1 Pe Yesu iro tokai iropo iya pe inime ndramat hamou maran iyoh tandrohonga tinan imwalahiy iyatan. 2 Pwen ndramiran hu husok yiy hupa, “Ndramat para hinonou, hiyeh imbusi pakut mwomwan, ndramat iye mbukenan, ndre tinan hilu taman, pwen pe imbusiy pe maran iyoh tandrohonga tinan imwalahiy iyatan?”

3 Pe Yesu ipa, “Pakut mwomwan ta tinan hilu taman pwi, hapeko melit aro irayah para kipwaingani mbulya Ngindrai andre kirayah kiya ngawan kiro kili yiy. 4 Ma lang iripo ndron, pwen tukambusi mbulya Ngindrai mepo ipwandrisa yo. Ping itapo isa, pwen kinlahi hamou kipo mbulen pwi. 5 Ma urupo ndron kol pwan, pwen yo ara ngana kol pwan.”

6 Ipa toro ihipwen, pwen isokombunuh iya pwan, pe ipisa pwipwiy hapwah iya sokombunuhan, pwen isopwiy iya mara ndramat ara. 7 Pwen ipwai iya kili yiy ipa, “Ayau, pe aya nu aya Yep para Silowam.” (Ndroiyi nongan ara, ara ipa, Pwandres) Pe ndramat ara iyau pe iya nu pe imui isa wum, ara maran kinileu.

8 Pwen hu ndramat para kolon hunime yiy ngara kiro sosoying, pwen hupa, “Iye ndramat ara ko mepo ngara kiro mipwan pe kiro sosoying ara, ndre?” 9 Pwen hayah tahu husomwiy tehe ara yiy, pe hayah ara hupa, “Pwi, mwensen ara tehe yiy o.” Pwen yiy mbukenan ipwai ipa, “Yo ndramat ara ko.”

10 Pwen hu pwai iya kili yiy hupa, “Tehen tapeh pe maram kinileu?”

11 Pe isomwiy ipa, “Ndramat mepo hu pohowe ngalan Yesu, ara iwiri pwipwiy hapwah pe isopwiy iya moro. Pwen ipwai sato para kuya Ndrikou Silowam para kuya nu, pe uya nu, pwen mahapo moro kinileu iye.”

12 Pwen husok yiy hupa, “Ndramat ara aleheh?” Pe ipa, “Tono pwi.”

13 Pe huwiri ndramat mepo tinan imwalahiy iyatan pe maran iyoh ara, iya kili hu Parisiy. 14 Pe Yesu isopwi mara ndramat ara ileu iya pwipwiy, ara iro mwonen lang Sapat. 15 Pwen hu Parisiy husok yiy tehen tapeh ndrokonan pe maran ileu. Pwen ndramat ara isomwi hu ipa, “Iyki pwipwiy iya moro pe unu, pwen mahapo kunnimnim.”

16 Pwen hu Parisiy hayah hupa, “Ndramat aro kinyau kili Ngindrai pwi, paratesah, kinhaiyani lang Sapat pwi.” Hapeko hayah tahu husok hupa, “Kinlahi ndramat hamou pakut tan mwomwan kimbusi hu ndraikiya kaipisa pwoke toro pwi. Pwen hu masilpat.”

17 Pwen hupwai paiwe iya kili ndramat mepo mamu maran iyoh, ara hupa, “Wou andre apa tesah kiya kili ndramat ara? Yiy kinmbusi maram kinileu ara.” Pe ndramat ara ipa, “Yiy ara poropet hamou.”

18 Yihu para Yutah, ara hu kanpwotisingi lohongahu pwi, tehe yiy, ara maran iyoh pe kinnimnim paiwe ipoo hupwanos nongan iya kili taman hilu tinan. 19 Pwen pe hu soksok hilu hupa, “Iye noru walu? Pe tandrohonga tinan imwalahiy iyatan, ara maran kinyoh iro, ndre? Pe tehen tapeh pe mahapo kinimnim paiwe?”

