1 Wawu nali, wawu kanpahasaniy pwi—yo urupo wong iya kili hu ndramat mepo hu pahas iya nongan para pwahanou, paratesah, ndramat hamou irondron mwalen, ara ita pahandra pwoke nopwaran para nongan para pwahanou. 2 Pe ndroiyin ara toro, nongan para pwahanou ara ipa, pihin hamou iyesou, pe nambuyun kiro mwalen, ara ita pahandra nambuyun. Hapeko kapa nambuyun kimat, nongan para pwahanou para yesowai, ara kinkaituwe yiy pwi. 3 Pwen kapa pihin ara kiyesou kiya kili kamai hamou ma nambuyun kirondron mwalen manau, ara andre kapohowe yiy pihin hamou para pilah. Hapeko kapa nambuyun kinmat, ara kinto pahandra nongan para pwahanou para yesowai pwi, pe yiy pihin hamou para pilah pwi yi. Konan kapa kiyesou kiya kili kamai hamou i.

4 Pwen pe wawu nali, wawu ara tehen aliy i, wawu pai iyapolo nombuwe Kristus pe wawu mat pe konto pahandra pwoke para nongan para pwahanou pwi. Pe wawu andre koro pahandra ndramat hamou, yiy mepo itine kimat, pe imbusi worou para tukambusi kultuw hiyan kiya kili Ngindrai. 5 Paratesah, tandrohonga turondron lohongai para nombuwe tou, ara turo pahandra pwoke para pakut mwomwan. Nongan para pwahanou ara irakelehani nombuwe rou para namiliwai para pakut mwomwan. Pwen hu kultuw mwomwan ara andre kiyki kimat kisa kiltou. 6 Hapeko mahapo, Ngindrai kinmbusi worou topo mwoimwoi pe tukonto pahandra nongan para pwahanou pwi. Pwen pe worou kambulyani mbulya Ngindrai kiya sai howen ta Mwoiwan Haiyan, pe kinna sai saken para nongan para pwahanou mepo ratuluwiy, ara pwi.

7 Pe andre tukapa tesah ara? Nongan para pwahanou ara pakut mwomwan, ndre? Pwi yoh! Nongan para pwahanou, ara imbusiy pe usa yirowe pakut mwomwan ara tesah. Paratesah, pe kapa nongan para pwahanou kinpa, “Mbuna kalimiriy.” Ara andre kunsa yirowe kultuw para limiriy pwi. 8 Hapeko pakut mwomwan isuhuhuri yo iya kultuw handra-handra, iyau nongan para pwahanou pe iyki hingorou para kulimiriy. Paratesah, kapa nongan para pwahanou pwi, pakut mwomwan ara kinmat. 9 Nongan para pwahanou kinsa mapu, ara urum uro mwalen. Hapeko tandrohonga nongan para pwahanou isa, ara pakut mwomwan isarayah pe yo umat. 10 Pe usa pahas tehe nongan para pwahanou mepo isa para kiyki taleh, ara isa pe iyki kimat.

11 Paratesah, pakut mwomwan ipakarawani yo iyau nongan para pwahanou, pe nongan para pwahanou, ara iyki kimat isa kili yo. 12 Pwen pe nongan para pwahanou, ara haiyan, pe nongan para pwahanou handra-handra, ara haiyan, pe kultuw imwonen pe hiyan. 13 Pe tesah hiyan umbusiy ara iyki kimat isa kili yo? Pwi yoh! Hapeko usa yirowei tehe pakut mwomwan ara iyki kimat isa kili yo, ara iyau melit hiyan, pwen pe iyau nongan para pwahanou ta Ngindrai, pakut mwomwan ara ipwaingani kultuw pwalan masih.

14 Worou tupahasani tehe nongan para pwahanou, ara para mwoiwarou, hapeko yo urupo nombuwe, pe pakut mwomwan imbusi yo urayah tehe ndramat hamou para pwandrendres tan. 15 Pe lohongo kinileu kinna tesah uropo mbusiy, ara pwi. Paratesah, tesah wele iso para kumbusiy, ara kunmbusiy pwi. Hapeko tesah wele imai aliy, ara umbusiy. 16 Pe kapa kumbusi tesah wele imai para kumbusiy, yo usomwiy tehe nongan para pwahanou ara hiyan. 17 Pwen yo mbukeno kunmbusi hu melit aro, ara pwi. Hapeko pakut mwomwan iripo kili isuhuhuri yo. 18 Upahasani hapesah hiyan kinto kili yo pwi. Kultuw pwalan masih ara iripo nombuwe. Paratesah, hingorou iripo kili yo para kumbusi melit hiyan, hapeko ukose para kumbusiy. 19 Paratesah, melit mepo kunnamily para kunmbusiy pwi, ara umbusiy, pe kultuw mwomwan mepo wele imai para kumbusiy—melit aro, ara urupo mbusiy waiye. 20 Kiya, kapa yo kumbusiy tesah mepo wele imai para kumbusiy, pwen ariya yo kunmbusiy pwi, hapeko ara pakut mwomwan iripo kili yo imbusiy.

21 Pe usa yirowei tehe kultuw aro iripo pombulen: Iro mwonen wele iso para kumbusi kultuw hiyan, hapeko kultuw mwomwan ara iripo sura yo. 22 Paratesah, nongan para pwahanou ta Ngindrai iyki pwesai iripo ndriyo. 23 Hapeko unime nongan para pwahanou handra yi ara iripo pombulen kili yo, pe iripo popahun iya nongan para pwahanou para lohongo, pe imbusi yo urayah ndramat hamou urupo nondriya kou para nongan para pwahanou para pakut mwomwan mepo iripo pombulen kili yo. 24 O, makaltu yo yeh! Hiyeh andre kisasopwat yo para kusa mawen nombuwe mepo andre kiyki yo kiya kimat iye? 25 Yo urawuloh iyata Ngindrai! Iyau kili Yesu Kristus Yapan torou ara iwiri yo usa mawen!

Pwen pe iripo nondriya lohongo mbukeno ara yo urayah ndramat hamou para pwandrendres para nongan para pwahanou ta Ngindrai, hapeko kultuw pwalan masih iripo nombuwe imbusi yo urayah ndramat hamou para pwandrendres para nongan para pwahanou para pakut mwomwan.