1 Pe lohongai ndrisiyon ara imbusi worou pe lohonga rou ipwoke para kawiri melit mepo lohongarou ipwotisingiy itapo isa, pe imbusi worou tupahasaniy tehe tesah tukanimei pwi, ara ndrokonan. 2 Paratesah, hu tumburouhu, ara lohongai ndrisiyon tahu imbusiy, pe Ngindrai ara ipwes iyata hu.

3 Pe iyau lohongai ndrisiyon, pwen lohongarou ileu pe tuya pahasaniy tehe kol pwan masih, ara Ngindrai ipwandrandrahaniy pe irayah. Pwen tehen tora ko, melit turopo nimei, ara mangsaniy iyau melit konoho nimei pwi. 4 Pe iyau lohongai ndrisiyon ta Apel iyki yukyuk sih mwayih iya, iya kili Ngindrai, iramwaitiniy ta Kain mepo imbusiy. Pe iyau lohongai ndrisiyon tan i, Ngindrai ipa kultuwayin imwonen. Pe Ngindrai iwong mwanye iyata Apel pe irapasan tehe yukyuk tan hiyan. Pe iyau lohongai ndrisiyon ta Apel, konan kinmat, hapeko itawong manau.

5 Pe iyau lohongai ndrisiyon, pwen Ngindrai iwiri Enok mamwalen iya kol paingan yang, pe kinmat pwi. “Pe kinlahiy para kakahi yiy pwi, paratesah, Ngindrai kiniwiri yiy kinyau.” Paratesah, makinyau mapu Ngindrai ipwes iyatan, pe irapasan, pwen kinwiri yiy. 6 Pe kapa lohongai ndrisiyon pwi, ara kinlahiy para kimbusi Ngindrai kipwes, ara pwi. Paratesah, ndramat mepo nakisa kili Ngindrai, ara kipahasaniy tehe yiy ara mwalen, pe Ngindrai andre kiyki kene hu mepo huten yiy.

7 Pe iyau lohongai ndrisiyon, pwen Ngindrai ipwatisingi nongan iya kili Nowah iya hu melit mepo mapu kinnimei. Pe Nowah ihilingi Ngindrai pe iro nondriya nohowai haiyan, pe imbusi ndroi hakou namandran para kisopwat hu ndrai sih tan. Pe iyau lohongai ndrisiyon tan ipwainganiy tehe hu ndramat para kol pwan ara kultuwayi hu pwassin, pe iyau lohongai ndrisiyon tan i, Ngindrai ipohowe yiy tehe yiy mbukena kultuw imwonen.

8 Pe iyau lohongai ndrisiyon, pwen Ngindrai iyoh Apraham para kiya kol mepo kamulan andre kiwiriy kiya mbukenan yiy. Pe konan ikowu hape aleheh para kiya aliy, hapeko ihilingi nongna Ngindrai pe iya. 9 Pe iyau lohongai ndrisiyon, pwen Apraham imbusi kalsuwan, pe irayah tehe ndramat hamou mawen, pe ipuli yopeyen pe imin aliy iro pwan mepo Ngindrai kintandrangan kinna atan kinna aliy. Pe Ngindrai itandrangan tehen aliy o iya kili Yisak hilu Yakop pe hilrayah mbukena kol ara. 10 Paratesah, Apraham iro longani kol namandran mepo andre kinto-kinto, pe Ngindrai mbukenan andre kimu pe kirandroiyin, pe yiy mbukenan ara yiy ndramat para puliyan.

11 Pe iyau lohongai ndrisiyon, Sarah kinna pihi parangoloh pe lengen para kipo mbunah ara kinramwaitiniy, hapeko iyki lohongai ndrisiyon tan iya tesah Ngindrai itandrangan iya aliy, pwen iwenei para kipo mbunah. 12 Pwen iyau kili ndramat hamou opu Apraham, mepo pakeh nakimat, hapeko iyau kili yiy opu, irayah tumbuhu ndramat soyon mepo ndromwoyahu tehe hu piriy hora yang pe kalayeng para poholeng.

13 Hu ndramat masih kene aro, ara hurondron nondriya lohongai ndrisiyon tahu pe hu mat. Hu melit mepo Ngindrai kintandrangan kina aliy, ara hu kanwiriy pwi. Hu nime hu melit ara huho mwanan hape pe hu rawulohaniy, pe hupwai ngawan tehe yihu ara hu ndramat para mawen pe kol pwan ara kolo hu pwi. 14 Hu ndramat huwong toro, ara ipwainganiy tehe hutora nimnim iya kolo yihu mbukenan hakol namandran masih hirandron. 15 Pwen kapa hu koro lohongani kol namandran masih mepo hu kantaliy, ara hulahiy para hu kamui kaya aliy. 16 Hapeko hu lohonganiy para kaya kol namandran masih hakol mwayih—mepo kol hakol para kol paingan yang. Pwen tehen tora ko Ngindrai kinmasi para hu kayoh yiy tehe Ngindrai tahu, ara pwi, paratesah, kinmwaniyani kol namandran hakol tahu.

17 Pe iyau lohongai ndrisiyon, iro mwonen Ngindrai inohonou Apraham, para kiyki Yisak tehe yukyuk sih kiya kili yiy. Yiy mepo Ngindrai itandrangan iya kili yiy, ara pakiyki norun hamou opu mepo ndriyan imbuluhi yiy tehe yukyuk kiya kili Ngindrai. 18 Konan Ngindrai kinpwai kinna tan toro, “Ndrayem hu kamulan, ara andre yihu kayau kili Yisak.” 19 Paratesah, Apraham tanan tehe Ngindrai ilahiy para kihingini ndramat kitine kimat. Pwen iyau nongan ara ko iwiri Yisak imui isa mawen kimat.

