5
1 Hu pris masih huhohin ara Ngindrai ngara kipirani hu huro mwalingahu ndramat, pe irakinimahu para hu karayah ndramat para mbulyan para hu kaya poho hu ndramat kaya kili Ngindrai. Pe mbulyahu ara para hu kambusi hu yukyuk para mwan kitimwiy para kirapiyani hu pakut mwomwan. 2 Yiy mbukenan ara ikose iya hu melit soyon, pe yiy ara kultuwayin waison kiya kili hu mepo husongsin. 3 Pwen tehen tora ko yiy mbukenan ara, andre kitimwi yukyuk para pakut mwomwan tan mbukenan, pe andre kitimwi yukyuk para kirapiyani hu pakut mwomwan tahu ndramat i.
4 Ndramat hamou kinlahiy para kiyki yiy mbukenan kiya yokyok tehe pris ihohin, ara pwi. Hapeko Ngindrai mbukenan andre kiyoh yiy, tehe kiniyoh Aaron. 5 Pwen pe Kristus i, ara yiy mbukenan, kiniyki yiy kinna yokyok tehe pris hamou ihohin, ara pwi. Hapeko Ngindrai ipwai iyatan ipa,
“Wou ara noru Kamai;
nepo yo kuntayah Tamam.”
6 Pe ita nongan haiyan sahin i, ara ipa;
“Wou ara andre aro pris hamou kinto-kinto,
iyawule ko tehe Melkisetek.”
7 Tandrohonga Yesu iro kol pwan tehe ndramat, ara itohun pe isoksok, pe irang mali yiy mandruimaran para Ngindrai kisopwat yiy para mbuna kimat. Pe Ngindrai ihilingi yiy paratesah, iro pahandra nohowai ta Ngindrai. 8 Konan yiy noru Ngindrai Kamai, hapeko ihilingi nongan opu, pe iya nondriya nopwaran. 9 Pe nopwaran iya aliy, ara imbusi yiy ilahiy para kipo ngalan kiya aliy. Pwen tora ko, yiy irayah ndramat para sopwat, pe iyki taleh iya kili hu masih mepo huhilingi yiy. 10 Pe Ngindrai irakiniman pe irayah pris ihohin iyawule ko tehe Melkisetek.
Nongan para koro rapapahan pe mbuna akasongsin
11 Nongan soyon ata Kristus tehe pris hamou ihohin tehe Melkisetek, ara iripo ndron para yowu pakapwai isa kili wawu, hapeko lohonga wawu ara ikairut. Pwen pe kinlahiy para karatiyaniy kisa kili wawu pwi. 12 Ndrokonan para aliy, ara wawu andre kantayah pwen tehe hu ndramat para hinonou, hapeko pwi, ndramat hamou andre kisa pe kihinuwani wawu paiwe yi kiya hu melit mendreheh-mendreheh ndrokonan para nongna Ngindrai. Wawu tora manau sus, mapu akanwiri anandrinai pwokeyan. 13 Yihu mepo hutora ndron sus, ara hu tehe hu mbunah malaman, pe nongan para kultuw imwonen, ara hu kowu iya aliy. 14 Hapeko anandrinai pwokeyan, ara atahu mepo hu kanpwoke, hu mepo hu rahatinihu, pe hu mbukenahu hu lahiy para kayirowe hiyan pe mwomwan.