12
Hu Tumwi Ndraikei iya kili Yesu iro kol Petaniy
1 Lang manonoh iho ndron para Pasopa, pwen Yesu, ara iya rayah iya kol Petaniy mepo kolo Lasarus, pe Lasarus, ara Yesu ihingini yiy itine kimat. 2 Pe humwaniyani anandrinai para kapwesani Yesu iro ara. Marta, ara irota anandrinai, pe Lasarus ara imi mwalingahu mepo huye roh ngilse keyau iyapolo Yesu. 3 Pwen Mariya iwiri ndraikei lita sahin mepo ngonohon layin mepo mbusiy iyau kei nat, pe kenen namandran iya, ara isa pe itilingiy iya ndrika Yesu pe ikuwei iya kompayan. Pe ngonohon lain ara, ara ingau pe isuwi seu masih ara.
4 Hapeko ndramiran hamou, Yutas Yiskariyot, mepo kamulan andre kiratuni Yesu pe kiyki yiy kiya nima hu ndramat humwisnani yiy, ara ipa, 5 “Paratapeh pe ndraikei mepo ngonohon layin iya iye, ara kanpo pehei kinna aliy pwi, pwen kennen, ara andre kaiki kiya kili hu ndramat mepo hu ndroisiy? Pe kennen ara sombule siliwa matingat (300), kene ndramat para hayou sih mwaniye.” 6 Pe yiy ipa toro, ara kinlohongani hu ndramat mepo hu ndroisiy pwi, ara pwi, hapeko paratesah, yiy ndramat hamou para pahana. Yiy ngara kiro memerani kokou para sombule pat, pe ngara kipopo sohoyan kiyau aliy.
7 Yesu ihilingi nongan aro pe ipa, “Atali pihin aro kiro. Ndraikei ngonohon layin ita kili yiy, ara para kimwaniyani lenge para toniyo. 8 Pe yihu ndramat mepo hu ndroisiy, ara andre hu koro sura wawu lang masih, hapeko yo, ara andre kunto sura wawu lang masih pwi.”
9 Pwen hu ndramat para Yutah soyon hu yirowei tehe Yesu iro ara, pwen husa para hu kasa nime Yesu o, ara pwi, hapeko para hu kasa nime Lasarus mepo Yesu ihingini yiy kintine kimat. 10 Pwen hu pris huhohin ta hu pris masih, ara hu mburi nongan para hu katingundru Lasarus i, 11 paratesah, tesah irayah iya kili Lasarus, ara imbusi hu Yutah soyon huya kili Yesu pe huiki lohongahu ndrisiyon iya kili yiy.
Yesu iya nondriya Yerusalem tehe king
12 Pe iya lang sih i, hu ndramat soyo-soyon iya husa koyum Yon husa Yerusalem, hu kanhilingiy tehe Yesu, ara iropo isa. 13 Pwen hu wiri hu pappa pam, pe huya pohonani yiy huya sai, pe huro wayeh huro pa,
“Hosanna!”
“Lomwes ita kili yiy mepo isa iya ngala Yapan!”
“Lomwes ita kili King tahu Yisrayel!”
14 Pe Yesu iwiri tongkiy hamou pe impwan aliy, tehe pwayan kinpwai pwen kinna, ipa toro,
15 “Mbuna anoh, O Noru Pihin para Sayon. Akanimei, King tawawu isayau, yiy iyerampwan noru tongkiy hamou.”
16 Pe hu ndramira Yesu, ara mamu lohongahu kinileu kina hu melit aro pwi, hapeko Ngindrai ihari ngala Yesu, ara ihingini yiy pwen huyirowei tehe melit masih ara, ara pwayan kinpwai pwen kinna tan. Pwen humbusi melit masih mepo kintayah kinna kili yiy.