20 Pe iyau lohongai ndrisiyon, Yisak itoholi Yakop hilu Esau iya lomwes ta hilu para lang mulan.

21 Pe iyau lohongai ndrisiyon, iro pakeh Yakop nakimat, pwen itoholi noru Yosep hilu kamai malmou, pe iroh iya ndrita nesen pe itotohun.

22 Pe iyau lohongai ndrisiyon, Yosep, lengen para nakimat kinsa pakeh, pwen ipwai tehe Ngindrai andre kiluwani hu Yisrayel kaya mawen Yisip, pe ipwatisingi nongan iya kili hu iya tesah para hu kambusiy kiya ndruwin.

23 Pe iyau lohongai ndrisiyon, Mose tinan imwalahiy iyatan, pe tinan hilu taman hilro kulani yiy ipoo walehen iya maroyoh, paratesah, yiy mbunah hamou lahayan. Pe hilu kanoh kinna pwandrendrehe ta king pwi.

24 Pe iyau lohongai ndrisiyon, iro mwonen Mose imandra irahatini yiy, pwen yiy mbuwalin para kayoh yiy ara tehe tinan ara noru king Paroh. 25 Yiy mbukenan inamiliy para kikuni nopwaran kiyapolo hu ndramira Ngindrai, pe mbuwalin para kiro nondriya pwesai para pakut mwomwan mepo andre kinto ndrangan niwen pwi. 26 Inimei tehe kapa kiwiri masirai kiya nondriya Kristus, ara hiyan pe iramwaitini hu melit hiyan pe lahayan para Yisip. Paratesah, ita nimnim iya kenen mepo itapo isa. 27 Pe iyau lohongai ndrisiyon, Mose itali Yisip, pe kinnoh kinna ndrinalokuh ta king, ara pwi. Pe iro tine pwokeyan, paratesah, inime Ngindrai mepo konho nime yiy pwi. 28 Pe iyau lohongai ndrisiyon, Mose ipwesani Pasopa pe itumwi ndreye hu kan iya hu ndruw para karam, pwen angelou mepo andre kipwalngani hu ndrohan kamai, ara andre kinitingundruhu ndrohan kamai para Yisrayel pwi.

29 Pe iyau lohongai ndrisiyon, yihu ndramira Yisrayel husingondriti Ndras Laman pwen tehe ngara hukoro rikai ndrita pwan posowen. Hapeko iro mwonen hu Yisip pakanohonou para koho ndruwahu, pwen humut ndran.

30 Pe iyau lohongai ndrisiyon, hu ndramira Yisrayel hurakaiyani Yeriko lang manandrtoyoh, pwen kowa Yeriko ara ilon iya pwan pe imaloiwe.

31 Pe iyau lohongai ndrisiyon, Rahap pihin para pilah, ara kindrihisani nongna Ngindrai pwi pe kinmat pwi, paratesah, irawulohani hilu ndramat malmou para tandrihindrih.

32 Pe andre kupa tesah i? Yo kunlahiy para kutiyani titiye ta Kitiyon, Parak, Samson hilu Yepta, pe titiye ta Tepit hilu Samuwel pe hu poropet, ara pwi, 33 yihu ara lohongahu ndrisiyon ara hupo pahun pe huramwaitini hu kolo hu king, pe hu ndramat huya mu poho tamwanye, pe huwiri tesah mepo Ngindrai itandrangan iya aliy, pe husiyi pohohu layon, 34 pe husumate pwoke para mwan namandran, pe huwop kili hu ndramat mepo hu pakatingundruhu kiya semela pahun. Pe pwoke kili hu pwi, hapeko hu pwokeyan iya, pe nondriya pahun, ara hurayah hu ndram pwokeyan iya, pe huramwaitini hu ndram para mawen. 35 Pe hu pihin hayah ara huiki lohongai ndrisiyon ta hu iya kili Ngindrai, pwen huwiri yowe hu imui isa tine kinmat paiwe yi. Pe hu ndramat hayah ara, ara mbuwali hu para hu kapa hu kowu ta Ngindrai, pwen hu ndramat hu ramate hu ipoo huya mat. Paratesah, huiki lohongahu iya melit itapo isa mepo andre kiyki taleh mwayih kiro mwonen Ngindrai kihingini hu ndramat kasa tine kimat. 36 Pe hayah tahu hupwasimirihu pe humwiriyanihu, pe huwasi hu malkei hayen, pe huiki hu iya nondriya kou. 37 Hayah tahu, ara hu ndramat hu solpwahu iya pat pe hu mat; pe hayah tahu sondritihu iya so iya malhin; pe hayah tahu hu tingundruhu iya semela pahun. Pe hayah tahu, ara husuluyehu iya kapilohu sipsip pe hu meme, pe hayah tahu ara hundroisiy pe tandroyani hu, pe hayah tahu, ara hu pwalnganihu. 38 Pe hu ndramat para kol pwan mepo hu kanpwotisingi lohongahu pwi, ara hu pakarawani hu ndramat mepo hupwotisingi lohongahu iya kili Ngindrai iro nondriya nopwaran, ara hu kanlahiy para koro kol pwan pwi. Pe hurakohoyou hu huya kol ndrohoyin, pe hu ngondron para hukoro ngara sou pe hu ngara pwan.

39 Hu ndramat masih aro, ara lohongai ndrisiyon tahu imbusi Ngindrai irapasa hu. Pe hu masih humat, pe hamou tahu kiniwiri tesah mepo Ngindrai itandrangan iya aliy, ara pwi. 40 Paratesah, Ngindrai kinmwaniyani melit mwayih torou ita pwen, pwen iyau kiltou opu, andre kimbusihu koro mwonen masih.