3
Lohongai ndrisiyon ta Ngindrai
1 Pwen tesah hiyan andre awiriy kapa arayah tehe Yutah hamou, ndre tesah hiyan andre awiriy kiyau kultuw para sosondrih sangi ndramat? 2 Iyau poho sai soyon masih! Pe Ngindrai ipwotisingi lohongan iya kili hu Yutah imu iya hu nongnan masih.
3 Pe kapa yihu hayah lohonga hu ndrisiyon pwi, pwen wawu mbuna kapa ndre tunan ara, pwen Ngindrai andre kinto ndruwa nongnan pwi. 4 Pwi masih! Ngindrai ara ngara kiwong ndrokonan, pe hu ndramat masih ara ngara hu kapwasoyou. Tehe pwayan kinpwai,
“Pe kapa awong, ara nongnam andre kipwainganiy tehe wou awong ndrokonan.
Pe andre aramwaitini hu mepo huiki wou aro tine nongan.”
5 Hapeko kapa hu kultuwayi worou kinmwonen pwi, pwen kultuwayi Ngindrai ara imwonen masih, pe andre tukapa tesah? Pwen andre kipwainganiy tehe Ngindrai ara kultuwayin hiyan pwi, pe iyki ndrinalokuh tan isa kili tou? (Yo urupo wong iya lohonga ndramat o mwaihei.) 6 Aro ndrokonan pwi! Kapa Ngindrai kultuwayin hiyan pwi, pwen andre kiramwanye hu ndramat tapeh? 7 Pe hamou andre kikokou kipa, “Kapa pwasoyou to kipwaingani nongan ndrokonan ta Ngindrai kisa yelan, pwen paratapeh pe hutopo tasusut nongan isa kili yo tehe pakut to ara mwomwan?” 8 Hu ndramat hayah hu rakokowani rou hupa toro, “Tukoro mbusi pakut mwomwan, pwen hiyan andre kipwen aliy.” Pwen hu mepo hu rakokowani rou tora, ara andre hu kakuni kora hu.
Ndramat hamou kultuwayin ngara kiro mwonen o, ara pwi
9 Pwen andre tukapa tapeh ara? Worou hiyan, ndre? Pwi masih! Worou kanpwainganiy pwen tehe worou Yutah pe hu Ndramira Lah, ara worou masih tuyawule ko, ngara tukambusi pakut mwomwan. 10 Pe pwayan kinpwai toro:
“Ndramat hamou kultuwayin ngara kiro mwonen o, ara pwi. Hamou pwi.
11 Ndramat hamou lohongai ileu iro kili yiy o, ara pwi.
Ndramat hamou ngara kiho ten Ngindrai o, ara pwi.
12 Hu ndramat masih lohongahu kintali Ngindrai,
pe hu masih kana pwalngengei,
Pe ndramat hamou kiro mbusi hiyan o, ara pwi,
hamou pwi masih.
13 Pe hu poho hu ara ita te tehe hu ngat para tona hu ndramat,
pe ngara hu kapwandrandramam kiyau kalamehu.
Pe mbuwangusu hu, ara tehe hu mwat mapairahu.
14 Pe pohohu ara ipep iya hu nongan tunguyan para tenten.
15 Pe ndrikahu ara lahilahin para katingundru hu ndramat.
16 Nopwaran pe ngandran, ara ita memeranihu,
17 pe hukowu para hu kaiki ndriya wayis kiya mwalingahu ndramat.
18 Pe nohowai ta Ngindrai, ara kinto kili hu pwi.”
19 Pwen worou pahasani nongan para pwahanou masih ipwai, ara iwong iyata hu mepo hutora pahandra nongan para pwahanou, pwen hu ndramat masih andre hu kanwong pwi. Pe hu ndramat masih hu konto hiyan kinna mbulmara Ngindrai pwi, pe andre hu kawiri korahu. 20 Pe hamou andre kinpa kultuwayin imwonen iya mbulmara Ngindrai iyau lohongai para nongan para pwahanou, ara pwi. Iya nongan para pwahanou opu, worou tuyirowe pakut mwomwan torou.
Tuwiri kultuw imwonen iyau lohongai ndrisiyon
21 Hapeko mahapo, kultuw imwonen ta Ngindrai ara kinsa yelan, pe andre tukonto ndruwa nongan para pwahanou pwi, konan kapa Nongan Para Pwahanou pe hu poropet kanratiyaniy. 22 Pe kultuw imwonen aro, ara Ngindrai kiniykiy iyau kili Yesu Kristus iya kili hu ndramat masih mepo hu pwotisingi lohongahu. Pe kultuwaye Ngindrai iya kili hu Yutah pe hu ndramira lah, ara ihisoule ko, 23 paratesah, hu ndramat masih ara kanmbusiy pakut mwomwan pe worou ara tusahahindringou para kaya kolo Ngindrai nonowan. 24 Pe iyau pahas ta Ngindrai, pwen imbusi worou tutopo mwoimwoi pe turopo mwonen, ikonuhi rou iyau kili Kristus Yesu. 25 Ngindrai kiniyki Krisitus tehe yukyuk sih para kimat pe ndreyen—kirapiyani hu pakut mwomwan torou iyau lohongai ndrisiyon para kimat tan. Yiy imbusiy kultuw imwonen tora para kiyingani lohongai hiyan atan, paratesah, koluw, hu ndramat ngara kambusi pakut mwomwan pe Ngindrai ara kinohoiki kora pakut mwomwan tahu pwi— 26 Ngindrai imbusiy toro para kipwaingani kultuw imwonen tan kiro lang mahapo, pe yiy ara imwonen, pwen pe andre koro mwonen kiya kili yiy mepo ngara kimbusi kultuw imwonen kiya kili hu mepo huiki lohongai ndrisiyon tahu iya kili Yesu.
27 Pwen, kiya, andre kasikiye ndramat kiya tesah? Pwi yoh. Paratesah, iyau sehe lohongai para nongan para pwahanou? Nongan para pwahanou ara para kambusiy, ndre pwi? Pwi yoh, hapeko iyau nongan para pwahanou mepo andre kambusiy kiyau lohongai ndrisiyon. 28 Paratesah, ndramat hamou ara andre kiro mwonen kiya lohongai ndrisiyon tan, pe andre kanmbusiy kinyau nongan para pwahanou pwi. 29 Pwen Ngindrai, ara Ngindrai ata hu para Yutah ko, ndre? Pe yiy Ngindrai ta hu Ndramira Lah i, ndre pwi? Ehe, Yiy Ngindrai ta hu Ndramira Lah i. 30 Pwen Ngindrai torou ara hamou opu, pe imbusi hu hurayah imwonen ara kinyau sosondrih pwi, pe iyau lohongai ndrisiyon tahu. Pe hu ndramat kansosondrih kinna ta hu pwi, ara lohongai ndrisiyon tahu iyawule ko. 31 Pwen lohongai ndrisiyon iye ara kinrapiyani nongan para pwahanou, ara pwi masih. Lohongai ndrisiyon ara, ara ipwokeyani nongan para pwahanou.