11
Hu Yisrayel hayah hurondron
1 Pe nakusok toro: Ngindrai imwisnani ndramiran hu ndre? Pwi masih! Yo mbukeno ara yo ndramira Yisrayel hamou, pe yo tumbu Apraham hamou, uyau kamaye Penyamin. 2 Pe Ngindrai kinmwisnani ndramiran hu mepo kintakinimahu mamu pwen, ara pwi. Wawu pahasani Nongan Haiyan sahin ititiye iyata Eliyah—ikokou iya kili Ngindrai iyatahu Yisrayel ipa toro: 3 “Yapan, hukanitingundru hu poropet pe hurahasa hu pere tuntun tam; yo hamou opu urupondron pe hutopo hinonou para hu katingundru.” 4 Pe Ngindrai isomwi yiy tapeh? “Hu ndramiro manandrtipou, ara hutopo, pe hu kantukuruhu kinna kili Paal pwi.” 5 Pwen pe Ngindrai irakinima ndromwa ndramat hayah opu hutopo lang mahapo iyau pahas tan. 6 Pe kapa kiyau pahas, pwen kinyau mbulen o pwi; kapa tehen tora pahas ara, ara pahas omwaihei.
7 Pwen tesah i? Melit mepo yihu Yisrayel hu nohonou para hukawiri, ara hu kanwiriy pwi, hapeko yihu mepo Ngindrai irakinima hu ko, ara huwiri. Pe hu hayah ara paya hu pwokeyan. 8 Pe tehe pwayan kinpwai ipa:
“Pe Ngindrai imbusi hu humakokowu,
hayah mamarahu hapeko hu kannimnim pwi
hayah tahu mandraingahu hapeko hu konho tahilong pwi,
hutora tehen tora ko ipoo isa matne lang nepo.”
9 Pe Tepit ipa:
“Pe nondriya hu yon tahu Ngindrai andre kisingori hu, pe kipwalngani hu,
pe andre hu karayah pat para katuwani ndrika ndramat, pe andre hu kakuni kora mwomwan ta hu.
10 Pe mara hu kilokuh pe mbuna hu kanimnim
pe lang masih ndruwi hu ngara kiput kiya hu nopwaran tahu, paratesah, iya hu kultuw mwomwan tahu.”
Hu ndrandra kei rapairaniy huyappai
11 Pe usok paiwe upa: Yihu yos pe hupwokasiyani hu masih, ndre pwi? Pwi yoh! Pe hu Yutah huyos ara hu kanpwalngani hu kanna mwomwan masih, ara pwi. Paratesah, yihu mbusi pakut mwomwan, pe sopwat ta Ngindrai ara kinsa kili hu Ndramira Lah, para kimbusi hu para Yisrayel hu kamaimai. 12 Hapeko kapa mwomwan ta hu Yutah imbusi hiyan isa kol pwan, pe hundroisi hu melit para mwoiwahu, pwen hu melit ara imbusi hiyan iya kili hu Ndramira Lah, pwen ndromweyahu mepo hu nakawiri sopwat tahu, ara hiyan tahu andre kihon!
13 Yo urupo wong isa kili wawu Ndramira Lah. Yo ara aposel Ngindrai ipwandrisa yo, pe yo usikiye yo iya mbulyo isa kili wawu Ndramira Lah 14 pe andre kumbusi ndramiro hu imwonen para hu kandrangis kiya sopwat itapo isa, pe andre kusopwat hayah tahu. 15 Paratesah, kapa hurasisingat anna Ngindrai, pwen imbusi Ngindrai irakonuhi hu ndramat para kol pwan. Pwen tehe hukanmat pe husa mwalen paiwe. 16 Pe kapa ndrinanohun hambut ara kaikiy tehe yukyuk iho mu pe haiyan iya kili Ngindrai, pwen ndrinanohun mwamwayin masih ara, ara haiyan. Pe kapa ngondro kei hakou haiyan, ara hu ndrandran, ara haiyan i.
