1 Pwen tehen torako, iyau lohongai ndrisiyon torou opu, imbusi worou turopo mwonen. Pe tuwiri ndriya wayis iyapolo Ngindrai iyau kili Yapan torou, Yesu Kristus. 2 Pe iyau kili yiy opu, lohongai ndrisiyon torou irasayarou iro nondriya pahas iye mepo mahapo turopo tine aliy. Pe worou kasikiye rou kiya melit itapo isa, mepo ngana pwoke ta Ngindrai. 3 Pe ariya ko ara pwi, worou tukapwes i kiya hu nopwaran topo rayah kili tou, paratesah, worou kapahasaniy tehe hu nopwaran ara ngara kimbusi rou tupwoke, 4 pe tupwoke pwen ipwokeyani kultuw torou, pe kultuw torou ipwokeyaniy para tukoro pwotisingi lohongai kiya tesah itapo isa. 5 Pe melit mepo itapo isa ara andre kiniyki masirai kinsa kiltou pwi, paratesah, namiliwa Ngindrai iykiy isa ndriya rou, ara namandran iya iyau kili Mwoiwan Haiyan mepo kiniykiy kinsa kiltou.

6 Akanimei, Kristus isa iro mwonen lang mepo worou pwokeya rou pwi, pwen imat para kisopwat worou ndramat pakut torou mwomwan. 7 Pe ingandrah para ndramat hamou kimat kiya ta ndramat hamou kultuwayin imwonen; pe konan ndramat hamou hiyan, ara ingandrah para ndramat hamou kimat i. 8 Hapeko Ngindrai iyingani namiliwai tan mbukenan isa kili worou toro: Tandrohongan turo ndron hu ndramat pakut torou mwomwan, Kristus ara imat isa torou.

9 Pwen mahapo ndreye Kristus imbusi rou tukantayah ndramat imwonen, pe iyau kimat tan opu Ngindrai isopwat rou tusa mawen ndrinalokuh ta Ngindrai, iyau kili Yesou. 10 Paratesah, kapa tukoro tehe hu ndramat hu mwisnani Ngindrai, pwen kimat ta norun, ara kintandropwe rou tukantayah kowase Ngindrai. Pwen pe kintandropwe rou, pe maporosahayeh taleh ta Kristus andre kinsopwat tou! 11 Pe aro ko pwi, hapeko tukapwesani Ngindrai i, paratesah, iyau kili Yapan Yesu Kristus torou kintandropwe rou.

12 Tehen tora ko, pakut mwomwan isa kol pwan, ara iyau kili ndramat hamou o, pe kimat iyau pakut mwomwan, pwen sai aro ko, kimat iwiri ndramat masih, paratesah, hu ndramat masih, ara hu mbusi pakut mwomwan. 13 Paratesah, nongan para pwahanou kinsa mapu, pe pakut mwomwan ara iro kol pwan. Kapa nongan para pwahanou kinto pwi, pwen Ngindrai kinlohongani pakut mwomwan pwi. 14 Hapeko kimat ara iro lenge Atam ipoo isa matne lenge Mose. Pe hu mepo hu kandrihisani nongan para pwahanou sahin pwi. ara hu kanmbusi pakut mwomwan tehe Atam o pwi. Pe Atam ara tehe ndramat mepo andre kisa.

15 Hapeko yukyuk ta Ngindrai ara tehe pakut mwomwan ta Atam pwi. Paratesah, kapa hu ndramat hu mat ara iya pakut mwomwan ta ndramat hamou opu, pwen maporosahayeh andre kiyki pahas pe yukyuk tan iyau pahas ta ndramat hamou opu mepo Yesu Kristus. Pe pahas ara, ara iya kene kili hu ndramat soyon. 16 Pwen tehen aliy i, yukyuk ta Ngindrai, ara kinhisoule tehe pakut mwomwan ndramat hamou pwi. Pakut ta ndramat hamou ipwalngani hu ndramat, pe huro tine nongan. Hapeko hu pakut mwomwan ta hu ndramat soyon, ara imbusi Ngindrai iyki yukyuk tan para hu ndramat koro tehe hu ndramat imwonen. 17 Paratesah, kapa pakut mwomwan ta ndramat hamou, ara iyki kimat iya kili ndramat hamou, pwen maporosahayeh andre hu ndramat kawiri pahas ta Ngindrai mepo ipep tehe yukyuk para kultuw imwonen. Pe kultuw imwonen ta ndramat hamou opu Yesu Kristus, ara iramwaitini pakut mwomwan ta ndramat hamou mepo imbusiy.

18 Pwen pe pakut mwomwan ta ndramat hamou opu, ara iyki hu ndramat masih hukoro tine nongan. Tehen tora ko, kultuw imwonen ta ndramat hamou opu, ara andre kimbusi hu ndramat masih hukaya hiyan, pe hukawiri taleh. 19 Pe ndramat hamou opu indrihisani nongan, pwen imbusi hu ndramat soyon para hukarayah hu ndramat para kambusi pakut mwomwan. Pwen pe tehen tora ko, ndramat hamou ihilingi nongan, pwen hu ndramat soyon andre hu karayah hu ndramat imwonen.

20 Pe nongan para pwahanou isa pe pakut mwomwan tahu ndramat imandra, hapeko hape aleheh pakut mwomwan kimandra kiro aliy, ara andre pahas ta Ngindrai ara andre kimandra kiropo kiya manau. 21 Pwen tehen tora ko pakut mwomwan irayah pwokeyan pe iyki kimat, pwen pe pahas ta Ngindrai andre kipwokeyani kultuw imwonen, pe kiyki taleh mepo andre kinto-kinto kiyau kili Yesu Kristus Yapan torou.