1 Lang namandran para Yon para Pasopa ara kintayah mapu, hapeko Yesu ara ipahasaniy tehe lengen para kitali kol pwan pe kiya kili Taman, ara kinsa. Pe ndriyan ara imbuluhi ndramiran hu mbukenan hutopo kol pwan, pwen ipwainganiy tehe ndriyan masih, ara imbuluhi hu ipoo iya matne kimat tan.

2 Pe iho nondriya anandrinai para piyahon, pwen huro namnam, pe Sinai, ara kinpakarawani Simon Yiskariyot, mepo noru Yutas, para kiratuni Yesu. 3 Pe Yesu, ara kinpahasaniy tehe Taman kiniyki melit masih ita pahandra pwoke tan, pe yiy iyau kili Ngindrai, pe andre kimui kiya kili Ngindrai. 4 Pwen pe itine iho nondriya anandrinai, pe itali ndrohan iro kili yiy, pe iwasi koyau hamou para kuweya ndramat iya ndrokolon. 5 Pe iya mulan itilingi ndran iya nondriya pwelekei sih, pe iro sungani ndrika ndramiran hu iya aliy, pe ikuwe ndrikahu iya koyau para kuweya ndramat mepo iwasiy iho ndrokolon ara.

6 Pwen isa kili Simon Pita pe Simon Pita ipwai iya kili yiy ipa, “Yapan, wou nasungani ndriko ko, ndre?”

7 Pe Yesu isomwi yiy ipa, “Tesah urupo mbusiy mahapo, ara anyirowei mapu, hapeko kamulan andre lohongam kileu kiya aliy.”

8 Hapeko Pita ipa, “Konan, mbuna asungani ndriko ko.” Pe Yesu isomwi yiy ipa, “Kapa kunsungani wou pwi, pwen andre anlahiy para aro sura yo pwi.”

9 Pwen Simon Pita ipa, “Yapan, kapa tehen tora, pwen mbuna asungani ndriko ko, hapeko nimo malkip pe poyo yi.”

10 Pwen Yesu isomwi yiy ipa, “Ndramat mepo kinnu pwen, ara kinlahi kinu mahamou pwi, paratesah, kinna howen pwen, pwen andre kasungani ndrikan opu. Pe wawu, ara akantayah howen pwen, hapeko kunpa wawu masih pwi.” 11 Paratesah, Yesu kinpahasaniy pwen hiyeh andre kiratuni yiy, pwen tehen tora ko, pe ipa wawu masih ara kanna howen mapu.

12 Pwen isungani ndrika hu ihipwen, isuluye yiy iya koyau tan paiwe, pe imui iya nokun. Pe isok hu ipa, “Lohonga wawu ileu iya tesah kunmbusiy kinsa kili wawu, ndre pwi? 13 Wawu pohowe yo ‘Yapan’ pe ‘Ndramat para Hinonou,’ ara imwonen, paratesah, yo, ara tesah akanpwai. 14 Pwen yo mepo Yapan, pe ndramat para hinuwani wawu, ara mahapo kunsungani ndrika wawu, pwen wawu yi, ara akasungani ndrika wawu hamou-hamou tehen aliy i. 15 Yo kunyingani kultuw iye kinsa kili wawu, pwen wawu yi, ara akambusiy tehen aliy i. 16 Pe upwai ndrokonan isa kili wawu, tehe ndramat para poya mbulen, ara kinhohin kinna ata namandran tan pwi. Pe ndramat para sapiya nongan, ara kinhohin kinna ata ndramat mepo ipwandrisa yiy pwi. 17 Pwen mahapo akanpahasani hu melit aro kene, kapa akambusi hu melit masih aro, pwen andreNgindrai kitoholi wawu.

18 Pe kunpa wawu masih pwi, yo upahasani hu mepo kuntakinima hu. Hapeko iye, ara para kimbusi nongan haiyan kinpwai kisa manan: ‘Ndramat mepo iyan ndrinanohun iya sura yo, ara isoli mbutikan para kimbutiykai kisa to.’

