1 Yo Pol, yo ara ndramat hamou para poya mbulen ta Kristus Yesu. Yiy iyoh yo tehe aposel hamou pe iyki yo para pohoweya nongan hiyan ta Ngindrai— 2 nongan hiyan mepo kinpwatisingiy koluw kinna iyau kili hu poropet tan ita nondriya hu Nongan Haiyan 3 mepo iwong iyata Norun. Yiy irayah tehe ndramat pe yiy ara ndraye King Tepit hamou. 4 Yiy mepo Mwoiwan ara haiyan, ara pwainganiy yiy iyapolo pwoke tehe yiy noru Ngindrai, mepo itine kimat: Yiy, ara Yesu Kristus Yapan torou. 5 Iyau ngala Yesu Kristus opu, Ngindrai iyki pahas pe mbulen para aposel isa kili worou, para kayoh hu ndramat kayau mwalinga hu ndraye ndramat masih para hu kapwotisingi lohongahu ndrisiyon kiya kili Yesu pe koho ndruwan. 6 Pe wawu yi, ara para sura yihu Ndramira Lah mepo Yesu Kristus kiniyoh hu, pe wawu ara atan.

7 Yo uratuluwi nongan iya kili wawu ndramira Rom masih kene mepo Ngindrai ndriyan kinmbuluhi wawu, pe kiniyoh wawu para karayah hu ndramiran haiyan: Pahas pe ndriya wayis iyau kili Ngindrai Tamarou pe iyau kili Yapan Yesu Kristus isa kili wawu.

8 Nakuwong kimu toro, yo urawuloh iya kili Ngindrai ato iyau kili Yesu Kristus isa kili wawu masih, paratesah, lohongai ndrisiyon ta wawu, ara kantiyaniy kinna kol pwan masih kene. 9 Ngindrai ara andre kipwokeyani nongno tehe upo mbulyan iyapolo ndriyo masih iya pohoweya nongan hiyan ata Norun. Pe lang masih ngara kuro lohongani wawu. 10 Pe lang masih ngara kutohun tehe kiya namiliwai pwokeyan ta Ngindrai, pe kipa hiyan kisato, pwen andre kusa saisai kusa kili wawu.

11 Yo unamiliy imwonen para kusa nime wawu, para kusaiki yukyuk hayah ta Mwoiwan Haiyan kisa kili wawu para kipwokeyani wawu— 12 pwen pe andre kipwokeyani lohongai ndrisiyon tawawu pe lohongai ndrisiyon ato, pwen andre kipwokeyani ndriya worou hamou-hamou. 13 Wawu nali yo unamiliy para wawu kapahasaniy tehe, lang soyon ngara kulohonge para kusa kili wawu para kusopwat wawu karayah Kristen tehe kunmbusiy kinna kili hu Ndramira Lah hayah. Hapeko hapesah isingori yo pe kunsa nime wawu pwi.

14 Ngindrai iyki mbulen isa kili yo para kusopwat hu Krik pe hu Krik pwi yi, pe hu ndramat hu pahas iya lohongai pe hu ndramat lohonga hu kinpahas pwi. 15 Tehen tora ko ndriyo ara itine para kupohowei nongan hiyan kisa kili wawu mepo tora Rom i.

16 Yo kunhomasi para kupohowe nongan hiyan pwi, paratesah, nongan hiyan ara pwoke ta Ngindrai para kisopwat hu ndramat masih mepo hupwotisingi lohonga hu: yihu Yutah imu, pe iyamulan hu Ndramira Lah. 17 Paratesah, iyau nongan hiyan opu, kultuw imwonen ta Ngindrai kinsa yelan ngawan, pe yiy mepo kultuwayin imwonen iya kili Ngindrai iya lohongai ndrisiyon, ara andre lohongai ndrisiyon tan kimbusi yiy kiro mwalen, tehe pwayan kinpwai: “Yiy mepo kultuwayin imwonen, ara lohongan ndrisiyon andre kimbusi yiy kiro mwalen.”

