1 Pwen tehen tora ko tukatali hu hinonou para melit mendreheh-mendreheh ta Kristus, pe tukarahatinirou pe tukaya hangoh kiya hinonou pwokeyan. Lohongai ndrisiyon ta wawu para mamu iro kili Ngindrai, pe hu kultuw para karapaiwani ndriya wawu mepo ngara kiluwani wawu kiya kimat, ara wawu mbuna kamui kaya aliy. 2 Hu hinonou para kasumuluwani hu ndramat, pe hu hinonou para nima ndramat iyah iya paya ndramat, pe hinonou para kimat pe katine, pe para tamwanye mepo andre kinto-kinto, ara akataliy. 3 Kapa Ngindrai kipa hiyan kiya aliy, ara andre tukoro palte manau.

4 Ingandrah iya kapa hu mepo hu kanwiri pwoke iyau kili Mwoiwan Haiyan, pe hu kanwiri yukyuk para kol paingan yang, pe hu kanime ngana Ngindrai, 5 pe hu kanhingorowe hiyan para nongna Ngindrai, pe hu kanhingorowe pwoke para lang mepo Ngindrai andre kirayah yapane hu melit, 6 pe kapa hu kaiki ndruwahu kiya kili Ngindrai, pe hu kamui kaya kultuw para karapaiwani ndriya ndramat paiwe, pwen kultuw para huyos ara, ara tehe hurapaingi Noru Ngindrai Kamai paiwe yi, pe huiki masirai iya kili yiy iya mbulmara hu yau.

7 Pwan ara mbulou ngara kindrut kiya aliy lang masih, pe yihu mepo hu ngara kapombulen kiya pwan ara, ara pwan ara ihingini hu mbuwakei mwayih, pe huwiri lomwes kili Ngindrai. 8 Hapeko pwan mepo ngara kihingini ndromndriu pe malkei maporon, ara pwan ara, kinna mwomwan, pe Ngindrai kiniten anan. Lang kamulan, mwan andre kitimwiy.

9 Pwen wawu kowase yowu, konan yowu wong tehen toro, hapeko melit mwayih wawu mbusiy, ara imbusi lohonga yowu ipwoke—Ngindrai andre kisopwat wawu kamui 10 Ngindrai ara hiyan para tamwanye, pe koyun ara kinmayit iya mbulya wawu pwi, pe namiliwai mepo wawu pwainganiy iya kili yiy, tehe wawu sopwat yowen hu, tehe lang masih wawu yera sopwat hu. 11 Pe yowu namili tehe wawu hamou-hamou, ara namiliwai pwokeyan tawawu ara kiro manau kipoo lang kiya hapwen, pe akapwotisingi lohonga wawu kiya melit itapo isa. 12 Mbuwali yowu para ndrina mere wawu kimat, hapeko akoho ndruwa hu mepo lohongahu ndrisiyon pe welehu kinho mai pwi, pe andre hu karayah mbukena tesah mepo Ngindrai kintandrangan kinna aliy.

13 Iro mwonen Ngindrai ipwatisingiy iya kili Apraham, ara hamou kinhohin kili yiy para kirandrangan pwokeyan iya kili yiy, ara pwi, pwen yiy mbukenan irandrangan pwokeyan iyatan mbukenan. 14 Yiy ipwai ipa, “Pe andre kutoholi wou ndrokonan, pe andre kumbusi ndrayem hu karayah soyon.” 15 Pe Apraham ara iye longe ndranga niwen iya, hapeko welen kinimai pwi, ipoo tesah Ngindrai irandrangan iya kili yiy, ara iwiriy.

16 Pwen hu ndramat, ara hu ngara karandrangan pwokeyan iya ngala hiyeh mepo ihohin kili hu, pe tesah hurandrangan pwokeyan iya aliy iya kili ndramat ihohin ara, ara nongan huro pepet iya aliy, andre nongan tandrangan pwokeyan ara, ara andre kiramate topwe nongan. 17 Pwen Ngindrai inamiliy para kimbusi namiliwan kisa yelan pe kirayah manan, pe andre kinrapaiwani lohongan pwi iya kili hu ndramat mepo kintandrangan kinna kili hu. Pwen tesah ipwai, ara irandrangan pwokeyan iya kili yiy mbukenan. 18 Ngindrai imbusiy toro, ara iho ndruwa melit malndra mepo kinho rapaiwani lohongan kinna aliy pwi, pe ingandrah iyatan para kipwasoyou. Pwen worou mepo tuwop tuya lohowa Ngindrai para tukawiri sopwat mepo lohongarou ipwotisingiy itapo isa, ara tukarahatinirou pwokeyan. 19 Pwen pe sopwat mepo lohongarou ipwotisingi itapo isa, ara kipwokeyani namiliwa rou, pe kirahatinirou, pe kirahakowarou. Pe namiliwarou pwokeyan ara, ara iya nondriya yumwa totohun pe iya ndruwa koyau, pe iya toton iya nondriya kaput haiyan. 20 Pe Yesu ara isopwatrou pe kinimu kiltou pe kinna nondriyan. Pe yiy ara kintayah pris ihohin mepo andre kinto-kinto, pe iho ndruwa kultuw tehe ta Melkisetek opu.