19 Pe melit aripo kintayah mapu, pwen urupo pwai isa kili wawu, pwen kapa kisarayah, ara andre akapwotisingi lohonga wawu tehe Yo, ara Messayah ara. 20 Pe upwai ndrokonan isa kili wawu, tehe hiyeh kisomwi ndramat upwandrisa yiy, ara irawulohani yo, pe yiy mepo isomwi yo, ara isomwi yiy mepo ipwandrisa yo usa.”

21 Yesu ipa toro ihipwen, pwen ndriyan iporu namandran iya, pe itiyani yiy iya ngawan ipa, “Upwai ndrokonan isa kili wawu, tehe hamou tawawu andre kiratuni yo.”

22 Pwen ndramiran hu, ara hamou maran inim iya kili hamou, pe lohongahu imwakaikai tehe ita wong iyata hiyeh ndrokonan.

23 Pe hamou ta hu ndramira Yesu mepo ndriyan imbuluhi yiy, ara iye roh ndrahasa Yesu.

24 Pwen Simon Pita irakamiri ndramiran ara pe ipa, “Akasok yiy, ita pwai ara hiyeh ndrokonan.”

25 Pwen ndramiran mepo iyeroh ndrahasa Yesu, ara ises iya pakeh kili yiy pe isok yiy ipa, “Yapan, ata wong iyata hiyeh ndrokonan?”

26 Pwen Yesu isomwi yiy ipa, “Yiy mepo kutaimani ndrinanohun hape kiya suw pe kuhang yiy, ara ndramat ara ko.” Pwen itaimani ndrinanohun iya suw, pe iykiy iya kili Simon Yiskariyot, mepo norun Yutas. 27 Pe iro mwonen iwiri ndrinanohun o, Sinai iya nondriyan. Pwen Yesu ipwai iya kili yiy ipa, “Tesah apambusiy, ara ambusiy kileh.”

28 Hapeko hu masih huyeroh ngilse keyau, ara hu kowu iya ndroiyi nongan mepo Yesu ipwai iya kili yiy ara. 29 Pe Yutas, ara ngara kiro nimnim kiya ndropwa singayai, pwen hayah tahu, ara hupa ndre Yesu ipwai para kiya sou anandrinai para kisopwat Yon, ndre kiyuk melit kiya kili hu ndramat mepo ngara hu kandroisiy. 30 Pe iro mwonen ara, ara kiniping, pwen Yutas kinwiri ndrinanohun, pwen iya ngawan.

31 Pe Yutas kinnau kinna ngawan, pwen Yesu ipa, “Noru Ndramat, ara mahapo kanhari ngalan kinna paingan, pe tunan Yesu ko, andre kahari ngala Ngindrai. 32 Pe kapa Ngindrai kihari ngalan kiyau kili Yesu, pwen Ngindrai mbukenan, andre kihari ngala Noru Ndramat, pe andre kindrou pwi ko kihari yiy.

33 Pwen wawu noru, andre kuro sura wawu, ara hape ko, pe andre akaten yo, pe tehe kunpwai pwen kinna kili hu Yutah, pwen mahapo upwai isa kili wawu, tehe, kol hape aleheh nakuya aliy, ara wawu andre kansa aliy pwi.

34 Pe yo uiki nongan para pwahanou howen isa kili wawu, tehe ndriya wawu kimbuluhi wawu hamou-hamou tehe ndriyo imbuluhi wawu, pwen ndriya wawu kimbuluhi wawu hamou-hamou i. 35 Pwen kapa ndriya wawu kimbuluhi hamou-hamou, pwen hu ndramat masih kene andre hu kapahasaniy tehe wawu, ara ndramiro hu.”

36 Pwen Simon Pita isok Yesu ipa, “Yapan, wou naya aleheh?” Pe Yesu isomwi yiy ipa, “Hape aleheh nakuya aliy, anlahiy aho ndruwo pwi, hapeko kamulan andre aho ndruwo.”

37 Pe Pita isok ipa, “Yapan, paratapeh pe andre kunto ndruwam mahapo pwi? Yo andre kumat satam.”

38 Pwen Yesu ipa, “Wou apa ndre amat para asopwat yo, ndre? Upwai ndrokonan isa kili wou, tehe tutut kinrang mapu, pwen andre apwai maporotisap tehe akowu to.”