1 Pwen Yesu iya Ngondron para hu Holip. 2 Pe makohun opu iya nondriya kowa yumwa totohun namandran paiwe, pe hu ndramat soyon iya husa wule pe hurahakowan, pwen impwan para kihinuwani hu. 3 Pwen hu ndramat ngara kahinuwani nongan para pwahanou, pe hu Parisiy, ara hu wiri pihin hamou para pilah iya iro tine mbulmara hu ndramat. 4 Pe hupwai iya kili Yesu hupa, “Ndramat para hinonou, pihin iye hukahi yiy imbusi kultuw para pilah. 5 Pe ita nondriya Nongan para Pwahanou, ara Mose kinpwandrandrahani rou tehe, kapa hu pihin hu kambusi kultuw para pilah tehen toro, ara andre kasolpwa hu kiya pat. Pe wou andre apa tesah kaliy?” 6 Hupa toro para hupa kapakarawani yiy, pwen andre hu kaiki yiy kiya nongan. Hapeko Yesu itukuruhu iya pwan pe iro ratuluwi nongan iya pwan iya kopwo niman.

7 Pe huro wayani yiy iya soksok manau, pwen itandras pe ipwai iya kili hu ipa, “Kapa hamou tawawu pakut mwomwan kinto kili yiy pwi, pwen yiy kimu pe kisolpwa pihin ara kiya pat sih.” 8 Pwen itukuruhu iya pwan paiwe, pe iro ratuluwi nongan iya ndrita pwan.

9 Iro mwonen hu hilingiy toro, pwen huro tan hamou-hamou, hu parangoloh, ara hutan imu. Pe Yesu kopu ara iro, iyapolo pihin ara iro tine manau. 10 Pwen Yesu itandras pe ipa, “Nam, hu ndramat masih aleheh? Hamou kinto para kiyki koram pwi, ndre?”

11 Pwen pihin ara ipa, “Namandran! Hamou kinto pwi.” Pe Yesu ipa, “Yo andre kuniyki wou kinna nongan pwi yi. Aya pe mbuna ambusi pakut mwomwan paiwe yi.”

12 Yesu iwong paiwe iya kili hu ndramat i, ipa, “Yo ara ngana hu ndramat kol pwan. Pe sehe ndramat kiro ndruwo, ara andre kinrikai lokuhan pwi, hapeko ngana taleh andre kiro kili yiy.”

13 Pwen hu Parisiy hu hilingiy pe hupwai hupa, “Wou ara ata tiyani titiye tam mbukenam. Titiye tam, ara andre kinluwi lohongahu ndramat pwi.”

14 Pwen Yesu isomwi hu ipa, “Konan kutiyani titiye to mbukeno, titiye to ara iluwi lohongahu ndramat, paratesah, upahasani hape aleheh uyau aliy, pe hape aleheh andre kumui kuya aliy. Hapeko wawu, ara wawu kowu hape aleheh uyau aliy usa ndre hape aleheh nakuya aliy. 15 Wawu ramwanye hu ndramat ara iya lohonga ndramat, hapeko yo kunhoiki kora kultuw mwomwan kinna kili hamou pwi. 16 Pe kapa kuiki ndramat kiya nongan, pwen lohongai andre kuikiy ara imwonen, paratesah, yo kunho mbusi melit kinna lohongo ko pwi. Tomo mepo ipwandrisa yo, ara iripo ramwanye sura yo. 17 Pe pwayan kintatuluwi pwen ita Nongan para Pwahanou tawawu, ara ipa, titiye tahilu ndramat malmou kiya wule handra ko, ara ndrokonan. 18 Pe yo ara utiyani titiye to, kultuwayi pe mbulyo mbukeno, pe Tomo mepo ipwandrisa yo, ara iripo pwokeyani titiye to.”

19 Pwen husok yiy hupa, “Pe Tamam ita aleheh?” Pe Yesu isomwi hu ipa, “Tana wawu ta Tomo ndre yo, ara pwi. Kapa akapahasani yo, pwen andre akapahasani Tomo yi.”

20 Pe nongan aro, ara iwong iro mwonen iro hinuwani hu ndramat huro yumwa totohun namandran pakeh kili hape aleheh hu ngara kaiki yukyuk kiya aliy. Hapeko hu kanmbultuwe tahatini yiy pwi, paratesah, lengen ara kinsa mapu.

21 Pwen Yesu iwong porosih i iya kili hu ipa, “Yo nakuyau, pe andre wawu katen yo, pe andre wawu kamat kiya pakut mwomwan ta wawu. Pe hape aleheh nakuya aliy, ara andre wawu kansa aliy pwi.”

