9
Pol ndriyan irangsi hu para Yisrayel
1 Pe tesah upwai iyau kili Kristus, ara ndrokonan—pe kunpwasoyou pwi, pe Mwoiwan Haiyan andre kipwokeyani hingorowo. 2 Pe ndriyo, ara iporu namandran iya, pe lang masih ndriyo ngara kirang. 3 Paratesah, ulohonganiy para Ngindrai kiten ano mbukeno pe kuro mawen kili Kristus, tunan ara hu ndramiro, yihu mepo hu ndraye imwonen, 4 yihu ndramira Yisrayel. Pe Ngindrai andre kihang hu tehe hu norun kamai, pe pwoke mangannganan ara tahu, pe hu tapaniu, pe andre hu kawiri nongan para pwahanou, pe andre hukatotohun kiya yumwa totohun namandran, pe andre kipwatisingi nongan kiya kili hu. 5 Pe iyau yihu tumbu hu ara kahi tehe ndraye Kristus ara iyau kili hu, mepo yiy Ngindrai yapane melit masih. Pe andre kahari ngalan lang masih! Ndrokonan.
Pwoke nopwaran ta Ngindrai para kinima ndramat
6 Pe nongna Ngindrai, ara kinoho potiriyis pwi. Paratesah, yihu masih ara mepo hu ndraye Yisrayel, ara hu Yisrayel pwi. 7 Paratesah, huyau ndraye Apraham, hapeko hu masih, ara hu noru Apraham pwi. Pe susuran i, ara “Iyau kili Yisak opu, andre kipwaingani ndrayem hu aleheh.” 8 Nongan sahin iye yi, hu mbunah mepo hutopo nombuwe hu, ara hu masih noru Ngindrai pwi, hapeko hu mbunah mepo Ngindrai irandrangan opu, ara hu ara ko, hu ndraye Apraham imwonen. 9 Paratesah, nongan para tandrangan aro kinpa toro: “Kirahihini lengen imwonen, andre kumui kusa, pe Sarah andre kipo norun hamou kamai.”
10 Pe andre ariya ko pwi, hapeko noru Rapekah mwan malmou, tama hilu, ara hamou opu, mepo tumbu rou Yisak. 11 Pe tina hilu kinmwalahiy kinna ta hilu mapu, ndre hilu kanmbusi handra kultuw hiyan ndre mwomwan, pwi—pe tesah Ngindrai kintakiniman para kirayah, ara andre kisahamanan: 12 kinyau kultuw o pwi, hapeko iyau kili hiyeh mepo Ngindrai irakiniman—pe Ngindrai kinpwai pwen kinna kili Rapekah toro: “Ndrohan andre kirayah pwandrendres ta yiy mendreheh.” 13 Tehe pwayan kinpwai pwen toro: “Ndriyo imbuluhi Yakop, hapeko Esau ara umwisnani yiy.”
14 Pe worou andre kapa tesah? Ngindrai imbusi melit kinmwonen pwi, ndre? Pwi masih! 15 Paratesah, Ngindrai ipwai iya kili Mose ipa, “Andre kupwaingani koisirai to kiya kili yiy mepo koyu isikirani yiy, pe ndriyo andre kimbulihi yiy mepo ndriyo imbuluhi yiy.”
16 Pwen pe kinrayah kinyau namiliwa ndramat ndre kinyau melit imbusiy, ara pwi, hapeko irayah iyau koisirai ta Ngindrai. 17 Paratesah, Nongan Haiyan ta Ngindrai ipwai iya kili Paroh ipa, “Yo umbusi wou arayah king, ara ndroiyin aro, para andre kupwaingani pwoke to kiyau kili wou pe ngolo andre hu ndramat kapohowei kiya kol pwan masih.” 18 Pwen pe Ngindrai ipwaingani koisirai iya kili yiy mepo inamiliy para kiyki koisirai kiya kili yiy, pe imbusi paya ndramat iya pwokeyan iya kili yiy mepo inamiliy para kimbusi payan kiya pwokeyan.
