Ngindrai kiten ana hu. 11 Pe ileu masih tehe yiy mepo iro ndruwa nongan para pwahanou ara yiy imwonen iya mbulmara Ngindrai, paratesah, “hu mepo kultuwayi hu imwonen, ara andre huikoro mwalen kiya lohongahu ndrisiyon tahu.” 12 Hapeko nongan para pwahanou ara kinto ndruwa lohongai ndrisiyon pwi. Nongan ipwai toro: “Ndramat mepo iho ndruwa hu nongan para pwahanou, ara kitokuyani hu.” 13 Paratesah, pwayan kinpwai pwen toro: “ Kristus ara kinwiri korarou pe irakonuh rou tusa mawen kora nongan para pwahanou. Pe yihu masih mepo rapaingi hu koho kei tondrih sih, ara Ngindrai andre kiten ana hu.” 14 Kristus irakonuh rou, ara para lomwes mepo Ngindrai kiniykiy kinna kili Apraham, ara andre kisa kili hu Ndramira Lah kiyau kili Kristus Yesu. Pwen pe Mwoiwan Haiyan mepo Ngindrai kintandrangan kinnatan, ara andre tukawiriy kiyau lohongai ndrisiyon.

15 Pwen wawu nali pe pisu, andre kupwainganiy kiya kultuw lang masih ndramat ngara kimbusiy. Pwen tehen aliy o, tehe hamou kinlahiy para kirapiyani tapaniu ta ndramat hamou kinmbusiy ndre kiposura tapaniu tan mepo kinmbusiy pwen kintayah, ara pwi. 16 Pwen pe Ngindrai ara irandranga hu nongan ara iya kili Apraham pe ndrayen hamou. Nongan haiyan kinpwai kinpa, “pe iya kili ndrayem hu,” ara pwi, ndroyi nongan ara, ara kinna kili hu ndramat soyon pwi, hapeko iya kili“ndrayem hamou opu” ndroiyi nongan ara ndramat hamou opu mepo yiy Kristus. 17 Pwen ndroiyi nongno ara toro: nongan para pwahanou mepo Ngindrai andre kipwainganiy nondriya hayou haangat pe tingui kamulan, ara andre kintapiyani tapaniu ara pwi. Pe melit Ngindrai kintandrangan pe kinmbusiy pwen kinna, ara andre kantapaiwaniy pwi. 18 Paratesah, kapa hu yukyuk tuwiriy, ara iyau nongan para pwahanou, pwen kinyau ndruwa nongan mepo Ngindrai itandrangan iya aliy, ara pwi; hapeko Ngindrai iykiy iyau pahas tan, tehe tapaniu handra kiniykiy kinna kili Apraham.

19 Paratapeh pe Ngindrai iyki nongan para pwahanou? Ngindrai iposura nongan para pwahanou ara kiyingani pakut mwomwan kipoo ndrayen mepo Ngindrai kintandrangan kinnatan, ara kisarayah. Pe nongan para pwahanou ara Ngindrai iyki iya kili hu angelou, pe ndramat hamou ara irayah moyut.*Mose ara irayah moyut mwalinga ndramat pe Ngindrai 20 Pe moyut hamou ara kinho wiri poho ndramat hamou o, ara pwi. Hapeko Ngindrai ara, ara yiy, hamou opu.†Pe Mose irayah moyut para nongan para pwahanou, hapeko Ngindrai imbusi tapaniu iya kili Apraham, ara hamou kintayah moyut pwi, iykiy iya mwomnen iya kili Apraham

21 Pwen tapeh, nongan para pwahanou ara ngara kimwisnani hu nongan para tapaniu ta Ngindrai, ndre pwi? Pokone masih! Paratesah, kapa nongan para pwahanou sahin kaniykiy, pe iyki taleh, pwen kultuw imwonen, ara isa iyau nongan para pwahanou. 22 Hapeko Nongan Haiyan ta Ngindrai kinpwai tehe hu ndramat masih para kol pwan, ara hu tora pahandra pwoke para pakut mwomwan. Pwen pe tesah Ngindrai kintandrangan kinna aliy, ara kaniykiy iyau lohongai ndrisiyon iyau kili Yesu Kristus. Pe andre kaikiy kiya kili hu mepo hu pwotisingi lohongahu.

23 Pe lohongai ndrisiyon aro kinsa mapu, pwen turo kou pahandra pwoke para nongan para pwahanou, pe ipwahatini rou, ipoo isarahihini lang mepo Ngindrai ipwaingani lohongai ndrisiyon. 24 Pwen tehen tora ko, nongan para pwahanou, ara irayah lohowarou para kiluwani rou kaya kili Kristus, pwen lohongai ndrisiyon torou kimbusi worou karayah hu ndramat imwonen. 25 Pwen mahapo lohongai ndrisiyon aro, ara kinsarayah, pwen tukonto pahandra lohowa nongan para pwahanou pwi.

26 Paratesah, wawu masih mepo wawuiki lohongai ndrisiyon ta wawu iya kili Kristus Yesu, ara wawu noru Ngindrai, 27 paratesah, wawu masih wawu wiri paptais pe wawu pai iya kili Kristus, ara tehe wawu kohi wawu mbukena wawu iya koyau tan. 28 Pe Kristus Yesu kinho hire pwi, konan wou para Yutah, ndre Krik, ndre wou para pwandrendres, ndre ata mwoimwoi, ndre kamai ndre pihin, paratesah, wawu masih, ara wawu hapat o. 29 Pwen kapa wawu ata Kristus, ara wawu ndraye Apraham, pe wawu andre kawiri hu lomwes mepo Ngindrai kintandrangan pwen kinna kili yiy.