1 Pwen tehen torako wawu ndramat mepo ngara akarasusut nongan kiya kili hamou, ara ankanlahiy para akandrihisani mwomwan pwi, paratesah, sehe nongan akarasusut kiya kili hamou, ara wawu tora pwalngani wawu mbukenan, paratesah wou mepo arasusut nongan, ara wawu ngara akambusi hu melit kiya wule tehen aliy opu. 2 Worou tupahasaniy tehe tamwanye ta Ngindrai ara imwonen pe ndrokonan, iya kili hu mepo ngara hu kambusi hu kultuw aro. 3 Pwen pe wou mepo ndramat o mwaihei arasusut nongan iya kili hu, pe wou ngara ambusi hu melit tehen aliy i, pwen apa andre awop tamwanye ta Ngindrai, ndre? 4 Pe wawu nime namiliwa Ngindrai, ara tehe mwaihei opu, namiliwan ara namandran, pe ngara kiramwaitini hu nopwaran pe ngara kiro tine pwokeyan. Pe anyirowei tehe namiliwa Ngindrai ara ita luwani wou para arapaiwani ndriyam, ara pwi.

5 Hapeko tunan payam pwokeyan pe mbuwalim para arapaiwani ndriyam, pwen atapo sura kora mwomwan isa kili wou mbukenam, kiro mwonen lenge ndrinalokuh ta Ngindrai, pe tamwanye imwonen tan kirayah. 6 Pe Ngindrai, ara andre kiyki kene ndramat hamou-hamou, ara kiho ndruwa tesah kinmbusi. 7 Pe yihu mepo ngara koro mbusi kultuw hiyan, ara andre kimbusi hu mangalahu, pe andre kahaiyani hu pe Ngindrai andre kimbusi hu koro mwalen. 8 Hapeko hu mepo ngara hu kalohongani hu mbukenan, pe hundrihisani nongan ndrokonan pe huho ndruwa kultuw mwomwan, ara andre hu kawiri koranhu pe hu kawiri ndrinalokuh ta Ngindrai. 9 Nopwaran pe ngandran andre kiwiri hu ndramat masih mepo humbusi kultuw pwassin, andre hu Yutah kawiriy kimu na, pwen kamulan hu Ndramira Lah. 10 Hapeko Ngindrai andre kiyki mipwan hiyan, pe kihari ngalahu, pe kiyki ndriya wayis kiya kili hu masih mepo ngara hu kambusi hiyan: andre kiya kili hu Yutah kimu na, pwen kamulan kiya kili Ndramira Lah. 11 Paratesah, Ngindrai ara kinho hire pwi.

12 Pe hu masih mepo ngara hu kambusi pakut mwomwan kinto ndruwa nongan para pwahanou pwi, pe humbusi pakut mwomwan, ara andre hu kawiri kora mwomwan humbusiy. Pe hu mepo huro pahandra nongan para pwahanou pe humbusi pakut mwomwan, ara andre hu koro tine nongan kiyau nongan para pwahanou. 13 Paratesah, kultuwaye ndramat hamou andre kinmwonen kapa kihilingi Nongan para Pwahanou pwi, hapeko hu mepo huho ndruwa nongan para pwahanou, ara andre Ngindrai kipohowe hu ndramat imwonen. 14 Pe hu Ndramira Lah ara nongan para pwahanou kinto kili hu pwi, nongan para pwahanou tahu ngara hu kambusiy, ara yihu ngara kambusi tesah nongan para pwahanou ipwai. Pe yihu ara manongan para pwahanou tahu mbukenan, konan kapa nongan para pwahanou kinto kili hu pwi. 15 Pe kultuwaye hu ara iyinganiy tehe nongan para pwahanou, ara Ngindrai kintatuluwiy ita ndriyahu, pe lohongahu ipwoke iya aliy, pe hu penani hu, hapeko lohonga hu ara ngara kipenani hu. 16 Pe hu lohongai kokohon tahu ndramat, ara Ngindrai andre kiyki hu koro tine nongan kiyau kili Yesu Kristus kiro mwonen lang para tamwanye. Pe melit aro andre kirayah kiyau nongan hiyan urupo pohowei iye.

17 Kiya, kapa apohowe wou Yutah hamou, pe aiki lohongam masih iya nongan para pwahanou pe asikiye wou tehe wou ara ata Ngindrai, 18 pe kapa apahasani namiliwan pwokeyan pe tesah mepo ihohin, paratesah, anpahas kinna nongan para pwahanou, 19 pe kapa lohongam kipwoke pe aluwani hu ndramat marahu iyoh, pe arayah ngana sui sih kiya kili hu mepo hu tora lokuhan, 20 pwen pe arayah ndramat hamou para hinuwani hu ndramat mepo lohongai waison kili hu pwi, pe arayah ndramat hamou para hinuwani hu ndramat mepo lohongahu kiniman pwi, paratesah, nongan para pwahanou ara apa ita kili wou, pe apahasani melit masih pe tesah apwai ara ndrokonan— 21 pwen pe wou mepo ngara ahanuwani hu ndramat hayah, ara ngara ahanuwani wou mbukenam, ndre pwi? Wou mepo ngara apohowe nongan para mbuna akapahana, ara ngara apahana, ndre pwi? 22 Wou mepo ngara apa hu ndramat mbuna kapopilah, ara ngara apopilah, ndre pwi? Wou mepo ngara apa mbuna akatotohun kiya kili hu kerewek, ara ngara apahana hu kerewek nondriya hu yumwa totohun namandran, ndre pwi? 23 Wou mepo ngara asikiye wou tehe apahasani nongan para pwahanou, ara antanuhuyani Ngindrai pwi, pe ngara andrihisani nongan para pwahanou. 24 Tehe pwayan kinpwai toro: “Tunan wawu Yutah opu, pwen hu Ndramira Lah, ara hu pwasimiri ngala Ngindrai.”

25 Pwen kultuw para sosondrih ndramat ara mahaiye para aliy kapa wawu koho ndruwa nongan para pwahanou, hapeko kapa wawu konto ndruwan pwi, pe kultuw para sondriti sangi ndramat, ara irayah melit omwaihei opu. 26 Pe kapa hu mepo kansondriti sangi hu pwi, ara hu tokuyani nongan para pwahanou, pwen Ngindrai andre kinime hu tehe hu sondriti sangi hu, ndre pwi? 27 Pe yiy mepo kinsondriti sangin pwi hapeko iho ndruwa nongan para pwahanou manau, ara andre kirasusut nongan kisa kili wawu Yutah mepo kantatuluwi nongan para pwahanou ita kili wawu, para sondriti sangi wawu. Paratesah, nongan para pwahanou ita kili wawu, hapeko wawu kantokuyaniy pwi.

28 Pe kapa ndramat hamou kinsosondrih sangin, sosondrih ara, ara kinyingani yiy tehe yiy hamou para Yutah, ara pwi. Kultuw para sosondrih ara, ara kinwong kinna sosondrih para nombuwe ndramat o pwi, hapeko iwong iya sosondrih para ndriya ndramat. 29 Ndramira Yutah ndrokonan, ara yiy mepo ndriyan iro mwonen iya kili Ngindrai. Pe kultuw para sosondrih ara sosondrih para ndriya ndramat, pe iyau kili Mwoiwan Haiyan, pe kinyau nongan para pwahanou mepo kanratuluwiy, ara pwi. Pwen ndramat tehe tora, ara andre Ngindrai kipwesani yiy, pe ndramat andre kinpwesani yiy pwi.