19 Hamou ta wawu andre kipwai kisa kili yo toro: “Paratapeh pe Ngindrai iripo iyki konna rou manau? Pe hiyeh ilahiy para kihindrisani namiliwa Ngindrai?” 20 Hapeko wou ndramat wou tesah, pwen pe apa rakokowani Ngindrai? “Pe ilahiy kohoi penei iya pwan kiwong kiya kili yiy mepo ipene yiy kipa, ‘Paratapeh pe apene yo toro?” ’ 21 Pe tehen tapeh, ndramat para peneya kohoi ara ilahiy para kiwiri pwan hapwah ara ko, pe kipene hayah pe kihaiyani hu, pe hayah, ara para salpwore ko mwaihei, ndre pwi?
22 Pwen kapa Ngindrai kinamiliy para kiyingani ndrinalokuh tan pe kimbusi pwoke tan kisa yelan ngawan, ara andre kiyinganiy tehe ikaituwe ndriyan iho nondriya ndrinalokuh tan—hapeko hu melit mepo kanmwoimwoi para Ngindrai kipwalngani hu, ara andre kipwalngani hu. 23 Pwen kapa kimbusiy tehen tora para kiyingani ngana pwoke tan namandran kiya kili hu melit mepo koisirai tan iro kili hu, hu melit mepo kanmwoimwoi ita para hukawiri nganan— 24 pe worou i, worou mepo Ngindrai kinyoh rou pwen, worou para Yutah ko, ara pwi, hapeko yihu Ndramira Lah i. 25 Tehe Ngindrai kinpwai ita puk para Hoseya ipa,
“Hu mepo hu ndramiro pwi, ara andre kuyoh hu ndramiro,
Pe hu mepo ndriyo kinho mbuluhi hu pwi, ara andre ndriyo kimbuluhi hu.”
26 Pe andre kirayah manan kiro kol mepo Ngindrai ipwai iya kili hu ipa,
“Wawu ara ndramiro pwi,
hapeko kiro kol ara, andre kayoh hu noru Ngindrai mwalen kamai.’ ”
27 Pe Yisayah iwong pwokeyan iya kili hu Yisrayel toro,
“Konan ndromwoya hu Yisrayel ara tehe kalayeng para poho leng,
hapeko hu mepo masahayeh o andre Ngindrai kisopwat hu.
28 Paratesah, kindrou pwi ko,
Yapan andre kiramwanye hu ndramat para kol pwan porosih o ara pe pwen.”
29 Pwen tehe Yisayah kinpwai mamu pwen kinna ipa,
“Kapa Yapan Pwokeyan kitali hu ndraye rou hayah,
ara matisan tukarayah tehe hu ndraye kol Sotom,
pe matisan tukarayah pwen tehe yihu para kol Komorrah.”
Yihu Yisrayel kanpwotisingi lohongahu pwi
30 Worou andre kapa tesah? Yihu Ndramira Lah mepo hu konho ten kultuw imwonen pwi, ara hurayah ndramat imwonen. Pe lohongahu ipwotisingi Ngindrai pe kultuwayihu imwonen. 31 Hapeko yihu Yisrayel mepo hu ten nongan para pwahanou sahin para kultuw imwonen, ara hu kantayah ndramat imwonen pwi. 32 Paratapeh, kintayah tora kinna kili hu pwi? Paratesah, yihu kaniten kinyau lohongahu ndrisiyon pwi, hapeko irayah iya hu mbulen humbulyaniy. Pe huyos huya ndrita “pat mepo ngara kimbusi hu ndramat kayos.” 33 Pwayan kinpwai toro,
“Akanimei, yo usondritiyani pat sih ita ngondron Sayon para kimbusi hu ndramat kayos,
pe pat sih mepo andre kimbusi hu kayos,
Pe yiy mepo kipwotisingi lohongan iya kili yiy, ara andre kinmasi pwi.”