1 Pe ndramat hamou ngalan ara Lasarus, yiy imwa. Yiy ndramira kol Petaniy hamou, para kol mendreheh ata Mariya pe nalin Marta ara yiy ndrohan. 2 Pe Mariya aro, mepo wayin Lasarus imwa, ara yiy ara ko mepo kintumwi ndraikei mangonohon layin iya ndrika Yapan, pe ikuwe ndrikan iya kompayan. 3 Pwen hilu pihin malmou hilu nali hilu ara, ara hilu pwanos nongan iya kili Yesu hilupa, “Yapan, yiy mepo ndriyam imbuluhi yiy ara, ara imwa.”

4 Iro mwonen Yesu ihilingi nongan aro pe ipa, “Mwamwa aro andre kinna hapwen kinna kimat pwi, hapeko ara para hu ndramat kanime pwoke ta Ngindrai, pe hu kahari ngalan. Pe iya sai aro ko, Noru Ndramat, ara andre kahari ngalan.” 5 Pe Yesu ara ndriyan imbuluhi Marta hilu nalin pe Lasarus. 6 Pe kinhilong tehe Lasarus, ara kinimwa, hapeko iro manau kol ara, lang malwoh i.

7 Pwen ipwai iya kili ndramiran hu ipa, “Tukamui kaya kol namandran hape Yutiya.”

8 Hapeko hupa, “Ndramat para hinonou, mamu hape kinna, hu ndramira Yutah hu nohonou para pakasolpwa wou kiya pat, pwen namui naya ariya yi?”

9 Hapeko Yesu isomwi hu ipa, “Paramwandrai songui pe luwoh ngara kiho nondriya lang sih, pwen ndramat mepo kirikai lang, ara andre kinyos pwi, paratesah, ngara yihu ngara kinimnim kiya ngana kol pwan. 10 Kapa kirikai ping pe mwonon pwi, ara andre kituwani yiy, paratesah, mwonon pwi.”

11 Yesu ipa toro ihipwen, pwen iwong paiwe yi ipa, “Kowase worou Lasarus, ara kinmatin turut, hapeko andre kuya ara, pe kuhingini yiy kitine.”

12 Pe ndramiran hu husomwiy hupa, “Yapan, kapa ita matin, ara andre kingoh.” 13 Pe hu ndramira Yesu, ara hupa ndre Yesu iwong tehe iro matin o, hapeko yiy, ara iro wong iya kimat ta Lasarus.

14 Pwen ipwai ngawan iya kili hu ipa, “Lasarus ara kinimat. 15 Yo ara upwes tehe tunan wawu pe kunto lang ara pwi, paratesah, andre wawu kapwotisingi lohonga wawu kisa kili yo. Kiya, akasa pe tukaya nime yiy.”

16 Pwen Tomas ngalan handra Titimus*Titimus ara ipa, “mwan” Eng: Didymus means, “Twin.”, ara ipwai iya kili hu ndramira Yesu masih, ara ipa, “Kiya tou, tukaya pe tukamat kiyasura Yesu.”

17 Yesu iyarayah iya pakeh kol Petaniy pe isapahas tehe Lasarus, ara kantoni yiy kinna ngat sou lang mahaahiu pwen. 18 Pe kol Petaniy ndrohongan kiho kilomita royoh ita mawen hape kili Yerusalem. 19 Pe hu Yutah soyon husa kili Marta hilu Mariya para karambumbuni hilu iya kimat ta wayi hilu. 20 Pwen Marta kinhilong tehe Yesu iropo isa, pwen iya ngawan seu para kiya pohonani yiy, hapeko Mariya, ara iye ndron seu.

21 Pwen Marta ipwai iya kili Yesu ipa, “Yapan, kapa aro iye, ara wayi andre kinmat pwi. 22 Hapeko yo upahasaniy tehe mahapo, Ngindrai ilahiy para kiyki sehe melit kapa asok yiy kiya aliy.”

23 Pwen Yesu ipwai iya kili yiy ipa, “Wayim andre kitine paiwe.”

24 Pwen Marta ipa, “Ehe, Upahasaniy, tehe kiro mwonen lang nakiyahapwen, ara andre kisa tine paiwe sura hu ndramat mepo hu kanmat.”

25 Pe Yesu ipwai iya kili yiy ipa, “Yo ara ndroiyi titine pe taleh. Pe ndramat mepo kipwotisingi lohongan kisa kili yo, ara konan kimat, hapeko andre kiwiri taleh kinto-kinto. 26 Pe yiy mepo iripo mwalen pe kipwotisingi lohongan kisa kili yo, ara andre kinmat pwi. Apwotisingi lohongam iya nongan aro, ndre pwi?”

27 Pwen Marta ipwai iya kili Yesu ipa, “Ehe Yapan, upwotisingi lohongo tehe wou, ara Messayah, Noru Ngindrai Kamai. Pe wou ara ndramat mepo andre asa kol pwan.”

28 Marta ipa toro ihipwen, pwen imui iya pe iyoh nalin Mariya hilya ngilsen hape, pe ipwai iya kili yiy ipa, “Ndramat para hinonou isa iripo, pe iripo sok wou.” 29 Iro mwonen Mariya ihilingiy tehen toro, ihilak porosih o, pe iya kili Yesu. 30 Yesu iro manau hape aleheh mepo Marta iya pohonani yiy iro aliy ara, pe kinna nondriya kol mendreheh ara mapu. 31 Pwen hu Yutah mepo huro sura Mariya huro rambumbuni yiy iro seu, ara hunimei tehe ihilak o kinnau, pwen huho ndruwan, hupa ndre nakiya ngat pe kiya rang.