20 Pwen tinan hilu taman hilsomwiy hilpa, “Youlu pahasani tehe yiy ara noru youlu. Pe youlu pahasaniy tehe tandrohonga tinan imwalahiy iyatan, ara maran kinyoh pwen iro. 21 Hapeko mahapo maran isa leu tapeh, pe hiyeh imbusi maran ileu, ara tana youlu pwi. Akasok yiy. Yiy kinna namandran pwen, andre yiy mbukenan kiwong.” 22 Taman hilu tinan ara hilupa tehen toro, paratesah, hilnoh ta hu pohon tahu Yutah. Yihu pohon ta hu para Yutah, ara hu kanmburi lohongai tehe kapa hiyeh kipohowe Yesu ara Messayah kiro ngawan mbulmara hu ndramat, pwen andre kaiki songot katan para mbuna kiya tohun kiya yumwa mbultere tahu Yuta. 23 Tunan ara ko, pwen taman hilu tinan hilpa, “Yiy kinna namandran, akasok yiy.”

24 Pwen maporolusap i hu pwanos ndramat maran iyoh ara iya pe hupa, “Ahari ngala Ngindrai pe apwai ndrokonan. Yowu pahasaniy tehe ndramat ara, pakut tan mwomwan.”

25 Pwen isomwiy ipa, “Pakut tan mwomwan ndre pwi, ara tono pwi. Melit handra ko upahasaniy, ara moro iyoh, hapeko mahapo kunnimnim.”

26 Pe husok yiy hupa, “Imbusi tapeh isatam? Pe imbusi maram isa leu tapeh?”

27 Pwen ipwai iya kili hu ipa “Yo kunpwai pwen kinsa kili wawu, hapeko wawu ara kanhilingi yo pwi. Paratapeh pe wawu pakahilingiy paiwe yi? Wawu nakasarayah ndramiran i?”

28 Pwen hu Parisiy, ara hu pwasimiri yiy hupa, “Wou opu ara wou ndramiran! Pe yowu ara yowu ndramira Mose! 29 Yowu pahasaniy tehe Ngindrai, ara iwong iya kili Mose, hapeko ndramat aro, ara yowu kowu, yiy iyau aleheh ndrokonan pe isa.”

30 Ndramat ara isomwi hu ipa, “Wawu tora wong ara handra masih! Wawu kanpahasani hape aleheh iro aliy isa pwi, hapeko yiy kinmbusi moro kinileu. 31 Yowu pahasaniy tehe Ngindrai kinho hilingi hu ndramat pakut tahu mwomwan, ara pwi, hapeko ngara kihilingi hu mepo hu ngara katotohun kiya kili Ngindrai, pe huho ndruwa namiliwan pwokeyan. 32 Pe iro koluw, ipoo isa matnen mahapo, ara kanhilingi hamou ngara kimbusi ndramat hamou maran iyoh tandrohonga tinan imwalahiy iyatan kisa leu, ara pwi. 33 Pe kapa ndramat aro kinyau kili Ngindrai pwi, pwen kinlahiy para kimbusi handra melit pwi yoh.”

34 Pwen hu paresi, huhulingi nongnan pe hupa, “Wou ara tinam imwalahiy isatam iyapolo pakut mwomwan ita pwen; paratapeh pe apa hinuwani yowu!” Pwen hu rasse yiy iyau.

35 Pe Yesu ihilong tehe hu rasse ndramat ara iya ngawan, pwen iya kahi yiy pe ipwai iya kili yiy ipa, “Wou apwotisingi lohongam iya kili Noru Ndramat, ndre pwi?”

36 Pe ndramat ara isok ipa, “Namandran, Noru Ndramat ara, ara hiyeh? Apwai sato, pwen andre kupwotisingi lohongo kiya kili yiy.”

37 Pwen Yesu ipa, “Wou annime yiy mahapo, pe yiy, ara yiy mepo iripo wong isapolo wou.”

38 Pwen ndramat ara ipa, “Yapan, upwotisingi lohongo, pwen itotohun iya kili Yesu.”

39 Pe Yesu ipa, “Usa kol pwan ara para Ngindrai kiramwanyani hu ndramat para kol pwan. Pwen ndramat mepo maran iyoh, ara andre kinimnim, pe hu ndramat mepo ngara hu kanimnim, ara andre mara hu kiyoh.”

40 Pwen hu Parisiy hayah huro sura yiy ara huhulingi yiy pe husok yiy hupa, “Tesah? Yowu mara yowu iyoh i?”

41 Pe Yesu ipwai iya kili hu ipa, “Kapa mara wawu kiyoh, pwen pakut mwomwan andre kinto kili wawu pwi, hapeko mahapo wawu pa mara wawu ileu, pwen mwomwan tawawu itandron kili wawu.”