1 Ndramat mepo lohongai ndrisiyon tan kinpwoke pwi, ara arawuloh kiya tan kiya hu lohongan. 2 Ndramat hamou ara lohongai ndrisiyon tan, ara iya hiyan para kiyan melit masih, hapeko ndramat hamou mepo lohongai ndrisiyon tan kinpwoke pwi, ara iyan hu mbuwakei para piyang o. 3 Pe ndramat mepo ngara kiyan melit masih, ara mbuna kilohonge mwomwan kiya kili yiy mepo kinho yan pwi. Pe ndramat mepo kinho yan melit masih pwi, ara mbuna kirasusut nongan kiya kili yiy mepo ngara kiyan, paratesah, Ngindrai ipa hiyan iyata hu masih. 4 Wou hiyeh pe aparasusut nongan kiya kili ndramat para poya mbulya ndramat hamou? Ndramat para poya mbulen ara kirahatini ndre kiyos ara melit ta namandran tan. Pe andre kirahatini yiy, paratesah, Yapan opu ilahiy para kisotini yiy.

5 Ndramat hamou inime lang sih ara haiyan iya kili hu hayah, pe ndramat hamou, ara inime lang masih iyawule ko. Hamou-hamou kiro tine kiya lohongan mbukenan. 6 Ndramat mepo inime lang sih ara tehe lang ara mwayih, ara Yapan tehen aliy yi. Pe ndramat mepo ngara kiyan yohou, ara ihaiyani Yapan pe iyan, paratesah, irawuloh iya kili Ngindrai. Pe ndramat mepo iyindronge yiy, ara ihaiyani Yapan pe kinyan pwi, pe irawuloh iya kili Ngindrai i. 7 Paratesah, ndramat hamou, ara kiro mwalen kinnatan mbukenan o, ara pwi, pe worou mbukena tou ara tukanmu kinna kimat torou pwi. 8 Kapa tukoro mwalen, ara tukoro mwalen kili Yapan, pe kapa tukamat, ara tukamat kiro kili Yapan. Pwen pe tukoro mwalen ndre tukamat ndre, ara worou ta Yapan.

9 Paratesah tunan iye ko, pe Kristus imat pe isa mwalen paiwe, para yiy kirayah Yapane hu ndramat kanmat, pe topo mwalen kene yi. 10 Pwen paratapeh pe apire mwomwan ta nalim pe pisum pe arasusut anan? Ndre paratapeh pe anime nalim tehe yiy mwaihei o? Paratesah, worou masih andre koro tine nongan kiro mbulmara ndrohonoku pwanpwan para tamwanye ta Ngindrai. 11 Pwayan kinpwai toro:

13 Pwen tehen tora ko tukahatohai para karasusut nongan kiya kili hamou-hamou. Lohongam mbukenan mbuna kirkokowi nalim ndre pisum pe kisingori sayan. 14 Pe yo, ara lohongo ileu iya kili Yapan Yesu, pe upahasaniy tehe anandrinai handra ara pwalan pwi. Hapeko kapa hamou kipa anandrinai handra ara pwalan pwi, pwen iya kili yiy, ara pwalan. 15 Pe kapa nalim ndre pisum ndriyan kimwa, paratesah, iya tesah mepo ayan, pwen kultuw para namiliwai ara kinto kili wou pwi. Pe tesah ngara ayan, ara mbuna kipwalngani lohonga hamou mepo Kristus imat iyatan. 16 Pwen tehen torako tesah hiyan ngara ambusiy, ara mbuna kimbusi hu ndramat kawong nongan pwassin kisa kili wawu. 17 Paratesah, kolo king ta Ngindrai mepo ngara kiro mu kiya aliy, ara para kayan anandrinai pe kayin ndran, ara pwi, hapeko para kultuw imwonen, ndriya wayis, pe pwesai kiro nondriya Mwoiwan Haiyan, 18 paratesah, yiy mepo kipo mbulya Kristus iyau sai iye, ara iyki pwesai iya kili Ngindrai, pe imbusi hu ndramat huhaiyani wou.

19 Pwen tehen torako, tukanohonou para kambusi tesah mepo andre kisopwat hu ndramat para hu koro tine pwokeyan, pe kiluwani hu hamou-hamou kiya kultuw para ndriya wayis. 20 Pe anandrinai mbuna kimbusi wawu kapwalngani mbulya Ngindrai. Anandrinai masih ara mwayih o, hapeko mwomwan para ndramat hamou kiyan anandrinai handra mepo andre kimbusi ndramat hamou kiyos. 21 Hiyan para mbuna ayan yohou, ndre ayin wain ndre ambusi sehe melit para kimbusi nalim pe pisum kiyos.

22 Pwen pe tesah apwotisingi lohongam iya aliy, ara kiro mwalinga walu Ngindrai opu. Pwesai iya kili ndramat mepo ihimbunan mbukenan iya tesah ipahasaniy imbusiy ara hiyan. 23 Hapeko ndramat mepo ihundrundru ara mwomwan ita kili yiy kapa kiyan anandrinai, paratesah, kinyan kinyau lohongai ndrisiyon tan pwi; pe melit masih mepo kinyau lohongai ndrisiyon pwi, ara pakut mwomwan.