10
Kristus iyki yiy tehe Yukyuk porosih o
1 Pe nongan para pwahanou, ara sumwoiwa hu melit hiyan mepo itapo isa—pe andre kiniyki hu melit ndrokonan pwi. Paratesah, tunan aro ko, pwen kinlahiy para koro mbusi yukyuk ara ko hayou sih kiyau sih ken kiho ken, ara pwi. Pe hu mepo huya pakeh para katotohun, ara kinlahiy para kimbusi hu konto mwonen pwi yi. 2 Kapa hu kambusiy tehen tora, pwen andre hu kahatohai para hu koro yuk hu yukyuk. Paratesah, hu ndramat mepo ngara katotohun, ara andre hukarayah howen porosih o, pe andre hu kanhingorowe mwomwan kiya hu pakut mwomwan tahu pwi. 3 Hapeko hu yukyuk ara, ara ngara kimbusi hu koro lohongani hu pakut mwomwan tahu hayou sih iyau sih. 4 Pe ndreye hu mbulmwakau kamai pe ndreye hu meme, ara kinlahiy para kinrapiyani hu pakut mwomwan pwi.
5 Pwen iro mwonen Kristus isa kol pwan, ara ipwai iya kili Ngindrai toro:
“Hu yukyuk pe hu yukyuk para mwan kitimwiy masih, ara annamiliy pwi,
hapeko anmwaniyani nombuwe ndramat hamou tehe yukyuk kisa kili yo;
6 hu yukyuk para mwan kitimwiy pe hu yukyuk para kirapiyani pakut mwomwan, ara anpwes kinna aliy pwi.
7 Pwen upwai upa, ‘Yo aripo—pwayan kinpwai pwen isato ita puk maiye toro: Ngindrai to, yo usa ara para kumbusi namiliwam pwokeyan.’ ”
8 Mamu Kristus kinpa, konan iya hu yukyuk mepo mbusiy iho ndruwa nongan para pwahanou tehe kinpa konan iya aliy, “Hu yukyuk, hu hanghang, pe hu yukyuk para mwan kitimwiy masih, pe hu hanghang para kirapiyani pakut mwomwan, ara annamiliy pwi, pe hu kaniyki pwesai kinsa kili wou pwi.” 9 Pe ipwai ipa, “Yo aripo, usa para kumbusi namiliwam pwokeyan.” Pwen irapiyani hu yukyuk pe hu hanghang saken iyau pe Kristus mbukenan irayah yukyuk pe hanghang howen. 10 Pe iya namiliwai pwokeyan ara ko, turayah haiyan iya nombuwe Yesu Kristus mepo iyki yiy tehe yukyuk porosih o.
11 Lang sih iyau sih hu pris masih ngara hu koro tine pe hu kambusi mbulya hu tehe pris. Pe hu ngara kayuk hu yukyuk iyawule ko ken iho ken, mepo kinlahiy para kirapiyani hu pakut mwomwan pwi. 12 Pe iro mwonen Kristus iyki yiy tehe yukyuk sih mepo andre kinto-kinto para kirapiyani hu pakut mwomwan, pwen mahapo imira mipwan iyapwen te nima Ngindrai mot. 13 Pe tandrohonga lang ara isa, ara ita longe kipoo Ngindrai kimbusi hu ndramat para mwisnani yiy kaya pahandra pwelekan. 14 Paratesah, hu mepo imbusi hu hurayah haiyan pe imwonen masih, ara imbusi yukyuk sih opu, pe andre kinto-kinto.
15 Pe Mwoiwan Haiyan i itiyani titiye iye isa kiltou. Pe ipwai imu ipa Yapan ipa toro;
16 “Andre kumbusi tapaniu iye kiya kili hu kiro mwonen lang ara. Andre kuiki nongan para pwahanou to kiya ndriyahu,
pe kuratuluwiy kiya lohongahu.”
17 Pe iposura nongnan i, ipa:
“Hu pakut mwomwan tahu pe hu kultuw pwassin tahu, ara andre kunlohonganiy pwi yoh.”
