12
Tukaiki tou masih tehe yukyuk para katimwiy kiya kili Ngindrai
1 Tehen tora ko, wawu nali pe pisu, urakamam isa kili wawu nondriya koisirai ta Ngindrai, para akaiki wawu tehe yukyuk sih mepo andre kinto-kinto, pe tehe yukyuk haiyan para mwan andre kitimwiy pe andre kiyki pwesai kiya kili Ngindrai—aro ara kultuw ndrokonan tawawu para totohun iya kili Ngindrai. 2 Pe wawu mbuna akatokuyani kultuw ta hu ndramat para kol pwan aro, hapeko wawu kapa hiyan kiya kili Ngindrai para kirapaiwani lohonga wawu kirayah howen. Pwen andre wawu kapahasani namiliwa Ngindrai ara tesah—namiliwan mepo hiyan, namiliwan pwokeyan mepo mwayih, pe andre kiyki pwesai kiya kili yiy.
Kaiki rou kaya pwan kiya mbuliya Kristus
3 Paratesah, iyau pahas ta Ngindrai opu mepo kiniykiy pwen kinsa kili yo, yo upwai isa kili wawu masih: Wawu mbuna akasap ngala wawu mbukenan kiya hin, hapeko akanim mwaniyani lohonga wawu mbukenan, kiro ndruwa ndrohonga lohongai ndrisiyon tawawu mepo Ngindrai kinhang wawu. 4 Pwen tehe nombuwe rou hakai-hakai iripo nombuwe rou hamou opu, pe hu nombuwe rou hakai-hakai aro, ara mbuliya hu handra ko pwi, 5 pwen pe tehen tora ko, worou soyon, hapeko nondriya Kristus, ara nombuwe worou ara hamou o. Pe worou hamou-hamou, ara para sura hu masih hayah i. 6 Pe Ngindrai iyki hu yukyuk handra-handra iyau pahas tan isa kiltou. Pe kapa ndramat hamou yukyuk tan para kiwong nongna poropet, ara kiwong kiho ndruwa lohongai ndrisiyon tan ara. 7 Kapa hamou para kisopwat poho mbulen, pwen kimbulyaniy, pe kapa hamou mbulyan para kihinuwani hu ndramat, pwen kihinuwani hu. 8 Kapa hamou atan para kipwokeyani lohonga hu ndramat, pwen kipwokeyani lohonga hu ndramat. Pe hamou atan para pomene hu ndramat, ara kipomene hu kiya ndriyan masih; pe kapa hamou atan mbuliyan ara poh, pwen kimbusiy kiyapolo ndriyan, pe kapa hamou atan para kipwaingani koisirai, pwen kipwainganiy kiyapolo pwesai.
Kultuw para ndriya ndramat kimbulihiy
9 Ndriya wawu kimbulihi hu ndramat ndrokonan. Pe akamwisnani kultuw mwomwan, pe akapwahatini kultuw hiyan. 10 P akaiki ndriya wawu masih kiya kiyata hamou-hamou kiyapolo kultuw para namiliwai. Wawu kahaiyani hu hayah kihohin kiya ata wawu mbukenan. 11 Pe wawu mbuna akakose kiya mbulya wawu, hapeko akaiki wawu masih kiya mbulya Yapan, pe akaro pwokeyani mwoiwa wawu. 12 Pe akapwes kiya tesah itapo isa, pe akahanokule nondriya hu nopwaran, pe akatohun lang masih. 13 Pe akataingani hu menmena wawu kiyapolo hu ndramira Yapan mepo hu ndroisiy, pe akorombusi kultuw para pwokere hu ndramat.
14 Pe akatoholi hu mepo huhingasi wawu; akatoholi hu pe mbuna akaten anna hu. 15 Pe akapwes kiyasura hu mepo hu pwes, pe akarang maliwawu kiyapolo yihu mepo hurang malihu. 16 Akapo hiyan kihisoule ko kiya kili hamou-hamou, pe mbuna akasikiye wawu, hapeko akasusuye kiyapolo hu ndramat mepo ngala hu pwi. Pe mbuna apa ndre apahasani melit masih.
17 Pe mbuna akapo soiwi kultuw mwomwan ta ndramat imbusi kultuw mwomwan isa kili wawu. Pe akanohonou para akambusi kultuw imwonen kiro mbulmara hu ndramat masih. 18 Kapa ara waison pe hiyan isa kili wawu, pwen ara ita kili wawu ko, akoropolo ndriya wayis kiya kili hu ndramat masih. 19 Pwen wawu kowase ndrokonan, wawu mbuna akapo soiwi mwomwan tahu ndramat, hapeko akaikiy kiya kili Ngindrai ndrinan kilokuh kiyata hu, paratesah, pwayan kinpwai pwen toro: Yapan ipa, “Kultuw para kapo soiwi mwomwan, ara to, yo ko andre kipo soiwi mwomwan kimui.”
20 Tehe nongan haiyan kinpwai:
“Kapa ndramat imwisnani wou ara kimundrui, ahang yiy anandrinai;
pe kapa koyun kisapak, ahang yiy hapesah para kiyin.
Kapa ambusiy toro, andre aiki masirai kimui kiya kili yiy.”
21 Pe kultuw mwomwan mbuna kiramwaitini wawu, hapeko kultuw hiyan tawawu kiramwaitini kultuw pwassin.