17 Pe iro mwonen Lasarus imat, ara hu ndramat soyon iya huro sura Yesu, pe hu nime Yesu ihingini Lasarus itine kimat, pe iyoh yiy isa ngawan ngat. Pe hu ndramat ara, ara huro tiyani titiye ta Lasarus iya tesah Yesu kinmbusiy kinna atan. 18 Paratesah, hu ndramat soyon hu kanhilingi ndraikiya kaipisa pwoke aro, pwen huya pohonani yiy huya sai. 19 Pwen hu Parisiy, ara hamou iro wong iya kili hamou huro pa, “Akanimei, tesah yowu pakambusiy, ara kinna pwi ara. Akanimei, hu ndramat masih hu tora ndruwan.”
Yesu ipwandrohonge iya kimat tan
20 Pe hu ndramira Krik hayah, ara huya paingan Yerusalem huya sura hu mepo huya totohun iro mwonen lenge Yon. 21 Pe husa kili Pilip ndramira Petsaita ita nondriya kol Kaliliyy, iyapolo lohongahu handra, pe hupa, “Namandran, yowu namiliy para nakanime Yesu.” 22 Pwen Pilip iya wong iya kili Antruw, pe hilu ya pwai iya kili Yesu.
23 Pe Yesu isomwi hilu ipa, “Lenge Noru Ndramat para kahari ngalan, ara kinsa. 24 Yo upwai ndrokonan isa kili wawu, tehe kapa mbuwa peke wit sih kinyos kinna pwan pe kinmang pwi, pwen andre kiro ndron tehe peke wit sih ara. Hapeko kapa kimang, pwen andre kippwai pe mbuwan, ara andre kiya soyon iya. 25 Kapa ndramat hamou kihimbusani mwoiwan, pwen andre mwoiwan kitali yiy, hapeko kapa kiyki ndruwan kiya kol pwan, ara andre mwoiwan andre kinto-kinto. 26 Pwen kapa ndramat hamou kirayah ndramat para poya mbulyo, ara kiho ndruwo; pe hape aleheh nakuro aliy, ara ndramat para poya mbulyo, ara andre kiro aliy yi. Pe Tomo, ara andre kihari ngala yiy mepo imbusi mbulyo.
27 Pwen mahapo, ndriyo ara iporu, pe andre kupa tesah ara? ‘Tomo, asopwat yo kiho paramwandrai mepo nakuya nondriya nopwaran’? Hapeko pwi, tunan aro ko, paramwandrai ara andre kuya nondriya nopwaran. 28 Tomo, ahari ngalam mbukenam.”
Yesu ipwai ihipwen, pwen mbulukoyu hamou iyau kol paingan yang isa, ara ipa, “Kunhari ngolo pwen, pe andre kuhariy paiwe yi.”
29 Pe hu ndramat soyon mepo huro tine ara, ara huhulingi mbulukoyu hamou, pe hupa, “Palan italuwei, pe hayah tahu hupa, angelou hamou kinwong kinna kili yiy.”
30 Pwen Yesu ipa, “Mbulukoyu hamou wawu hilingiy, ara para hiyan tawawu, pe para hiyan to pwi. 31 Pe mahapo ara lenge hu ndramat para kol pwan iye para hukaya nondriya tamwanye, pe para kaiki pohon para kol pwan kiya nongan, pe andre karasses yiy kiya mawen kol pwan. 32 Hapeko yo, kiro mwonen hu ndramat kaiki yo kuya kei tondrih kuya mawen kol pwan, pwen andre kuluwi lohongahu ndramat masih hu kasa kili yo.” 33 Pe Yesu iwong tehen toro, ara iyinganiy andre kikuni nopwaran tapeh kiya kimat tan.
34 Pwen hu ndramat soyon iya ara hupa, “Yowu kanhilingiy pwen kinna ita Nongan para Pwahanou tehe Messayah, ara andre kinto-kinto. Pwen paratapeh pe atapa, ‘Noru Ndramat, ara andre hu ndramat kaiki yiy kiya kei tondrih?’ Pe Noru Ndramat aro, ara hiyeh?”
