8
Taleh iyau kili Mwoiwan Haiyan
1 Pwen tehen torako, hu mepo huppai sura Kristus Yesu, ara andre korahu kinwiri hu pwi. 2 Paratesah, iyau kili Kristus Yesu, ara nongan para pwahanou ta Mwoiwan Haiyan mepo ngara kiyki taleh, ara imbusi yo urupo mwoimwoi mawen kili nongan para pwahanou para pakut mwomwan pe kimat. 3 Nongan para pwahanou, ara pwoke para aliy pwi, paratesah, pakut pwalan masih imbusi rou tupalyas. Pe Ngindrai ipwandrisa Norun mbukenan tehe ndramat hamou pakut tan mwomwan para kirayah tehe yukyuk para pakut mwomwan. Pwen yiy irapiyani kora pakut mwomwan iyau nombuwen. 4 Ngindrai imbusiy para kultuw imwonen para nongan para pwahanou kisahamanan kisa kiltou. Worou tukonto ndruwa pakut pwalan pwi, hapeko worou ngara koho ndruwa Mwoiwan Haiyan.
5 Yihu mepo hutora ndruwa pakut pwalan masih, ara lohonga hu ita sura hingorou para nombuwehu, hapeko yihu mepo hutora ndruwa Mwoiwan Haiyan, ara lohongahu ita sura hingorou para Mwoiwan Haiyan. 6 Pe lohonga ndramat iyki iya kultuw para nombuwe ndramat ara iyki kimat, hapeko lohonga ndramat iyki iya kili Mwoiwan Haiyan iyki taleh pe ndriya wayis. 7 Pe lohonga ndramat mepo iyki iya kultuw para nombuwe ndramat, ara kultuw pwassin iya kili Ngindrai. Pe kinto pahandra pwahanou ta Ngindrai pwi, pe kinto ndruwan pwi yi. 8 Hu mepo hu ngara koho ndruwa kultuwayi hu para nombuwehu, ara hu kanlahiy para kapwesani Ngindrai pwi.
9 Pe wawu ara anto ndruwa kultuw para nombuwem pwi, hapeko ata kili Mwoiwan Haiyan, pe kapa Mwoiwan Haiyan ta Ngindrai ita kili wawu. Pe kapa hamou tawawu mepo Mwoiwan Haiyan ta Kristus kinto kili yiy pwi, ara yiy ata Kristus pwi. 10 Hapeko kapa Kristus kinto nondriya wawu pwi, ara nombuwe wawu kinmat, paratesah, iya pakut mwomwan. Hapeko mwoiwam ara ita mwalen, paratesah, iya kultuw imwonen. 11 Pe kapa Mwoiwan Haiyan ta Ngindrai mepo ihingini Yesu itine kimat, ara ita nondriyam, pwen yiy mepo ihingini Kristus itine kimat, ara andre kiyki taleh kiya nombuwem iyau Mwoiwan Haiyan tan mepo ita nondriyam.
12 Pwen tehen torako, wawu nali pe pisu, worou ara mambuliya rou—hapeko andre tukanmbusi kultuwaye nombuwerou mepo inamiliy para kambusiy pwi. 13 Pe kapa akoro nondriya kultuw para nombuwe wawu, ara andre akamat; hapeko kapa kiyau pwoke ta Mwoiwan Haiyan, ara andre akapa pwi kiya namiliwai para nombuwe wawu, pwen andre akaro mwalen. 14 Paratesah, yihu mepo Mwoiwan Haiyan ta Ngindrai iluwani hu, ara yihu noru Ngindrai. 15 Paratesah, wawu kanwiri Mwoiwan Haiyan para kimbusi wawu pe akarayah ndramat para pwandrendres pe akanoh, ara pwi. Hapeko wawu wiri Mwoiwan Haiyan, ara para akarayah norun. Pe iyau kili yiy opu, worou tuyoh, “O, Tomo.” 16 Pe Mwoiwan Haiyan mbukenan andre kipwokeyani mwoiwa rou, ara hilwong ngawan tehe worou, ara noru Ngindrai. 17 Pwen kapa worou topo noru Ngindrai, pwen worou ara andre kawiri topwe hu menmenan. Pe iyau kili Kristus, worou andre kawiri topwei hu melit ara. Pe kapa worou kawiri ngandran tehe yiy ikuniy, pwen kamulan andre tukorosura yiy kiro kolon nonowan.
Nopwaran para mahapo ara kinihisoule kinna ngana pwoke para kamulan pwi
18 Yo upahasaniy tehe nopwaran mahapo tutopo kuniy, ara kinhisoule kinna ngana pwoke mepo Ngindrai andre kipwainganiy kisa kiltou pwi. 19 Paratesah, hu melit masih mepo Ngindrai imangsaniy, ara ara lohongahu inamiliy pwokeyan pe hutora longani hu noru Ngindrai. 20 Paratesah, melit masih mepo Ngindrai imangsani hu, ara hutora mwomwan, pe kinyau namiliwai para aliy mbukenan pwi, hapeko iyau namiliwai ata yiy mepo andre kiro mwomwan, pe kiro sohoni melit itapo isa. 21 Pe hu melit masih mbukenan mepo Ngindrai imangsanihu, ara andre hukoro mwoimwoi pe hu konto kou para hu andre kanna mwomwan pwi, pe andre hu kuro hiyan kiya ngana pwoke ta Ngindrai sura hu noru Ngindrai.
