10
1 Wawu nali pe pisu, yo ngara kutohun kiya kili Ngindrai iyata hu Yisrayel pe namiliwo, ara para Ngindrai kisopwat hu. 2 Paratesah, ulahiy para kutiyani titiye tahu tehe yihu namiliy imwonen para hu kambusi melit kiho ndruwa namiliwa Ngindrai, hapeko tesah humbusiy, ara kinto lohongai hiyan pwi. 3 Pe yihu kanpahasani kultuw imwonen mepo iyau kili Ngindrai, ara pwi, pe huho ndruwa lohongahu mbukenan, pe hu konto pahandra kultuw imwonen ta Ngindrai pwi. 4 Nongan para pwahanou masih ara iyahapwen iya kili Kristus, pwen pe andre kultuw imwonen andre kiro kili hu masih mepo hupwotisingi lohongahu.
5 Pe Mose uratuluwi kultuw imwonen ita nongan para pwahanou, ara toro: “Ndramat mepo imbusi hu kultuw iye, ara mipwan tan ita hu kultuw ara.” 6 Hapeko nongan iwong iya kultuw imwonen iyau lohongai ndrisiyon ipa, “Ndriyam mbuna kipa, ‘Hiyeh andre kirip kiya kol paingan yang?’ ” (Nongan aro ara ipwai para karapiyani Kristus kisa mawen ndrohonokun), 7 “ndre ‘Hiyeh andre kituh kiya ndrohonoku suw?’ ” (Nongan aro ara ipwai para kihingini Kristus kitine kimat). 8 Hapeko nongan ara ipa tesah? “Nongan ara ita ndrahasam; pe ita pohom pe ita ndriyam,” Nongan para lohongai ndrisiyon yowu topo pohowei, ara ariyo ko: 9 Pe kapa apohopoh kiya pohom tehe “Yesu ara yiy Yapan,” pe ndriyam kipwotisingiy tehe Ngindrai ihingini yiy itine kimat, pwen andre Ngindrai kisopwat wou. 10 Paratesah, iyau ndriya ndramat hamou, pe ipwotisingi lohongan, pwen irayah ndramat imwonen. Pe iyau pohon mepo ipohopoh, pwen Ngindrai isopwat yiy. 11 Tehe Nongan Haiyan ipa, “Yiy mepo ipwotisingi lohongan iya kili Ngindrai ara andre kinwiri masirai pwi.” 12 Paratesah, Yapan ara ko, ara yiy Yapan ta hu ndramat masih pe ngara kipo hiyan o kiya kili hu masih mepo ngara hu katohun kiya kili yiy—pe kinoho hire hu para Yutah pe hu Ndramira Lah, ara pwi. 13 Paratesah, “Hu ndramat masih mepo hu kayoh kiya ngala Yapan andre kisopwat hu.”
14 Andre hu katohun kiya kili yiy mepo yihu kanpwotisingi lohongahu kinna kili yiy pwi, tapeh? Pe andre kapwotisingi lohongahu kiya kili yiy mepo hu konho hilingi yiy pwi, tapeh? Pe kapa hamou kinpohowe nongan kinna kili hu pwi, pwen andre hu kahilingi tapeh? 15 Pe andre hu kapohowe nongan tapeh, kapa kanpwandrisa hu pwi? Tehe pwayan kinpwai, “Hu mepo huwiri nongan hiyan isa, ara ndrikahu lahayan!”
16 Hapeko hu Yisrayel masih hu kanwiri nongan hiyan, ara pwi. Paratesah, Yisayah ipwai ipa, “Yapan, hiyeh lohongan ipwotisingi nongna yowu?” 17 Pe iro mwonen huhilingi nongan pwen huwiri lohongai ndrisiyon. Pe nongan huhilingi ara iyau nongna Kristus. 18 Hapeko usok upa: Yihu andre kanhilong pwi, ndre? Pwi, huhulong:
“Mbulu koyu hu kinna kene kol pwan masih,
Pe nongna hu, ara kinna kene mbusungo kol pwan.”
19 Pe usok paiwe upa: Andre lohongahu Yisrayel kinileu pwi, ndre? Ngindrai ipwai mamu iya kili Mose ipa,
“Yo andre kumbusi wawu kamaimai kiya kili hu ndramat hapat mepo yihu ndramat hapat pwi;
pe yo andre kumbusi ndriya wawu kilokuh kiya kili hu ndramat hapat mepo lohongahu kinileu pwi.”
20 Pe Yisayah ipwokeyani nongan ipa,
“Ngindrai ipa, ‘Yo uyarayah ngawan uya kili hu mepo hukaniten yo pwi,
pe yo uya pwaingani yo mbukeno uya kili hu mepo hu kansok yo pwi.” ’
21 Hapeko Ngindrai ipwai iya kili hu Yisrayel ipa,
“Lang masih nimo ngara kiyah kiya kili hu ndramat,
mepo hu konho hilingi yo pwi pe paya hu pwokeyan.”