35 Pwen Yesu ipwai iya kili hu ipa, “Nongno ara tehe ngana lang andre kinto kili wawu ndrangan niwen pwi. Pe ma ngana lang iripo ndron kili wawu, pwen akarikai kiya ngana lang, matisan ping kipingi wawu. Pe ndramat kirikai lokuhan, ara tanan hape aleheh nakiya aliy, ara pwi. 36 Pe ma ngana nongno iripo ndron sura wawu, pwen akapwotisingi lohonga wawu kiya kili yiy, pwen andre wawu karayah hu noru ngana lang.” Yesu iwong ihipwen, pe itali hu pe iya kohon kili hu.
Hu ndramira Yutah soyon hu kanpwotisingi lohonga hu pwi
37 Pe konan Yesu imbusi ndraikiya kaipisa pwoke soyon iro mbulmara hu, hapeko hu kanpwotisingi lohongahu kinna kili yiy pwi ko. 38 Pwen pe nongna poropet Yisayah, ara isahamanan ipa toro:
“Yapan, mepo ipwotisingi lohongan iya nongna yowu,
pe yiy mepo pwoke ta Yapan iro kili, ara ipwainganiy iya ngawan?”
39 Paratesah, tunan ara ko andre yihu kanpwotisingi lohonga hu pwi, paratesah Yisayah ipwai paiwe yi toro:
40 “Ngindrai kinyohi mara hu,
pe kinmbusi ndriyahu kinpwoke,
pwen andre hu kannimei kinna marahu pwi,
pe lohongahu andre kinileu pwi,
matisan hu karapaiwani ndriyahu pe andre kusopwoyani hu.”
41 Pe Yisayah ipa toro, paratesah, kinnime pwoke namandran ata Yesu, pwen pe kintiyani yiy.
42 Pe iro mwonen lang ara, hu pohon para kol soyon, ara hu pwotisingi lohongahu iya kili Yesu. Hapeko hunoh tahu Parisiy, pwen hu kanwong lohongahu ndrisiyon kinna ngawan pwi. Paratesah, matisan hu Parisiy hu kaiki songot para andre hu kanna hu yumwa mbultere pwi. 43 Paratesah, yihu ara hu namili hu ndramat para kol pwan kasikiye hu, pe Ngindrai, ara pwi.
44 Pwen Yesu iwong pwokeyan ipa, “Kapa ndramat hamou kipwotisingi lohongan kisa kili yo, ara kinpwotisingi lohongan kinsa kili yo ko pwi, hapeko ipwotisingi lohongan iya kili Tomo yiy mepo ipwandrisa yo usa. 45 Pe ndramat inime yo, ara inime yiy mepo ipwandrisa yo usa. 46 Pe usa kol pwan tehe ngana kol pwan, para hu mepo hu kapwotisingi lohongahu isa kili yo, ara andre hu konto lokuhan pwi.
47 Pe ndramat mepo ihilingi hu nongno pe kintokuyaniy pwi, ara andre kuntayah tehe ndramat para tamwaniye tan pwi. Paratesah, usa kol pwan, ara para kuiki kora hu ndramat pwi, hapeko usa, ara para kusopwat hu ndramat. 48 Ndramat hamou para tamwaniye, ara ita, pe yiy mepo imwisnani yo pe kinpwotisingi hu nongno pwi, ara hu nongan ara ko andre kiyki korahu kiro mwonen lang kiyahapwen. 49 Paratesah, yo ara kunwong kinna lohongo mbukeno pwi, hapeko Tomo mepo ipwandrisa yo usa, ara kinpwandrandrahani yo para tesah andre kupwai, pe andre kutiyani nongan tapeh. 50 Pe upahasaniy tehe nongna Tomo ipwandrandrahani yo iya aliy, ara andre kiluwani wawu kiya taleh kinto-kinto. Pwen pe nongan masih mepo urupo pwai, ara tesah mepo Tomo kinpwai pwen kinsa kili yo.”