1 Hu ndramat masih kaiki hu mbukenan koro pahandra hu poh para kapman, paratesah, Ngindrai opu ngara kiyki pwoke nopwaran iya kili poh para kiro nimnim kiyata hu. Pe pohon para kapman mepo hutopo mahapo, ara Ngindrai iykiy. 2 Pwen yiy mepo kindrihisani pwoke nopwaran para kapman, ara ihindrisani nongan para pwahanou ta Ngindrai. Pe yiy mepo kimbusiy tehen tora, ara yihu mbukena hu andre hu kakuni kora hu. 3 Paratesah, hu poh para kapman, ara hu topo para kapanohowani hu mepo humbusi kultuw imwonen, ara pwi, hapeko yihu topo, ara iyata hu mepo hu mbusi mwomwan. Wou anamiliy para aro mwoimwoi kiya nohowai ta yiy mepo ita pohon kapman ndre pwi? Pwen akambusi kultuw imwonen, pwen andre kihari ngalam. 4 Yiy imbusi hiyan isatam, paratesah, yiy ara ndramat para poya mbulya Ngindrai. Hapeko kapa ambusi kultuw mwomwan, ara anoh kiya aliy, paratesah, hu poh hutora mbultuwe semela pahun o mwaihei, ara pwi. Yihu ara ndramat para poya mbulya Ngindrai, mepo pwoke ita kili yiy para kiyki konna kora ndramat para tandroindroi. 5 Pwen tehen tora ko, hiyan para worou tukoro pahandra poh para kapman. Pe worou mbuna akanoh kiya kora melit mwomwan, ara pwi, hapeko hingorowa wawu ipahasani tesah hiyan para akambusiy. 6 Pe tehen tora ko wawu ngara kayuk takis, paratesah, hu poh para kapman ara hu ndramat para poya mbulya Ngindrai mepo ngara hu kaiki hu masih kiya mbulya kapman. 7 Pe akarapaya nahanah para takis tawawu handra-handra kiya kili kapman: Kapa nahanah para takis ita kili wawu, ara arapayan; pe kapa kaiki kene mbulya wawu, ara akaikiy, pe kapa para akahaiye, ara akahaiye, pe kapa para karanuhuyaniy pwen akaranuhuyaniy.

8 Pe nahanah tam mbuna kiho ndron kili hamou, hapeko nahanah para ndriyam kimbulihi hamou-hamou opu kiro, paratesah, yiy mepo ngara ndriyan kimbulihi yiy mepo para pakeh kili yiy, ara imbusi nongan para pwahanou isahamanan. 9 Nongan para pwahanou ara ipa, “Ambuna apo pilah,” “Pe mbuna arut ngundru ndramat,” “Pe mbuna apahana,” ‘Pe maram mbuna kilimiriy menmena hamou,” pe sehe nongan para pwahanou hirandron, ara masih husa pahandra nongan sahin opu aro: “Ndriyam kimbulihi hamou tehe ndriyam imbuluhi wou mbukenam.” 10 Ndramat ndriyan ngara kimbulihi hamou, ara andre kinhingasi ndramat hamou para pakeh kili yiy pwi. Pwen tehen tora ko, kultuw para ndriya ndramat kimbulihi hamou, ara imbusi nongan para pwahanou isahamannan.

11 Pe akambusiy toro, lohonga wawu kileu kiya lang mahapo. Lenge wawu kinsa para akatali matiliu pe akapoyoi, paratesah, Kristus Yesu ndramat hiyan para sopwat rou, mepo lohonga rou ipwotisingi yiy mamu, ara kinsa pakeh. 12 Ping pakeh nakihipwen, pe lang nakileu ara. Pwen pe worou ara tukarakultuw hu kultuw para lokuhan kiro mawen pe tuka sohonge rou kiya menmena pahun para kapopahun koro nondriya nganan. 13 Pe tokuyarou ara kiro mwonen o tehe hu ndramat ngara karikai lang, pe mbuna tukambusi kultuw handra-handra pe mbuna tukayin ndran tunguyan, pe kambusi kultuw para pilah mepo pwassin handra-handra, pe mbuna tukarakokowai, pe mbuna tukamaimai. 14 Pe akawiri kultuwayi Yapan Yesu Kristus, hapeko mbuna akalohonganiy para akoho ndruwa namiliwai para hu kultuw pwassin para nombuwe wawu.