1 Pe tesah ngara kimbusiy pe wawu ngara kahangas pe akarahatai mwalinga wawu? Hu hingorou mwomwan mepo hutora posisiwe nondriya wawu, ndre? 2 Wawu ngara kanamili melit hapeko wawu konoho wiriy pwi, pwen pe wawu tingundru hu ndramat. Wawu namili melit iro kili hu ndramat hayah, hapeko akanlahiy para akawiriy pwi. Pwen pe tehen tora ko, wawu ngara kahangas pe karahatai. Wawu konoho wiri pwi, ara paratesah, wawu konoho sok Ngindrai pwi. 3 Pe iro mwonen wawu sok, ara akanwiriy pwi, paratesah, wawu sok iyapolo lohongai mwomwan, pe tesah wawu wiriy pe wawu rasumbuwaniy, ara iya namiliwa wawu mbukenan.

4 Wawu ara tehe pihin para pilah, wawu pahasaniy tehe hu ndramat mepo ngara hu kambusi kultuw pwassin tehe hu ndramat para kol pwan ngara kambusiy, ara hu ndrihisani Ngindrai. Pwen sehe ndramat kimbusi hu kultuw para kol pwan, ara hu mwisnani Ngindrai. 5 Akalohongani tehe Ngindrai ipwai isa kiltou ita Nongan Haiyan tehe inamiliy masih para Mwoiwan Haiyan mepo iyki iripo kiltou, ara andre kisopwat rou para andre tukoro namili Ngindrai opu. 6 Hapeko Ngindrai ara iyki koisirai tan ara soyon iya isa kiltou. Tehen tora ko, Nongan Haiyan ipa,

7 Pwen pe akaiki wawu akaya pwan kili Ngindrai. Pe akarasses sinai, pe andre sinai kitali wawu. 8 Pe akasa pakeh kili Ngindrai, pe andre kisa pakeh kili wawu. Pe akasungani nima wawu, wawu hu ndramat mepo pakut ta wawu mwomwan, pe ndriya wawu kirayah howen, wawu mepo lohonga wawu malndra. 9 Ndriya wawu kiporu, pe akamangaliye, pe akarang memesun. Haisa wawu ara akarapaiwaniy kiya mangaliye, pe pwesai kirayah ndriya poru. 10 Pe akaiki wawu akaya pwan mbulmara Yapan, pe andre kisoli wawu.

11 Wawu nali, hamou mbuna kiwong nongan mwomwan ana hamou. Sehe ndramat kiwong mwomwan ana nalin hamou ara indrihisani nongan para pwahanou, pe imbusiy iya mwaihei o. Kapa awong mwomwan kiya nongan para pwahanou, ara anto ndruwan pwi, hapeko arayah tehe ndramat hamou para tamwanye. 12 Ngindrai hamou opu ara ngara kiyki nongan para pwahanou, pe Yiy ndramat para tamwanye, yiy mepo ilahiy para kisopwat pe ilahiy para kipwalngani ndramat. Pe wou ara hiyeh, pwen apa rasusut nongan kiya kili ndramat para pakeh kili wou?

13 Pwen mahapo akahilingiy na, wawu mepo wawu pa, “Nepo ndre moh, ara andre yowu kaya kol namandran iye ndre yoro, pe hayou sih andre yowu koro ara, pe kapo melit para sousou pe kapo singayai.” 14 Wawu kanpahasani tesah nakirayah moh pwi. Pe mwoiwa wawu tesah? Wawu ara tehe koh isarayah o pe ihipwen i. 15 Hapeko, hiyan para akapa, “Kapa kiya namiliwai pwokeyan Yapan, ara andre yowu kamin pe kambusi melit iye ndre yoro.” 16 Wawu pwes pe wawu sap ngala wawu tehen tora, pwen sapiya ngala wawu, ara kultuw mwomwan masih. 17 Pwen kapa sehe ndramat mepo ipahasaniy para kimbusi melit hiyan pe kinmbusiy pwi, ara imbusi pakut mwomwan.