1 Wawu mepo menmena wawu soyon, ara akahilingiy na, akarang pe akamangaliye kiya hu nopwaran mepo itapo isa kili wawu. 2 Menmena wawu soyon ara, ara hu kanpwala, pe hu yih kanini hu koiwe wawu. 3 Pat kolt pe pat siliwa ta wawu, ara andre hu karapen. Pe andre hu koro tapen pe kirehe mwomwan ta wawu pe kitimwi nombuwe wawu tehe mwan. Pe hu menmena wawu mepo wawu lokuhuyanihu, ara andre kiyki wawu koro tine nongan kiro mwonen lang kiya hapwen. 4 Akanimei! Hu kene hu ndramat mepo hu pombulen iya hu pinge wawu, ara akansowani hu pwi, pwen ita rang iya kili Ngindrai, para Ngindrai kiyki kora wawu kisa kili wawu. Ndringe hu ndramat para poya anandrinai iman, ara kinna rayah kinna ndrainga Yapan Pwokeyan masih. 5 Mipwan ta wawu iripo kol pwan ara wawu ro ndrita melit lahayahu ko, pe wawu kansongsin kinna melit lahaya huya ara. Hapeko mahapo wawu kanmandra turuwe wawu pe lang para katingundru wawu kinsa. 6 Wawu rasusut nongan iya kili hu ndramat, pe wawu tingundru hu ndramat mepo hu kanmbusi mwomwan pwi, hu ndramat mepo hu kantakekei polo wawu pwi.

7 Pwen tora ko wawu nali, akoro tine pwokeyan pe akoro longe kipoo Yapan kimui kisa. Akanime hu ndramat para hasiya anandrinai ngara hu koro longe pingehu kisiy, pe kiyki anandrinai mwayih. Pe hupwokeyani lohongahu ipoo mbulou indrut pe mwandrai ising. 8 Wawu yi, ara akoro pwokeyani lohonga wawu pe akarahatini wawu, paratesah, lenge Yapan, ara kinsa pakeh. 9 Wawu nali, wawu mbuna akakokou ana hamou-hamou ta wawu, matisan akoro tine nongan. Ndramira Tamwanye, ara ita tine papai!

10 Wawu nali, pwen tehe hu poropet mepo hu wong iya ngala Yapan, ara huro pwokeyani lohongahu nondriya nopwaran. Pwen wawu yi, ara akoho ndruwa kultuw ara. 11 Pe worou kapwes pe kahaiyani hu mepo huro tine pwokeyan iro mwonen huya nondriya nopwaran. Paratesah, tupahasani titiye ta Yop mepo ngara kipwokeyani yiy. Yapan ara ipep namiliwai pe koisirai.

12 Hapeko wawu nali, namandran para aliy, ara wawu mbuna akarandranga kol paingan yang ndre akarandranga kol pwan, ndre kiya handra melit. Waison o, akapa, “Ehe” ara ehe, pe “Pwi” ara pwi, matisan Nginarai kiyki wawu koro tine nongan.

13 Hamou ta wawu matisan ita nondriya nopwaran, ndre pwi? Pwen kitohun. Pe hamou ta wawu ita pwes, ndre pwi? Pwen kipowaliy pe kihari ngala Ngindrai. 14 Pe hamou ta wawu matisan kimwa, ndre pwi? Pwen kipwanos hu pohon para noku mbultere para hu katohun kiya ndritan, pe katumwi ndraikei kiya kili yiy kiya ngala Yapan. 15 Pe katohun kiya kili Yapan kiya polo lohongai ndrisiyon, ara andre kirapiyani mwamwa ta ndramat, pe Yapan andre kisoli yiy kitine. Pe kapa kinmbusi pakut mwomwan, ara Ngindrai andre kitali pakut mwomwan tan. 16 Pwen pe tora ko wawu kapohopoh kiya hu pakut mwomwan ta wawu kiya kili wawu hamou-hamou, pe akatohun kata hamou-hamou, pwen andre Ngindrai kisopwoyani wawu. Totohun ta ndramat imwonen, ara pwokeyan iya pe ilahi kisopwat ndramat.

17 Eliyah, ara ndramat hamou tehe worou o. Hapeko itohun pwokeyan iya tehe mbulou mbuna kindrut, pe mbulou kinndrut kol pwan pwi, ipoo iya hayou toyoh pe sahin. 18 Pe itohun paiwe yi pe mbulou indrut kol paingan yang, pe hu anandrinai para pwan, ara huiki sangihu.

19 Wawu nali, kapa hamou ta wawu kitali nongan ndrokonan, pwen hamou kiwiri yiy kimui, 20 ara akalohongani nongan aro: Sehe ndramat kimbusi ndramat hamou kitali pakut mwomwan tan, ara andre kisopwat ndramat ara kisa mawen kimat, pe Ngindrai andre kitali pakut mwomwan tan soyon mepo ita kili yiy.