1 Pe andre tukapa tesah kiyata tumburou Apraham mepo yiy ndraye rou? Pe tesah kinmbusiy mepo imwonen iya kili Ngindrai? 2 Pe kapa ndrokonan tehe Apraham, kultuwayin imwonen, ara iya hu mbulyan, pwen ilahiy para kisomwani yiy kiya aliy—hapeko andre kinsomwe yiy kinto mbulmara Ngindrai pwi. 3 Pe Nongan Haiyan ara ipa tesah? “Apraham ipwotisingi lohongan iya kili Ngindrai, paratesah, lohongai ndrisiyon tan ara imbusiy pe Ngindrai ipa yiy ara kultuwayin imwonen.”

4 Ndramat hamou ipo mbulen, pwen hu kennen sowani yiy iya aliy, ara tehe yukyuk pwi. Hapeko ara iya soiwi mbulyan. 5 Pwen ndramat hamou kinhopo mbulen pwi hapeko iyki lohongan iya kili Ngindrai, mepo ngara kirapaiwani kultuwayi hu ndramat kultuwayi hu pwassin. Pwen hu ndramat tora, ara lohongai ndrisiyon tahu, ara imbusi hu hurayah ndramat mepo kultuwayihu imwonen. 6 Pwen Tepit iwong iyawule tehen aliy i. Ipa pwesai kiya kili hu ndramat mepo hu kanpo mbulen pwi, hapeko Ngindrai ipa kultuwayi hu ara imwonen.

9 Pe pwesai mepo Tepit iwong iya aliy, ara ata hu ndramat mepo hu sosondrih sangi hu ko, ndre, iyata hu ndramat mepo hu kansondriti sangi hu pwi yi? Worou ngara kapa lohongai ndrisiyon ta Apraham, ara imbusiy pwen Ngindrai ipa yiy ndramat kultuwayin imwonen. 10 Pe Apraham ara iro tehen tapeh pwen Ngindrai ipohowe yiy ndramat kultuwayin imwonen? Apraham kinsondriti sangin pwen, ndre mapu? Apraham, ara kinsondriti sangin mapu, pe Ngindrai ipohowe yiy ara ndramat imwonen. 11 Pe Apraham kinsondriti sangin mapu, pe lohongai ndrisiyon tan, ara imbusiy pe Ngindrai ipohowe yiy ndramat imwonen. Pe sosondrih tan ara ipwaingani kaipisan tehe yiy ndramat imwonen. Pwen yiy ara tumbuhu ndramat masih mepo hu kansondriti sangi hu pwi, hapeko yihu pwotisingi lohongahu. Pwen Ngindrai andre kipohowehu tehe hu ndramat imwonen. 12 Pe yiy yi ara tumbu hu ndramat mepo hu sondriti sangi hu. Pe hu kansondriti sangihu ko pwi, hapeko huho ndruwa kultuwayi tumbu rou Apraham mepo kansondriti sangin mapu, pe lohongan ndrisiyon, ara iro.

13 Tapaniu mepo Apraham pe ndrayen hu kanwiri tehe andre hu karayah mbukena kol pwan, ara kinyau nongan para pwahanou pwi, hapeko iyau lohongai ndrisiyon mepo imbusi hu hurayah ndramat imwonen. 14 Paratesah, kapa tapaniu mepo Ngindrai andre kiykiy, ara para kiya kili hu mepo huho ndruwa nongan para pwahanou, pwen lohongai ndrisiyon, ara lohongai mwaihei o. Pe tapaniu ta Ngindrai ara irayah melit mwaihei. 15 Pe kapa nongan para pwahanou pwi, pwen hu ndramat andre hu kandrihisani nongan. Paratesah, nongan para pwahanou, ara ngara kiyki ndrinalokuh ta Ngindrai.

16 Pwen tehen tora ko, tapaniu isa, ara iyau lohongai ndrisiyon ta Apraham, pwen pe hu ndraye Apraham masih, ara andre hu kawiri tapaniu kiyau pahas ta Ngindrai. Pe tapaniu ara, ara kinna kili hu mepo huho ndruwa nongan para pwahanou o, ara pwi, hapeko iya kili hu mepo lohongahu ndrisiyon tehe ta Apraham i. Apraham ara irayah tumbu rou masih. 17 Tehe pwayan kinpwai toro: “Yo kunmbusi wou antayah tumbuhu ndraye hu ndramat soyon.” Pwen tapaniu ara, ara imbusi Apraham irayah tumbu rou iya mbulmara Ngindrai, paratesah, ipwotisingi lohongan. Pe yiy Ngindrai mepo ngara kiyki taleh kiya kili hu ndramat kanmat. Pwen melit mepo konho nimei pwi, ara Ngindrai ipwatarapwanai o, pwen o andre kanimei.

18 Pe konan hu ndramat masih hu kanpwotisingi lohongahu pwi, Apraham ipwotisingi lohongan iya melit itapo isa, pwen irayah tumbuhu ndraye hu ndramat masih. Pwen tehe titiye kinpwai kinna atan, “Pe tumbum hu ara andre hu kahon.” 19 Pe ndrokonan para aliy, Apraham ara hayou tan ara masangat, pe kinna parangoloh masih, lohongai ndrisiyon tan, ara pwokeyan. Pe mbundropwa Sara, ara kinlahiy para kipo mbunah pwi. 20 Hapeko, Apraham lohongan mepo ipwotisingiy, ara kinmeu kinna tapaniu ta Ngindrai pwi, hapeko ipwokeyani lohongai ndrisiyon tan pe ihari ngala Ngindrai. 21 Pe ipwotisingi lohongan pwokeyan tehe Ngindrai ara ilahiy para kimbusi tapaniu ara kirayah. 22 Pwen tehen tora ko, “Lohongai ndrisiyon ta Apraham imbusi yiy irayah ndramat kultuwayen imwonen.” 23 Hu nongan mepo ipa, “imbusi yiy irayah” ara kantatuluwiy kinna atan o, ara pwi, 24 hapeko nongan ara iwong isa kili tou i, tehe Ngindrai andre kimbusi worou tukarayah ndramat imwonen. Paratesah, tupwotisingi lohonga rou iya kili Ngindrai tehe yiy ihingini Yesu Yapan torou itine kimat. 25 Ngindrai iyki yiy para katingundrun kiya hu pakut mwomwan torou, pe ihingini yiy isa mwalen para kimbusi worou tukarayah ndramat imwonen.