1 Pwen andre tukapa tesah ara? Tukoro mbusi pakut mwomwan manau, pwen pahas ta Ngindrai kimandra, ndre? 2 Konan! Tumat iya pakut mwomwan, pwen pakut mwomwan andre kimbusi tou koro mwalen tapeh? 3 Koyu wawu imayit tehe worou masih ara tuwiri paptais, ara para tukarayah hamou opu, iyapolo Kristus Yesu, pe turayah hamou opu ara iya kimat tan i. 4 Pwen tuwiri paptais, ara tehe turoni tou pe tumat iyapolo Kristus, pwen tehe Kristus ara itine kimat iya pwoke ta Tamarou, pwen worou i, ara andre tukoro mwalen kiya taleh howen.

5 Kapa tukapai kiyasura yiy toro kiya kimat tan, ara andre tukapai kiyasura yiy kiro mwonen kitine kimat. 6 Paratesah, tupahasaniy tehe kultuw saken torou, ara kantapaingiy kinna sura Yesu iho kei tondrih, pe pwoke para pakut mwomwan, ara andre kiya mwaihei opu. Pwen pe andre tukantayah pwandrendres para pakut mwomwan pwi. 7 Paratesah, ndramat mepo kinmat ara pakut mwomwan kinto kili yiy pwi.

8 Pwen kapa tukamat kiyapolo Kristus, ara tupwotisingi lohongarou tehe andre tukoro mwalen sura yiy i. 9 Paratesah, tupahasaniy tehe Kristus kintine kimat, pwen andre kinimat paiwe pwi. Pwoke para kimat andre kintamwaitini yiy pwi. 10 Pe kimat mepo imat iya aliy, ara imat porosih o iya pakut mwomwan, hapeko taleh iro mwalen iya aliy, ara iro mwalen iyapolo Ngindrai.

11 Pwen wawu koro ndruwa sai ara ko yi, wawu kamat kiya pakut mwomwan, pe akapai kiya kili Kristus Yesu, pe akoro mwalen kiyapolo Ngindrai. 12 Pe tehen torako wawu mbuna koro pahandra pwoke para pakut mwomwan, pe akoho ndruwa hu kultuw mwomwan para nombuwe wawu mepo andre kimat. 13 Pe wawu mbuna akaiki nombuwe wawu hakai-hakai para kimbusi pakut mwomwan, tehe hu melit para mangseya mbulen para kultuw pwassin, hapeko akaiki nombuwe wawu tehe yukyuk kiya kili Ngindrai, tehe yihu mepo humat pe husa tine paiwe. Pwen akaiki nombuwe wawu hakai-hakai kiya kili Ngindrai tehe hu melit para mangseya mbulen para kultuw imwonen. 14 Paratesah, wawu mbuna koro pahandra pwoke para pakut mwomwan, paratesah, wawu konto pahandra pwoke para nongan para pwahanou pwi, hapeko pahandra pwoke para pahas ta Ngindrai.

15 Pwen andre tukapa tesah ara? Tukambusi pakut mwomwan, paratesah, tukonto pahandra nongan para pwahanou pwi, hapeko tutopo pahandra pahas ta Ngindrai? Ara tehen tora pwi! 16 Akanpahasaniy pwi, tehe kiro mwonen akaiki wawu tehe yukyuk kiya kili ndramat hamou pe akahilingi yiy tehe hu ndramat para pwandrendres tan, ara wawu rayah hu ndramat para pwandrendres ta ndramat mepo wawu hilingi yiy ara—konan wawu karayah pwandrendres para pakut mwomwan mepo andre kiluwani wawu akaya kimat, ndre akahilingi nongan, pwen andre kiluwani wawu akaya kultuw imwonen. 17 Wawuro tehe hu ndramat para pwandrendres para pakut mwomwan, hapeko urawuloh iya kili Ngindrai, tehe wawuiki ndriya wawu masih pe wawuho ndruwa hinonou mepo wawu kanwiriy. 18 Wawu ara akantali pwoke para pakut mwomwan, pe akansarayah hu ndramat para pwandrendres para kultuw imwonen.

19 Yo urupo wong iya tesah ngara akambusi lang masih, paratesah, wawu tora kose manau iya tesah urupo wong iya aliy. Pwen tehe wawu ngara akaiki nombuwe wawu hakai-hakai tehe yukyuk para kiya pwandrendres para kultuw mwomwan, pe kimbusi pakut pwassin kimandra, pwen pe mahapo, ara akaiki wawu tehe yukyuk pe akoro pahandra pwandrendres para kultuw imwonen mepo andre kiluwani wawu akaya kultuw haiyan. 20 Tandrohonga wawuro tehe hu ndramat para pwandrendres para pakut mwomwan, ara wawu konto pahandra pwoke para kultuw imwonen pwi. 21 Pe tesah hiyan wawu wiriy iro mwonen lang ara, iyau hu melit mepo mahapo wawu kanwiri masirai para aliy. Hu melit ara kene ara andre kiyki kimat kisa kili wawu. 22 Hapeko mahapo ara wawu konto pahandra pwoke para pakut mwomwan pwi, pe akansarayah hu ndramat para pwandrendres ta Ngindrai. Pe melit hiyan para aliy andre akawiriy, ara andre kiluwani wawu akaya kultuw haiyan. Pe hiyan para aliy mepo andre akawiriy, ara taleh mepo andre kinto-kinto. 23 Paratesah, kene hu pakut mwomwan, ara kimat, hapeko Ngindrai ara iyki Kristus Yesu Yapan torou o mwaihei isa torou, tehe yukyuk para taleh mepo andre kinto-kinto.