17 Kapa hu ndrandra kei hayah hu kaput, pe wou ara tehe sino holip hakou para yangiy, mepo wou tehe holip hayah mepo rapairaniy iyappai iya mwalinga hu holip hayah hiyan, pe mahapo ye ndrunun kintayah hiyan tehe ngondro holip opu, 18 pe mbuna asikiye wou kihohin kili hu ndrandran hayah. Kapa ambusiy tora, pwen ayirowei nokulaniy hiyan. Wou onho sotini ngondron pwi, hapeko ngondron isotini wou. 19 Pe andre wawu kapa, “Hu ndrandran huput huyau, para yo andre kuya rapairaniy kiyappai kiya aliy.” 20 Ndrokonan. Huput husa mawen, paratesah, hu kanpwotisingi lohonga hu pwi, hapeko wou aro tine iya lohongai ndrisiyon. Pe mbuna asikiye wou, hapeko anoh. 21 Paratesah, kapa Ngindrai kiniyki hu ndrandran ara para hu karo pe kalek pwi, pwen andre wou anto pwi yi.
22 Ayirowei, Ngindrai ngara kipo hiyan, pe kultuwayin ngandrahan i. Kultuwayin ngandran ngara kiya kili hu mepo humbusi pakut mwomwan, hapeko ipo hiyan isa kili wou. Pe Ngindrai ipoo hiyan isa kili wou para wou oro manau nondriya hiyan tan. Kapa pwi, wou ara andre Ngindrai kirawese wou yi. 23 Pe kapa yihu kanhitohai para kapwotisingi lohongahu pwi, pwen andre Ngindrai kirapairani hu kamui pwi. Paratesah, Ngindrai ilahiy para kirapairani hu kamui paiwe. 24 Hipwen para aliy, kapa Ngindrai kisondriti wou iya kultuwayim tehe holip hakou para yangiy mepo hiyan pwi, pe kamulan wou arayah hiyan pe kirapairani wou kiyapolo holip hiyan, ara hiyan masih para Ngindrai kirapairani hu ndrandra holip hiyan hu kamui kaya mbulpara holip imwonen!
Ngindrai andre kisopwat hu masih para Yisrayel
25 Wawu nali pe pisu, unamiliy para lohonga wawu kileu kiya nongan kokohe iye, pwen pe andre wawu kanpa lohongai waison iripo kili yowu, ara pwi. Ndriya hu para Yisrayel andre kiro pwoke manau, kipoo hu Ndramira Lah, ara ndromwoya hu kisahatek topwei hu kasa nondriyan kili Ngindrai. 26 Pwen pe Ngindrai andre kisopwat yihu para Yisrayel masih, tehe pwayan kinpwai:
“Sopwat ta Ngindrai andre kiyau te Sayon;
yiy andre kirapiyani kultuw pwassin kiya mawen kili hu ndraye Yakop.
27 Pe aro ara tapaniu to itapolo hu
kiro mwonen kurapiyani hu pakut mwomwan tahu.”
28 Yihu ndrihisani nongan hiyan, pe yihu mwisnani Ngindrai, hapeko Ngindrai kintakinima hu, paratesah, kintandrangan pwen kinna kili tumbu hu, 29 paratesah, yoholai ta Ngindrai pe yukyuk tan iya kili hu ndramat, ara andre kintapaiwani lohongan pwi. 30 Koluw wawu Ndramira Lah wawu ndrihisani nongna Ngindrai, pe mahapo wawu kanwiri koisirai, paratesah, yihu para Yisrayel hu ndrihisani nongna Ngindrai, 31 pwen pe yihu yi ara yihu ndrihisani nongna Ngindrai, pwen andre yihu mahapo andre kawiri koisirai tehe wawu wiriy yi. 32 Paratesah, Ngindrai imbusiy para hu ndramat masih hukoro nondriya ndrihisani nongan, pwen pe yihu yi, ara Ngindrai andre kipwaingani koisirai tan kiya kili hu masih.
Waliy para kahari ngala Ngindrai.
33 O wawu, ndrohonga lohongai waison pe lohongai hiyan ta Ngindrai pe menmenan ara soyon iya!
Kinlahiy para karatiyani tamwanye tan pwi, ndre kapahasani lohongan pwi!
Pe kultuwayin, ara kanlahiy para kayirowei pwi!
34 “Hiyeh ipahasani lohonga Yapan?
Ndre hiyeh ngara kipwahanou yiy?
35 Pe hiyeh andre kilahiy para kihang Ngindrai melit,
pwen pe Ngindrai kipo soiwin kimui kiya kili yiy yi?”
36 Paratesah, melit masih iro kili yiy, pe melit masih ara iyau kili yiy, pe yiy opu ara mbukena melit masih.
Pe koro hari ngalan lang masih! Ndrokonan.