32 Mariya iya rayah iya hape aleheh Yesu iro aliy, pe iyos iya ndrikan pe ipa, “Yapan, kapa aro iye, ara wayi andre kinmat pwi.”

33 Pe iro mwonen Yesu inime yiy iro rang, pe hu Yutah mepo huho ndruwan husa, ara huro rang i, pwen indrangis, pe ndriyan ipworu namandran iya. 34 Pwen isok ipa, “Wawu kantoni yiy ita hape aleheh?” Pwen hupa, “Yapan, asa pe animei.”

35 Yesu irang.

36 Pwen hu Yutah hupa, “Akanimei, ndriyan imbuluhi yiy namandran iya!”

37 Hapeko hayah tahu hupa, “Yiy kinmbusi mara hu ndramat iyoh hu kanna hiyan. Pe paratapeh pe kinsopwat ndramat iye pwi pe kinmat?”

38 Pe Yesu ara ndriyan ipworu namandran iya porosih i, pwen isa ngat. Pe pat namandran sih, ara isingori pohomara ngat sou ara. 39 Pwen Yesu ipa, “Akatiriyani pat kiya mawen.” Pe Marta pisu ndramat kinmat ara ipa, “Yapan, kinmari lang mahaahiu pwen ita ngat, pe kiniyki ngonohon.”

40 Pwen Yesu ipwai iya kili yiy ipa, “Mamu upa tesah isatam, tehe kapa apwotisingi lohongam, pwen andre anime nonowa pwoke ta Ngindrai.”

41 Pwen hutiriyani pat iya mawen, pe Yesu maran itandras iya paingan pe ipa, “Tomo, urawuloh tehe anhilingi yo. 42 Yo upahasaniy tehe wou ngara ahalingi yo lang masih, hapeko upwai toro, ara para hiyan tahu ndramat hutopo tine aro, tehe andre hu kapwotisingi lohongahu, tehe wou apwandrisa yo.”

43 Yesu ipa toro ihipwen, pwen iyoh pwokeyan ipa, “Lasarus, asa ngawan!” 44 Pwen ndramat imat ara isa ngawan iyapolo hu waswas iro niman pe ndrikan, pe koyau hasai isumwa mbulmaran. Pe Yesu ipwai iya kili hu ipa, “Akatali koyau para kimat kiya mawen kili yiy pe kiyau.”

45 Pe hu Yutah soyon mepo hu saisai husa polo Mariya, ara hunime tesah Yesu kinmbusiy, pwen huiki lohongahu ndrisiyon iya kili yiy. 46 Hapeko yihu hayah tahu, ara huya kili hu Parisiy pe huya tiyani tesah Yesu kinmbusiy. 47 Pwen hu pris huhohin ta hu pris masih iya sura hu Parisiy, ara huyoh nongan para mbultere para Sanhetrin†Sanhetrin mbultere ta hu yapane hu Yutah. Pe husok hupa, “Andre tukambusi tapeh? Ndramat iye ara iripo mbusi hu ndraikiya kaipisa pwoke soyon iya.

48 Kapa tukatali yiy pe kiro mbusi melit toro manau, pwen andre hu ndramat masih kapwotisingi lohongahu kiya kili yiy. Pe andre hu ndram para Rom hu kasa pwalngani yumwa totohun namandran torou pe hu ndramat para kol namandran masih torou i.”

49 Iro imwonen hayou ara, pohon hamou ngalan Kayapas, yiy ara hamou tahu pris ihohin ta hu pris masih kene, pe iwong ipa, “Wawu kanpahasani hapesah pwi masih! 50 Wawu andre kanyirowei pwi tehe ilahi ndramat hamou kimat para hiyan ta hu ndramat, pwen andre hu para Rom kanpwalngani hu ndramira tou masih para kol namandran masih Yisrayel kanmat pwi.”

51 Pe Kayapas kinpa nongan iye kinna lohongan mbukenan pwi, hapeko iro tehe pris ihohin ta hu pris masih kene nondriya hayou ara, pe iwong iya nongan tahu poropet tehe Yesu andre kimat para kisopwat kol namandran masih tahu Yutah. 52 pe tahu Yutah ko pwi, hapeko ta hu noru Ngindrai masih mepo humasumbuwe huya kol pwan, para kiwiri hu kamui pe kimbusi hu karayah hamou opu. 53 Pwen iro mwonen lang ara iya, hukah sai para katingundru Yesu.

54 Pwen Yesu, ara kinho rikai ngawan mbulmara hu Yutah pwi, pe itali kol ara, pe iya kol hakol mepo ndramat aliy pwi, iya kol ngawan hakol hu pohowei Eprayim. Pe iro ariya iyapolo ndramiran hu.

55 Pwen pakeh kirahihini lenge Pasopa tahu Yutah, hu ndramira Yutah soyon para kol mendreheh masih ara, ara hutali kolo hu pe huya paingan Yerusalem para hu koro ndruwa kowasehu, para kambusi hu koro mwonen mbulmara Ngindrai, ma Pasopa kinsa mapu. 56 Pe huro ten Yesu manau. Huro tine nondriya kowa yumwa totohun namandran, pe hamou iro sok hamou, huropa, “Wawu lohonganiy tapeh? Andre kisa koyum Yon, ndre pwi?” 57 Pe hu pris huhohin ta hu pris masih, pe hu Parisiy, hupwatisingiy tehe kapa hamou kinime Yesu kiro hape aleheh, ara kiya nese ndraingahu pwen andre hukambultuwe tahatini yiy.