22 Pwen nongnan, ara imbusi hu pohon para Yutah hu soksok hupa, “Andre yiy mbukenan kitingundrun? Paratapeh ita pwai ipa, ‘Hape aleheh nakuya aliy, ara andre wawu kansa aliy pwi’?”

23 Pwen ipo sura nongnan ipa, “Wawu ara para pwan, pe yo ara para paingan. Pe wawu ara para kol pwan, pe yo, ara para kol pwan iye pwi. 24 Pe kunpwai kinsa kili wawu tehe andre wawu kamat kiya hu pakut mwomwan ta wawu; kapa akahambuwali wawu pe akanpwotisingi lohonga wawu tehe Yo, ara Yiy pwi,*Ita Rakuhuye 3:14, Ngindrai iwong iyasura Mose, pe ipohowe ngalan mbukenan toro, “Yo mbukeno uropo toro.” Pe mahapo Yesu iho ndruwa kultuw ara pe ipohowe yiy tehen aliy. Hapeko hu ndramat hu kowu iya nongan mepo ipwai. Kanime Yohanes 6:20, pe 8:28, pe 8:58, pe 13:19 pwen andre akamat kiya hu pakut mwomwan tawawu.”

25 Pwen husok hupa, “Pe wou hiyeh?” Pe Yesu isomwi hu ipa, “Yo ara yiy mepo kunpwai pwen kinsa kili wawu.

26 Pe nongan hitun iripo kili yo para kuramwanye hu kultuwayi wawu. Pe yiy mepo ipwandrisa yo, ara nongnan ndrokonan. Pe tesah uhulingiy kili yiy, ara nongan ara ko, andre kupwai kiya kili hu ndramat para kol pwan.”

27 Pe lohongahu kinileu pwi tehe iro wong iya kili hu, ara iro tiyani Taman. 28 Pwen Yesu ipwai iya kili hu ipa, “Kapa wawu kahari ngala Noru Ndramat, pwen andre wawu kapahasaniy tehe Yo, ara Yiy ara, pe andre kunmbusi melit kinna lohongo ko mwaihei o pwi, hapeko upohowe tesah Tomo kinhinuwani yo kinna aliy. 29 Pe yiy mepo ipwandrisa yo usa, ara iripo sura yo, pe kintali yo para yo ko kuro, ara pwi. Paratesah, hu melit ngara kuro mbusiy, ara ngara kipwesani yiy.” 30 Pe iro mwonen iropa hu melit aro, ara hu soyon iya huiki lohongahu ndrisiyon iya kili yiy.

31 Pe Yesu ipwai iya kili hu ndramira Yutah mepo hu pwotisingi lohongahu iya kili yiy, ara ipa, “Kapa wawu kapwotisingi hinonou to, pwen wawu, ara ndramiro imwonen. 32 Pwen andre wawu kapahasani nongan ndrokonan, pe nongan ndrokonan andre kimbusi wawu koro mwoimwoi.”

33 Pwen hu somwi yiy hupa,†Matyu 3:9, pe Luke 3:8 “Yowu ara ndraye Apraham, pe yowu konto pwandrendres ta ndramat hamou pwi. Pe para tapeh pe apa andre yowu koro mwoimwoi?”

34 Pe Yesu isomwi hu ipa, “Upwai ndrokonan isa kili wawu, hu masih mepo hu mbusi hu pakut mwomwan, ara hu pwandrendres o mwaihei para pakut mwomwan. 35 Pwen ndramat para pwandrendres o mwaihei, ara kinho kuw kintopolo hu ndrai sih atan pwi, hapeko norun kamai andre kikuw kinto-kinto. 36 Pwen pe kapa Noru Ndramat kimbusi wawu koro mwoimwoi, ara andre akoro mwoimwoi ndrokonan. 37 Upahasaniy tehe wawu, ara ndraye Apraham, hapeko wawu tora nohonou para nakatingundru, paratesah, ndrohonoku nongno kinto ndriya wawu pwi. 38 Yo urupo pohowe nongan iya hu melit mepo Tomo kinpwainganiy kinsa kili yo, pe wawu ngara kambusi hu melit wawu hilingiy iyau kili hu tama wawu.”‡Hu ndramat hayah hupahas iya lohongai, ara hupa andre nongan iye, ara tukarapaiwaniy toro, “Wawu kambusi hu melit Tama wawu ipwai para wawu kambusiy”

39 Pe husomwi yiy hupa, “Apraham ara tama yowu.” Pwen Yesu ipa, “Kapa wawu ndraye Apraham, pwen andre akoro mbusi hu melit Apraham ngara kimbusiy.