22 Worou tupahasaniy tehe melit masih Ngindrai imangsaniy, ara hutora wiri ngandran tehe pihin itahingotou iyata norun, ipoo isa matnen mahapo. 23 Pe ariya ko, ara pwi, hapeko worou mbukenarou i mepo tuwiri hu yukyuk kili Mwoiwan Haiyan, tuhingoruwe ngandran pe turopo longe para kihingini rou tehe norun pe kirakonuhi nombuwe rou kiro mwoimwoi. 24 Paratesah, iya melit mepo lohongarou iwpotisingi itapo isa, Ngindrai kinsopwarou, hapeko kapa melit itapo isa ara tukanwiriy pwen, pwen kinlahiy para tukalongani melit itapo isa pwi. Pe hiyeh torou ita nime melit itapo isa? 25 Hapeko, kapa lohongarou kipwotisingi tesah mepo tukanwiri mapu, ara tukapwokeyani ndriya rou pe tukorolonge.
26 Pwen tehen tora ko, Mwoiwan Haiyan, ara ngara kisopwat rou ndramat mepo tukose. Worou ara tukowu para katohun kiya sehe melit. Hapeko Mwoiwan Haiyan mbukenan, ara ngara kitohun para kisopwat rou iya tesah tuyarut para tukapwai. 27 Pe Ngindrai, ara ngara kinime ndriya rou ndramat, ara yiy ipahasani lohonga Mwoiwan Haiyan. Paratesah, Mwoiwan Haiyan ngara kisopwat totohun ta hu yau ta Ngindrai iho ndruwa namiliwa Ngindrai.
28 Pe worou tupahasaniy tehe iho nondriyahu melit masih, ara Ngindrai imbusi hu melit, ara para hiyan ta hu mepo ndriya hu imbuluhi yiy. Yihu mepo Ngindrai kiniyoh hu para hu kambusi melit kiho ndruwa namiliwan. 29 Paratesah, hu mepo Ngindrai kinpahasani hu pwen koluw kinna, ara kinrakinimahu pwen para hukarayah kaipisa Norun Kamai. Pe yiy ara andre kirayah ndrohan mwalinga hu nalin pe pisun soyon. 30 Pe hu ndramat mepo kintakinima hu koluw kinna, ara kiniyoh hu yi. Pe hu ndramat mepo kiniyoh hu, ara imbusi hu rayah ndramat imwonen, pe isap ngalahu yi.
Hu ndramat mepo huramwaitini pahun
31 Pwen pe, worou andre kapa tapeh kiya melit aro? Kapa Ngindrai ara torou, pwen hiyeh andre kihingasirou? 32 Pe Ngindrai ara neren kinnata Norun pwi, hapeko iyki yiy masih isa kili rou—pe neren kinna tan pwi. Pe yiy ara hu melit masih ipopo ko isa kili tou. 33 Yihu mepo Ngindrai kintakinimahu, ara hiyeh ilahiy para kiyki hu kaya nongan? Pwi, Ngindrai opu ara ipa worou, ara ndramat imwonen. 34 Pe hiyeh ilahi kiyki kora kultuw mwomwan? Hamou pwi. Kristus Yesu kinmat—pe ariya ko pwi, yiy ara kintine pe ita mwalen—pe ita kili Ngindrai iyapwen te niman mot, pe ngara kiro sopwat rou kiya totohun. 35 Pe hiyeh ilahiy para kiwiri worou kaya mawen namiliwai ta Kristus? Nopwaran, ndre ngandran, ndre mundruwai, ndre melit tundroisiy, ndre mwomwan, ndre kimat kinlahiy pwi. Hiyeh andre kiyki nopwaran, ndre tukaya nondriya ngandran, ndre kultuw para karandroyani rou, ndre song, ndre koiwe rou pwi, ndre mwomwan kisa puhunani rou, ndre kimat? Ara pwi masih. 36 Pwayan kinpwai pwen toro:
“Paratesah, isatam opu, yowu topo puhunani kimat lang masih,
pe worou rayah tehe sipsip para kaya tingundru hu.”
37 Pwi yoh, hu melit masih kene aro, ara worou kantamwaitiniy pwen, iyau kili yiy mepo ndriyan imbuluhi worou. 38 Paratesah, yo ulohonganiy tisingiy tehe kimat ndre taleh, ndre angelou, ndre payit, ndre tesah mahapo, ndre tesah itapo isa, ndre pwoke handra-handra, 39 ndre tesah ita paingan, ndre tesah ita mbulu pwan, pe melit masih kene mepo Ngindrai imangsaniy, ara andre kanlahiy para kasopwat rou kasa mawen namiliwai ta Ngindrai mepo ita kili Kristus Yesu Yapan torou.