4
Lang Sapat para ngohongoh ta hu yowe Ngindrai
1 Pe tesah Ngindrai kintandrangan pwokeyan kinna aliy para kaya nondriya ngohongoh ara iripo manau. Pwen worou koro hinehes tehe Ngindrai mbuna kikahi hamou tawawu kiyos pe kinna nondriya ngohongoh pwi. 2 Nongan hiyan mepo tukanwiriy iripo kiltou, ara ihisoule ko tehe mamu hu Yisrayel kanwiriy. Hapeko nongan hu hilingiy ara, ara iya mwaihei o iya kili hu, paratesah, nongan hu wiriy, ara hu kanwiriy kinnapolo lohongai ndrisiyon pwi. 3 Pwen worou mepo tupwotisingi lohongarou ara andre tukaya nondriya ngohongoh mepo Ngindrai kintandrangan pwokeyan pwen kinpa;
“Ndrino ara ilokuh pe urandrangan pwokeyan isa kili yo mbukeno toro;
‘Yihu andre kanlahiy para kanna nondriya ngohongoh to pwi’ ”
Nongan iye, ara ipwandrohonge iya lenge Mose, hapeko Ngindrai ara mbulyan para kimangsani kol pwan ara kinhipwen, pe kiningoh. 4 Paratesah, nongan sahin Nongan Haiyan iwong toro iya lang andrtoyoh para ngohongoh, “Iro lang andrtoyoh imwonen Ngindrai ingoh iya hu mbulyan masih.” 5 Pe ita nondriya nongan kinna ara ko, ara ipa toro, “Yihu andre kanna nondriya ngohongoh to pwi.”
6 Pwen nongan ara, ara iripo ndron tehe hu hayah o andre hu kaya nondriya ngohongoh. Pe hu para mamu nongan hiyan pohowei iya kili hu, hapeko hu kanna nondriyan pwi. Paratesah, hu ndrihisani nongan. 7 Pwen pe Ngindrai irakinima lang sih paiwe yi, ipohowei, “Nepo.” Hayou soyon iyamulan, Ngindrai iwong iyau kili Tepit tehe mamu kinpwai:
“Nepo kapa akahilingi mbulu koyun,
ara mbuna akakaituwe ndriya wawu.”
8 Yosuwa kinlahi para kiwiri hu ndramat kaya nondriya ngohongoh mepo Ngindrai irandrangan pwokeyan iya aliy, ara pwi. Pwen tehen tora ko Ngindrai iwong iya lang sih hirandron. 9 Pwen lang Sapat para ngohongoh sih ta hu yowe Ngindrai ara itandron. 10 Paratesah, yiy mepo iya nondriya ngohongoh ta Ngindrai, ara yiy i andre kingoh kiya mbulyan mbukenan, tehe Ngindrai yi ingoh iya mbulyan. 11 Pe worou ara tukapombulen tisingiy para tukaya nondriya ngohongoh ara, pwen pe andre tukansongsin tehe hu para mamu hundrihisani nongan pwi.
12 Paratesah, nongna Ngindrai ara iripo mwalen pe iripopo mbulen pwokeyan manau. Maramaran iya iramwaitini semela pahun maran malsai. Nongnan ngara kissi ndrokomatne namiliwa ndramat pe mwoiwa ndramat, kombura ndruwi ndramat pe mwoheyenga ndruwi ndramat, pe ngara kimwaniyani lohonga ndramat pe kultuwayi ndramat ita ndriyan kisa yelan ngawan. 13 Handra melit Ngindrai imangsaniy, ara andre kinkohon mbulmaran pwi. Melit masih andre karehei pe kiro yelan ngawan mbulmara yiy mepo andre tukaramwanye nongan kiya kili yiy.
Yesus ara yiy Pris Ihohin Iyata hu Pris Masih
14 Pwen tehen tora ko, worou ara ma pris torou hamou ihohin tahu pris masih mepo kinna toton kinna kol paingan yang, Yiy ara Yesu noru Ngindrai Kamai. Pwen lohongai ndrisiyon torou ngara tukawong kiya aliy, ara tukapwotisingiy. 15 Paratesah, pris ihohin iyata hu pris torou, ara ilahi koyun kisirani rou kiya hu mwomwan torou. Pe yiy ara iya nondriya nohonou handra-handra tehe worou tuya nondriyan—hapeko handra pakut mwomwan kinto kili yiy pwi. 16 Pwen worou karahatinirou para kaya pakeh ndrohonoku pwanpwan ta king para pahas ta Ngindrai, pwen pe kiro mwonen tukandroisiy, andre tukawiri koisirai pe kakahi pahas tan.