18 Pe kapa Ngindrai kintali hu pakut mwomwan pwen, pwen kinlahiy para kambusi yukyuk paiwe, ara pwi.
Tukoro tine pwokeyan kiya lohongai ndrisiyon torou
19 Pwen tehen tora ko wawu nali pe wawu pisu, ndreye Yesu kinmbusirou tukanrahatinirou para tukasong kiya hape mepo Kol Haiyan Masih, 20 pe iyki sai howen isa kiltou pe iluwani worou iya taleh. Pe sai ara, ara itepei isa kiltou para tukaya pwen te koyau, pe koyau ara, ara tehe nombuwe Yesu mbukenan. 21 Pe worou ara ma pris torou hamou namandran pe ihohin masih, pe yiy ita nimnim iya suwe Ngindrai, 22 pwen tukaya pakeh kili Ngindrai kiyapolo ndriyai imwonen, pe kiyapolo lohongai ndrisiyon mepo pwokeyan. Pe ndriya worou kiro mwonen, pe lohongarou kiro mawen kultuw pwassin, pe tukanu kiya ndran lewen. 23 Pe tukapwotisingi lohongarou kiya melit mepo lohongarou ipwotisingiy itapo isa, pe tukawong kiya aliy, paratesah, yiy mepo kintandrangan, ara lohongan ndrisiyon pe andre kimbusiy. 24 Pe tukoro lohonganiy para kapwokeyani hamou-hamou kiya kultuw para namiliwai, pe para hukoro mbusi hu kultuw hiyan. 25 Pe mbuna tukaitohai kultuw para tukarawurerou, tehe yihu ndramat hayah ngara hu kambusiy, hapeko tukapwokeyani hamou-hamou tehen tora ko kiropo kiya—paratesah, Lenge Yesu para nakisa ara kinpakeh.
26 Pe kapa tukanpahas kinna nongan ndrokonan, pe tukoro waiyaniy para kambusi pakut mwomwan manau, pwen yukyuk para kiro ndron para kambusiy pe kirapiyani pakut mwomwan, ara pwi. 27 Hapeko hu mepo humwisnani Ngindrai, ara andre hukawiri korahu kiya mwan namandran masih pe andre pe andre kipwalnganihu pe andre hukaro pahandra nohowai namandran. 28 Pe sehe ndramat mepo indrihisani nongan para pwahanou ta Mose, ara titiye ta hilu ndramat malmou, ndre matimou imbusiy, pwen koyuhu kinsikirani yiy pwi, pe hutingundrun. 29 Pe kapa hamou kinngastoro kandrita Noru Ngindrai Kamai pe kinmbusi ndrai para tapaniu tehe haiyan pwi, ndrai mepo imbusi tou tuya howen, pe ipwasimiri Mwoiwan Haiyan mepo iyki pahas, pwen akalohonganiy tehe kora mwomwan namandran nakiwiriy, ara mwomwan masih, ndre pwi? 30 Paratesah, tupahasani Ngindrai kinpwai kinpa, “Andre kuiki kora mwomwan tahu; pe andre kuposoiwi mwomwan tahu yi,” pe paiwe yi, “Yapan andre kiyki ndramiran hu koro tine nongan.” 31 Pe kapa Ngindrai mwalen kimbultuwe tahatini wou, ara kahanohowai, andre awiri koran.
32 Pe akalohongani hu lang mamu hu kanna mepo wawu wiri ngana Ngindrai, pe wawuro tine pwokeyan tandrohonga wawuya nondriya hu nopwaran namandran pe wawu ramwaitinihu. 33 Lang hayah ara hu pwasimiri wawu iya ngawan iro mbulmarahu ndramat pe hu pwalngani wawu, pe hu lang hayah i, ara wawu sopwat nopwaran ta hu hayah mepo huya nondriya hu nopwaran. 34 Hu mepo huro nondriya nopwaran ara, ara tehe mepo huro nondriya kou. Pe wawu ro pwes pe wawu ropa hiyan o, iya hu menmena wawu iro mwonen hu ndramat husa po. Paratesah, wawu mbukenan wawu kanpahasaniy tehe hu menmena wawu mwayih, mepo andre kinto-kinto, ara hutora pwen.
35 Pe wawu mbuna akakose para akarahatini wawu. Pwen kene wawu namandran, ara andre akawiriy. 36 Wawu koro tine pwokeyan, pwen kiro mwonen akambusi namiliwai pwokeyan ta Ngindrai, pwen tesah mepo kintandrangan kinna aliy, ara andre akawiriy. 37 Paratesah,
“Ndrangan niwen pwi,
Yiy mepo nakisa, ara andre kisa,
pe kindrou pwi ko andre kisa.”
38 Pe
“hu ndramat to kultuwayihu imwonen, ara lohongahu ndrisiyon andre kimbusi hu koro mwalen.
Pe yiy mepo kises kimui,
ara andre Ngindrai kinpwes kinna tan pwi.”
39 Pe worou ara andre tukonto surahu mepo hutali lohongai ndrisiyon tahu pe Ngindrai andre kipwalnganihu, ara pwi, hapeko worou, ara para surahu mepo hupwotisingi lohongai ndrisiyon tahu, pe Ngindrai andre kisopwat tou.