3
Yesu ara ihohin kili Mose
1 Pwen tehen tora ko, wawu nali mepo wawu pwotisingi lohonga wawu, Ngindrai ara iyoh wawu iya yoholai tan haiyan. Pe lohonga wawu kippai kiro kili Yesu, yiy ara Aposel pe Pris Ihohin Ta Hu Pris Masih, mepo worou ngara kapohowe ngalan pe kaiki lohongai ndrisiyon torou kiya kili yiy. 2 Yesu iyki lohongan ndrisiyon iya kili Ngindrai, yiy ara Ngindrai irakiniman, pwen tehen tora ko Mose iyki lohongan ndrisiyon iya mbulen masih para yumwa Ngindrai. 3 Yesu ara kahaiyani yiy kihohin ta Mose, pwen tehe ndramat hamou ipuli seu hawum, ara andre kahaiyani ndramat ipuli seu, pe andre kanhaiyani seu pwi. 4 Paratesah, seu masih puli hu, ara ndramat hamou-hamou ipuli hu, hapeko ndramat ipuli melit masih ara, ara Ngindrai. 5 Mose ipwotisingi lohongan ndrisiyon tehe ndramat para poya mbulen iya mbulen masih para yumwa Ngindrai, pe iratiyani hu melit mepo Ngindrai kinpwai para andre kirayah kamulan. 6 Hapeko Kristus ara iyki lohongan ndrisiyon tehe noru Ngindrai Kamai, pe yiy ara yapane yumwa Ngindrai. Pe kapa worou ara suwen, pwen tukarahatinirou kiya melit itapo isa mepo lohongarou ipwoke iya aliy.
Pwahanou iya kili hu ndramat mepo hu kanpwotisingi lohongahu pwi
7 Pwen tehen tora ko, Mwoiwan Haiyan ipa,
“Kapa nepo ahalingi mbulukoyu Ngindrai,
8 ara ndriyam mbuna kipwoke, pwen tehe hu tumbu wawu hu, mepo hu ndrihisani Ngindrai, pe hu nohonou Ngindrai tandrohonga huro kol ndrohoyin.
9 Ngindrai ipa, konan hu tumbu wawu hu kannime sehe melit kunmbusiy nondriya hayou mahaangui, hapeko hu pakahinonou para pakanohonou pwoke to.
10 Pwen tunan ara ko, ndrino ilokuh ta hu ndraye hasap para lang ara, pe upa;
‘Hu ndrihisani hu, pe mbuwalihu para hukoro ndruwa hu nongan para pwahanou to.’
11 Pwen pe nondriya ndrina lokuh to, urandrangan pwokeyan isa kili yo mbukeno tehe andre hu kanna nondriya ngohongoh to pwi.”
12 Pwen wawu nali, mara wawu kiro ta wawu, tehe hamou ta wawu mbuna kitali lohongan ndrisiyon pe kimbusi pakut mwomwan, pe kitali Ngindrai mwalen pe kiya mawen. 13 Tehe Nongan Haiyan kinpwai pwen ipa, “Nepo” wawu koro pwokeyani wawu hamou-hamou lang masih, pwen pe pwasoyou para pakut mwomwan mbuna kimbusi wawu akakaituwe ndriya wawu. 14 Paratesah, worou kansusuye kansa polo Kristus, pwen tukarahatinirou kiya lohongai ndrisiyon torou, tehe tukanmbusiy mamu kinna kipoo lang kiyahapwen. 15 Tehe Nongan Haiyan kinpwai kinpa;
“Nepo, kapa wawu kahilingi mbulukoyun,
ara wawu mbuna kakaituwe ndriya wawu tehe mamu wawu ndrihisani yo.”
16 Yihu ndramat ara ko, ara huhilingi yo, pe hu ndrihisani yo. Pe yihu ara ko yi, ara Mose iluwani hu masih, husa mawen Yisip. 17 Pe yihu ariya kopu, nondriya hayou mahaangui, Ngindrai ndrinan ilokuh tahu. Ndrinan ilokuh ta hu ndramat mepo hu mbusi pakut mwomwan, pe humat nombuwehu hu kene kol ndrohoyin. 18 Pe yihu ara ko, ara Ngindrai irandrangan pwokeyan iya kili yiy mbukenan para yihu andre kanna nondriya ngohongoh tan pwi, yihu mepo hukonho hilingi nongan pwi. 19 Pwen tukanimei, yihu kanna nondriya kol para ngohongoh pwi, paratesah, hu kanpwotisingi lohongahu pwi.