2
Nongan pwahanou para koro hinehes
1 Pwen tunan iye ko, worou kaponokulani tisingi nongan mepo kanhilingiy pwen, pwen andre tukanyos kanna mawen aliy pwi. 2 Nongan mepo Ngindrai iykiy iya kili hu angelou ara ndrokonan, pe kapa hu ndramat kandrihisani nongan para pwahanou pe kanto ndruwan pwi, ara andre hu kawiri korahu. 3 Kapa tukandrihisani ndramat mepo sopwat tan namandran, ara kinlahiy para kawop kora mwomwan pwi. Sopwat iye ara Yapan kinpohowei mamu, pe hu mepo hu kanhilingiy iyau kili Yapan, ara hupohowei imwonen o isa kili tou. 4 Pe Ngindrai ipwokeyani nongnan i, iyau hu kaipisa pwoke, hu kinima pwoke, pe hu ndraikiya pwoke handra-handra, pe hu yukyuk Mwoiwan Haiyan iyki, ara iho ndruwa namiliwan pwokeyan mbukenan.
Yesu irayah tehe ndramat imwonen
5 Ngindrai kinrakinima hu angelou para hu koro mu kiya kol pwan howen mepo itapo isa, ara pwi, kol pwan howen mepo yowu topo wong iya aliy. 6 Paratesah, nongan haiyan iye, ara hamou kintiyaniy pwen ita nongan sahin ipa toro:
“Hu ndramat ara yihu hiyeh mepo lohongam ngara kiti hu,
pe noru ndramat kamai hamou, ara yiy hiyeh mepo ngara aro pwokere yiy?
7 Wou ambusi hu ndramat huya pahandra hu angelou ara ndrangan niwen pwi,
pe ahari ngalahu pe ahaiyani hu.
8 pe irakinima hu ndramat para melit masih koro pahandra pwoke nopwaran tahu.”
Pe Ngindrai andre kiyki hu melit masih kiya pahandra pwokere tahu, hapeko lang mahapo ara tukanimei tehe melit masih kinna pahandra pwoke nopwaran tahu masih, ara mapu.
9 Hapeko tukanime Yesu. Ngindrai iyki yiy isa pahandran hape kili hu angelou, pe kinto ndrangan niwen pwi. Pe iya pahas ta Ngindrai, imat para kikonuh hu ndramat masih, paratesah, nopwaran para kimat iya nondriyan, ara mahapo Ngindrai kinsikiye yiy, pe kiniyki pwoke nopwaran kinna kili yiy.
10 Ngindrai ara ndroiyi melit masih mepo kintayah pwen hutopo, pe inimei tehe hiyan para Yesu kiya nondriya nopwaran para kimat, pe kimat tan ara, ara imwonen masih, paratesah, ihomu pe iluwani hu ndramat soyon hu wiri sopwat ta Ngindrai. 11 Pe Yesu imbusi hu huya howen para hu karayah haiyan, pwen yiy pe yihu mepo hurayah haiyan, ara andre hu karayah hapat. Pe Yesu kinho masi para kipohowe nali hu pe pisun hu pwi. 12 Yiy ipwai iya kili Ngindrai ipa,
“Yo andre kupohowe ngalam kiya kili yowe hu,
pe kiro mwalinga hu ndramat huro mbultere hu, andre kupowaliy pe kuhari ngalam.”
13 Pe ipwai paiwe yi ipa,
“Andre kupwotisingi lohongo kiya kili yiy.”
Pe ipwai paiwe ipa,
“Yo iye, pe iyasura hu noru Ngindrai mepo kiniyki kinsa kili yo.”
14 Pe norun hu ara hu ndramat manombuwehu, pe Yesu yi, ara irayah ndramat iyawule tehe yihu ko. Pe iyau kimat tan, ara ipwalngani Sinai mepo pwoke para kimat iro kili yiy — 15 pe kimat tan, ara isopwat yihu pe husa mawen kou para nohowai para kimat, pe para hukoro mwoimwoi. 16 Paratesah, ileu masih tehe Yesu kinsa para kisopwat hu angelou pwi, hapeko para kisopwat hu ndraye Apraham. 17 Pwen ndroiyin ara ko, yiy irayah tehe yihu imwonen, kultuwayin masih, ara iyawule ko tehe ndramat. Pe ilahiy para kipombulen tehe pris ihohin iya kili Ngindrai, pwen lohongai ndrisiyon tan, pe koisirai tan, ara imbusi yiy irandropwoye hu pakut mwomwan ta hu ndramat. 18 Paratesah, yiy mbukenan iya nondriya nohonou, pe ikuni nopwaran, pwen ilahiy para kisopwat hu mepo andre hu kaya nondriya nohonou.