1 Pwen worou tutopo mwoimwoi, paratesah, Kristus imbusi worou topo mwoimwoi. Pwen akoro tine pwokeyan, pe wawu mbuna koro pahandra nopwaran para nongan pwahanou para pwandrendres paiwe yi.

2 Akahilingi tesah yo Pol upwai isa kili wawu. Kapa wawu kasondriti sangi wawu, pwen tesah Kristus imbusiy isa kili wawu masih, ara andre kiya mwaihei opu. 3 Pwen uwong ngawan porosih i isa kili wawu kamai masih, tehe sehe ndramat kisondriti sangin, ara yiy kiho ndruwa nongan para pwahanou masih. 4 Pe wawu mepo wawu nohonou para akambusi wawu koro mwonen ndruwa nongan para pwahanou, ara wawu kaniyki ndranga wawu polo Kristus, pe akanna mawen kili pahas ta Ngindrai. 5 Paratesah, iyau pwoke ta Mwoiwan Haiyan tukapwotisingi lohongai ndrisiyon pe tukoro sohoni kultuw imwonen itapo isa. 6 Paratesah, hiyeh kiro kili Kristus Yesu, ara lohongai para sosondrih sangi ndramat, ndre lohongai para sosondrih sangi ndramat pwi, ara mwaihei opu. Melit handra kopu, ara lohongai ndrisiyon mepo ipwaingani kultuw para kambuluhi hamou.

7 Pe wawuro mbusi melit hiyan iya. Pe hiyeh iyki songot para wawu mbuna akoro ndruwa nongan ndrokonan? 8 Pe lohongai para suhuri hu ndramat tehen tora, ara kinyau kili Ngindrai mepo iyoh wawu, ara pwi. 9 Pe yis hape ko kiya ndrinanohun, ara andre masih kisama topwei. 10 Pe upwotisingi lohongo iya kili Yapan tehe andre wawu kanho ndruwa lohongai handra pwi. Pe ndramat mepo ita nohonou para kipakarawani lohonga wawu, sehe ndramat ndrokonan, ara yiy andre kiwiri kene koran. 11 Pwen wawu nali pe pisu, kapa urupo pohowe nongan para sondriti sangi ndramat manau, pwen paratapeh pe urupo kuni nopwaran manau? Kapa tora, pwen nongan para kei tondrih, ara melit mwaihei o. 12 Pe hu ndramat mepo hu pakarawani lohonga wawu, ara hu kansondriti sangi hu mbukenan, pe ulohonganiy tehe hu kara mbuwa hu kiyau.

13 Pwen wawu nali pe pisu, Ngindrai kiniyoh wawu para akoro mwoimwoi. Pe namiliwai para nombuwe wawu ara mbuna kipakarawani lohonga wawu, hapeko wawu kaiki wawu kaya pwan pe akapo mbulya hamou-hamou kiyapolo kultuw para namiliwai. 14 Paratesah, pe nongan para pwahanou masih, ara andre kinsa mannan kiro pahandra nongan para pwahanou sahin o iye: “Ndriyam kimbuluhi yiy mepo para pakeh kili wou tehe ndriyam imbuluhi wou mbukenan.” 15 Hapeko kapa wawu koro hingasi hamou-hamou ta wawu pe wawu kapwokasiyani wawu, pwen wawu koro hinehes, matisan akapwalngani wawu hamou-hamou.

16 Pwen upa, akatali Mwoiwan Haiyan kiluwani wawu, pwen hu kultuw mwomwan para nombuwe ndramat, ara andre akanmbusiy pwi. 17 Paratesah, namiliwai para nombuwe ndramat mepo ndramat inamiliy, ara Mwoiwan Haiyan kinamiliy pwi. Pe Mwoiwan Haiyan kinnamili hu kultuw para nombuwe ndramat pwi. Hilu ngara kahangas, pwen pe wawu konho mbusi tesah wawu namiliy para kambusiy, ara pwi. 18 Hapeko kapa Mwoiwan Haiyan kiluwani wawu, ara wawu konto pahandra nongan para pwahanou pwi.

19 Pe hu kultuw mwomwan para nombuwe ndramat, ara toro: kultuw para pilah, kultuw pwalan, pe para ndriyam kitine kileh para ambusi kultuw mwomwan, 20 kultuw para atohun kiya kili hu ngindrai pwasoyou, kultuw para paira memelit para katten ana hamou, pe hingasi ndramat hamou, ndrinalokuh, maimai, koyum iti wou mbukenan, pwakaiye pe karasumbuwani ndramat, 21 kultuw para maram kilimiri menmena hamou, kuimwa ndran tunguyan, pe tandroindroi handra-handra, hu kultuw masih toro. Pwen upwandrandrahani wawu tehe mamu kunmbusiy, tehe hu mepo hu katokuyani hu kultuw aro kene, ara andre hu kanna nondriya kolo king ta Ngindrai mepo ngara kiro mu kiya aliy, ara pwi.

22 Hapeko kultuwayi Mwoiwan Haiyan, ara namiliwai, pwesai, ndriya wayis, lohongai ikuw, pahalan, kultuw hiyan, lohongai ndrisiyon, 23 kultuw para awayis o, kultuw para akakaituwe wawu. Pe handra nongan para pwahanou ara andre kindrihisaniy pwi. 24 Pwen hu mepo ata Kristus Yesu, ara hu kantapaingi hu kultuw mwomwan para nombuwe ndramat handra-handra kinna kei tondrih. 25 Pe Mwoiwan Haiyan iyki taleh isa kiltou, pwen tukatokuyani namiliwa Mwoiwan Haiyan. 26 Pe mbuna tukasikiye rou, pe kasuhuri hu ndramat para hu kambusi mwomwan, pe maram mbuna kilimiri menmena ndramat hamou.