1 Pe yo uwong tehe ndramat hamou mepo kiwiri noku taman pe kiwiri menmenan, ara yiy iyaharong o tehe ndramat hamou para pwandrendres o, konan kapa kiwiri topwei menmena taman kiya mbukenan yiy. 2 Pe yiy ara andre kiro pahandra hu ndramat para pwokereyan pe hu ndramat mepo huro nimnim iya menmenan, kipoo kiya rahihini lang mepo taman kinsan nowen. 3 Pwen tehen tora ko, ma turondron mbunah, ara turayah ndramat pwandrendres pe turo pahandra pwoke ta hu payit para kol pwan. 4 Hapeko isa rahihini lang imwonen mepo Ngindrai ipwandrisa Norun Kamai, pihin hamou imwalahiy iya atan, iro pahandra nongan para pwahanou, 5 para kirakonuh hu mepo huro pahandra nongan para pwahanou, para worou karayah hu noru Ngindrai kamai imwonen. 6 Paratesah, wawu ara norun hu kamai, pe Ngindrai ipwandrisa Mwoiwa Norun Kamai isa ndriyarou. Pe Mwoiwan mepo iripo ndriya rou, ara iyoh ipa, “Tomo, Tomo.” 7 Pwen pe wawu ara ndramat hamou para pwandrendres pwi, hapeko wawu, ara noru Ngindrai kamai, pe kapa wawu norun kamai, pwen tehen tora ko menmena Ngindrai masih andre kiykiy kisa kili wawu tehe wawu norun.

8 Pe iro mwonen wawu kanpahasani Ngindrai pwi, pe wawuro tehe pwandrendres o mwaihei ta hu ngindrai mepo ndrokonan pwi. 9 Hapeko mahapo wawu kanpahasani Ngindrai—ndre Ngindrai kinpahasani wawu—pwen paratapeh pe wawu pakarapaiwani wawu kamui kaya hu pwoke tahu payit mepo pwoke tahu pwi? Wawu namiliy para karayah pwandrendres tahu payit paiwe yi, ndre? 10 Pe wawu ngara kaiki lohonga wawu topwei pe kahaiyani hu lang, pe hu walah, pe hu nowe melit pe hu hayou! 11 Yo unoh hape isata wawu; matisan mbulyo mepo kunmbusiy kinsa kili wawu, ara andre kiya mwaihei o.

12 Wawu nali pe pisu, yo urakamam isa kili wawu para wawu karayah tehe yo, paratesah, yo urayah tehe wawu. Wawu kanmbusiy mwomwan kinsa kili yo pwi. 13 Pe wawu pahasaniy tehe mamu kinna ara umwa pwen usa pohowe nongan hiyan imu isa kili wawu. 14 Pe mwamwa uya aliy, ara iyki nopwaran isa kili wawu, hapeko wawu wele wawu kinimai to pwi, ndre wawu kanrasses. Hapeko wawu rawulohani yo pwen tehe angelou hamou ta Ngindrai, pe wawu rawulohani yo tehe Kristus Yesu o. 15 Pe lomwes para pwesai masih ta wawu, ara aleheh? Pe ulahiy para kuratiyani nongan kisa kili wawu tehe kapa wawu kalahiy, ara wawu kaniyki mara wawu pwen kinsa kili yo. 16 Pwen tehen tapeh, upohowe nongan ndrokonan isa kili wawu pe wawu mwisnani yo iya aliy, ndre?

17 Pe yihu ndramat ara, ara hu pakapakarawani lohonga wawu ko, hapeko lohonga hu, ara hiyan pwi. Tesah hunamiliy para kambusiy, ara para hu kasingori wawu para akoro mawen kili yowu, pe lohonga wawu andre kiropolo hu ko. 18 Pe kapa hingorowa wawu para akasopwat hu hayah ara hiyan, pwen akoro mbusiy tehen tora, konan kapa kunto polo wawu pwi. 19 Wawu noru mepo nere imwonen, uhungorowe hu ngandran paiwe yi tehe ngandran para pihin hamou nakimwalahiy kata mbunah, kipoo Kristus kiwiri nokun kiro kili wawu. 20 Pe unamiliy para kuro sura wawu mahapo pe andre kalihingi ngasa mbulukoyu, paratesah, lohongo iti wawu para andre kusopwat wawu tehen tapeh!

21 Pwen kiya akapwai sato, wawu mepo wawu namiliy para akoro pahandra nongan para pwahanou, wawu pahasani tesah nongan para pwahanou ita wong iya aliy, ndre pwi? 22 Pwayan kinpwai toro, Apraham ara norun kamai malmou. Norun hamou ara iyau pihin para poya mbulen, pe norun hamou ara iyau kili nambuyun imwonen. 23 Pe norun kamai mepo pihin para poya mbulen imwalahiy iya atan, ara irayah iya namiliwa nombuwe ndramat, hapeko norun kamai mepo nambuyun imwonen mepo imwalahiy iya atan, ara Ngindrai irandrangan iya atan, pe isa mannan.

24 Pwen pe hu melit aro, ara irayah tehe nongan pwandritiye, paratesah, hilu pihin malmou ara, ara hilpwaingani tapaniu malndra. Pe tapaniu handra, ara iyau Ngondron Sainai. Pe ipwaingani hu noru Hakar mepo hurayah hu ndramat para pwandrendres. 25 Pwen Hakar ara iyingani Ngondron Sainai, ita nondriya kol namandran masih Arapiya, pe iyawule tehe kol namandran Yerusalem mepo mahapo ita , paratesah, kol namandran Yerusalem ita nondriya pwandrendres iyapolo norun hu. 26 Hapeko Yerusalem mepo ita kol paingan yang, ara ita mwoimwoi, pe Yerusalem ara, ara tinarou. 27 Paratesah, pwayan kinpwai toro:

ara norun hu kaya soyon kiramwaitini pihin mepo manambuyun.”

28 Pwen wawu nali pe pisu, wawu ara tehe Yisaak; wawu noru Ngindrai mepo kintandrangan. 29 Pe iro lang ara, ara mbunah kamai mepo mwalahiy iya tan iyau namiliwa nombuwe ndramat, ara ngara kihingasi mbunah mepo mwalahiy iya tan iyau pwoke ta Mwoiwan Haiyan. Pe iyawule tehe mahapo. 30 Hapeko Nongan Haiyan ipa tesah? “Akarasses pihin para pwandrendres kiyapolo norun kamai, paratesah, noru pihin kamai para pwandrendres, ara andre kinpo hape menmena taman kiyapolo mbunah kamai noru pihin mepo iro mwoimwoi, ara pwi.” 31 Pwen tehen torako wawu nali pe pisu, worou ara noru pihin para pwandrendres pwi, hapeko worou ara noru pihin mepo ita mwoimwoi.