40 Yo ara upohowe nongan masih ndrokonan uhulingiy iyau kili Ngindrai, pe mahapo wawu toraten sai para akatingundru. Pe kultuw ara, ara Apraham kinho mbusiy pwi. 41 Wawu tora mbusi hu melit tora, ara ndriina tama wawu mbukenan.” Pwen hupwai iya kili yiy hupa, “Yowu ara mbunah para payango sai pwi, yowu ara noru Ngindrai, pe yiy opu ara Tama yowu.”

42 Pwen Yesu ipwai iya kili hu ipa, “Kapa Ngindrai ara Tama wawu, pwen wawu andre kanamili yo, paratesah, uyau kili Ngindrai pe mahapo usa urupo iye. Pe yo mbukeno kunsa pwi, hapeko yiy ipwandrisa yo usa. 43 Paratapeh pe nongno ara kinileu kinsa kili wawu pwi? Paratesah, akanlahiy para akahalingi tesah urupo pwai pwi. 44 Pwen wawu tama wawu ara sinai, pe wawu namiliy para wawu kambusi tesah tama wawu inamiliy para akambusiy. Pe koluw mamu kinna, yiy ara ndramat para tingundru hu ndramat, pe kinpwotisingi nongan ndrokonan pwi, pe nongan ndrokonan kinto kili yiy pwi yi. Nakiwong, ara nongnan pwasoyou o, paratesah, yiy ndrokotina pwasoyou. 45 Hapeko yo urupo wong nongan ndrokonan, pe wawu ara kanpwotisingi lohonga wawu kinsa kili yo pwi. 46 Ilahiy para hamou kipwainganiy tehe pakut to ara mwomwan? Pwen kapa urupo wong ndrokonan, paratapeh pe akanpwotisingi lohonga wawu kinsa kili yo pwi? 47 Pe hu mepo hu ata Ngindrai, ara huhulingi tesah Ngindrai ngara kipwai. Wawu ara noru Ngindrai pwi, pwen pe wawu konho hilingi nongnan pwi.”

48 Pwen hu pohon para Yutah husomwi yiy hupa, “Yowu pwai imwonen tehe wou ara ndramira Samariya, pe payit ara ita ndritam, ndre?”

49 Pe Yesu ipa, “Payit kinto ndrito pwi, hapeko yo uhuri ngala Tomo, hapeko wawu kanhari ngolo pwi. 50 Pe kunpombulen para kusikiye yo mbukeno, ara pwi, hapeko Ngindrai ita ngara kihari ngolo, pe yiy ara hamou para tamwanye. 51 Pe upwai ndrokonan isa kili wawu, tehe yiy mepo ipwotisingi nongno, ara andre kinnime kimat pwi.”

52 Pwen hu Yutah hupwai iya kili Yesu hupa, “Mahapo yowu pahasaniy tehe payit, ara ita ndritam. Apraham ara kinmat, pe hu poropet ara hu kanmat i, hapeko apa kapa ndramat hamou kipwotisingi nongnam, ara andre kinnime kimat pwi. 53 Wou ahohin iya iyata tama yowu Apraham, ndre? Yiy kinmat, pe hu poropet tehen aliy yi. Pwen wou apa ndre wou hiyeh?”

54 Pwen Yesu isomwi hu ipa, “Kapa yo mbukeno kuhari ngolo, pwen urupo hari ngolo ko mwaihei, hapeko Tomo mepo wawu pa yiy Ngindrai tawawu, ara yiy mepo ngara kihari ngolo. 55 Pe konan tana wawu tan pwi, hapeko yo, ara tono tan. Pe kapa kupa ukowu tan, pwen andre kurayah ndramat para pwandrandraman tehe wawu ko. Hapeko upahasani yiy, pe kuho ndruwa nongnan. 56 Pe tumbu wawu Apraham, ara ipwes tehe andre kinime lenge; pwen inimei pe ipwes.” 57 Hu Yutah hupwai iya kili yiy hupa, “Wou hayou tam kinna mayimingui mapu, pe annime Apraham pwen, ndre?”

58 Pe Yesu isomwi hu ipa, “Upwai ndrokonan isa kili wawu, tehe Apraham tinan mapu kinmwalahiy kinnatan, Yo ara kundrum pwen uro.” 59 Pe iro mwonen ipa toro: Pwen hu wiri hu pat para hu kasolpwa yiy, hapeko Yesu ikohon pe imandrihise iya mawen kowa yumwa totohun namandran.