18 Ndrina lokuh ta Ngindrai iyau kol paingan yang, ara kintayah ngawan kinsa kili hu masih mepo hu ndrihisani kultuw imwonen ta Ngindrai. Pe hu ndramat kultuwaye hu pwassin, pe kultuwayi hu mepo kinmwonen pwi, ara hu isingori nongan ndrokonan. 19 Pwen kultuwayi Ngindrai mepo hupahasaniy, ara ileu iya kili hu. Paratesah, Ngindrai imbusiy ileu iya kili hu. 20 Pe hunimei iya mara hu pe lohonga hu kinileu iya tesah mepo kanmangsaniy, pwen hu ndramat hukanlahiy para hu kapa pwi kiya aliy, ara pwi, paratesah, iro mwonen Ngindrai imangsani kol pwan, ara ipwaingani hukultuwayin—pe ipwaingani pwoke tan mepo andre kinto-kinto, pe kultuwayin mepo ihohin.

21 Paratesah, konan hu kanpahasani Ngindrai, hapeko hu kanhari ngalan tehe yiy Ngindrai ara pwi, pe hu kanrawuloh kinna kili yiy pwi, pe lohongai hiyan kinto kili hu pwi, pe lohongahu iya pwi. 22 Konan hu kapa lohongai waison kiro kili hu, hapeko lohongai waison kinto kili hu pwi 23 pe hu kantotohun kinna kili Ngindrai mwalen pwi, hapeko hu totohun iya kili hu sumwoiwa hu nombungong tehe ndramat mepo kinmat, pe iya kili hu norukan para wohowoh, pe hu kan para tokuyai, pe hu kan para seselek.

24 Tehen tora ko Ngindrai itali hu huya nondriya hu namiliwahu para hu kultuw pwassin tahu, pe iya kultuw para pilah mepo imbusi hu konto howen pwi, pe humbusi kultuw mwomwan para kiyki masirai kiya nombuwe hu hamou-hamou tahu. 25 Pe husuluyani nongan ndrokonan ta Ngindrai iya nongan pwasoyou. Pe hu totohun pe hupo mbulya hu melit mepo Ngindrai imangsani, hapeko hu kantotohun kinna kili Ngindrai mepo imangsani hu melit pwi—yiy mepo andre koro hari ngalan lang masih. Ndrokonan.

26 Paratesah, tunan aroko, pwen Ngindrai itali hu para hu kambusi hu kultuwayi pilah para kiyki masirai. Pe yihu pihin tahu ara husuluyani hu kultuw hiyan para yesowai pe huho ndruwa kultuw mwomwan iya kili hamou-hamou tahu. 27 Pe hu kamai ara humbusiy tehen aliy i, husuluyani kultuw hiyan para yesowai, pe kultuwayi pilah ara ipakarawani hu pe hupo pilah iya kili hamou-hamou. Pe hu kamai ara hurakultuw mwomwan iya kili hamou-hamou pe yihu wiri kora mwomwan tahu iya hu kultuw mwomwan tahu humbusiy.

28 Pe mbuwali hu para kalohonani lohongai hiyan ta Ngindrai, pwen Ngindrai itali hu huya lohongai mwomwan tahu para hu kambusi tesah mepo hu kanlahiy para hu kambusiy pwi. 29 Pe yihu kanpep kinna hu kultuw pwassin handra-handra, kultuwayi sinai, mwolou pe kultuw pwalan. Pe hu namili melit ta hamou, hutingundru ndramat, hu hingas, pe hu pwasoyou pe hupwotisi ndramat. Pe hu ndramat para pwahalte, 30 pe para rasusut nongan, pe hu ngara kamwisnani Ngindrai, pe hu ndramat para lomei o mwaihei, pe hu ndramat para tandroindroi pe hu ngara kasikiye hu, pe humburi lohongai para kambusi kultuw mwomwan, pe hu konho hilingi tamahu pe tinahu pwi; 31 pe lohongahu inun, pe lohongahu ndrisiyon pwi, ndriyahu kinmbuluhi hu ndramat pwi, pe koisirai kinto kili hu pwi. 32 Pe konan yihu pahasani pwahanou imwonen ta Ngindrai, pwen hu mepo humbusi hu kultuw tehen tora, ara andre hu kamat kaliy. Pe hukonto wayaniy para kambusi hu kultuw aro ko pwi, hapeko yihupa hiyan iyatahu para hukoro mbusiy i.