1 Wawu nali, wawu masih andre akantayah ndramat para hinuwani hu ndramat o, ara pwi, paratesah, wawu pahasaniy tehe worou mepo tuhinuwani hu ndramat, ara kiro mwonen tukoro tine nongan, andre tukakuni nopwaran kiho hin iya. 2 Worou masih ara tupotiriyis iya kultuwayi rou. Pe kapa hamou kinmbusi mwomwan kinna tesah ipwai pwi, ara yiy ndramat hamou ita mwonen masih, pe ilahiy kikaituwe nombuwen masih.

3 Pwen kapa tukaiki hu hayen kiya hu poho hu hos para tukambusi hu kahilingi rou, ara tulahiy para tukarapaiwani hos hamou mwanye ara. 4 Pe tukalohongani hu ndroi para ndras. Konan hu ara namandran masih pe hu nowei pwokeyan hu koro sumbuiwani hu, hapeko parakei hamwat mendreheh, ara ngara ndramat para ngaplani ndroi kiro suwani hu ndroi para hape aleheh hu kaya aliy. 5 Tehen tora ko, kalame ndramat ara melit sih mendreheh opu para nombuwe ndramat, hapeko yiy mbukenan ara ngara kisiye yiy iya. Akalohonganiy, yangiy sih namandran iya, ara mwan hape ko andre kitimwiy topwei. 6 Kalame ndramat ara tehe mwan sih i pe tehe kol pwan para kultuw mwomwan ita mwalinga hu nombuwe ndramat. Pe ngara kiyki mwomwan kiya nombuwe ndramat masih. Pe ngara kimbusi kultuwaye ndramat hamou kiya mwomwan tehe ngandraha mwan. Pe mwan ara mbukenan, ara mwan mepo para ngat mbulun pwi.

7 Hu kan handra-handra masih, hu norukan para wohowoh, hu kan para seselek, pe hu kan mwalen masih para ndras, ara hu lahiy para kassop mara hu, pe ndramat ngara kassop mara hu. 8 Hapeko ndramat hamou kinlahi para kissop kalamen pwi. Kalame ndramat ara kinho ngoh para kimbusi mwomwan pwi, pe tehe melit tunguyan ta mwat hamou ngara kitingundru hu ndramat, pwen tesah tupwai, ara ngara kiyki ngandran kiya kili hu ndramat.

9 Worou ngara kahari ngalan Yapan torou pe Tamarou kiya kalamerou, pe iyau kalamerou opu, ara tuten ana hu ndramat mepo Ngindrai imangsani hu mwensehu tehe yiy mbukenan. 10 Pe iyau poho ndramat ara ko, ngara kihari ngala Ngindrai, pe ngara kiten ana ndramat. Wawu nali, mbuna kirayah tehen tora. 11 Ilahiy para ndran nowin pe ndran ngahan kirah kiyau ndramwiying handrang o, ndre pwi? 12 Wawu nali, kei pik hakou ilahi kippwai pe mbuwan kiya hu holip, ndre mwisi wain ilahi kippwai pe mbuwan kiya hu pik, ndre pwi? Pwen kinlahiy para ndras hakah kirayah ndran nowin, ara pwi.

13 Hiyeh lohongan waison pe ileu ita mwalinga wawu? Kipwaingani lohonga waison tan ara pe kultuwayin hiyan ara, pe ara iyau kultuw para aiki wou aya pwan iyau lohongai waison. 14 Hapeko kapa akaituwe maimai pe mwolou kiro ndriya wawu, ara wawu mbuna akasikiye wawu, pe mbuna akapwasoyou kiya nongan ndrokonan. 15 “Lohongai waison” tora, ara kinyau kol paingan yang kisa pwan pwi, hapeko para kol pwan, lohongai para kol pwan pe ata sinai. 16 Paratesah, hu ndramat mepo ngara ndriyahu kimaimai pe kamwolou, ara andre anime tokuya ndramat ara kinto sai pwi, pe iyau kultuw masih handra-handra pwassin.

17 Hapeko lohongai waison mepo iyau kol paingan yang, ara ihomu pe imwonen masih; pe namiliwai para ndriya wayis, pe karo wayis o, pe kambusi worou koro pwan, pe kapep kiya koisirai pe kapwaingani tokuyai hiyan, pe kultuw kihisoule ko pe kiya ndrokonan. 18 Hu ndramat mepo ngara hu kambusi ndriya wayis, ara andre hu kahas ndriya wayis, pe andre hu kapo anandrinai para aliy ara kultuw imwonen.