15
1 Worou mepo tupwoke iya lohongai ndrisiyon torou, ara tukasopwat pe kasotini hu ndramat mepo hu kanpwoke pwi iya lohongai ndrisiyon tahu pe kakuni hu nopwaran tahu, pe mbuna tukambusi melit para kiyki pwesai kisa kiltou mbukenan. 2 Worou hamou-hamou ara para hiyan ta ndramat para pakeh kiltou, tukambusi melit para kapwesani yiy pe kipwokeyani lohongai ndrisiyon tan. 3 Paratesah, Kristus ara kinmbusi melit para hiyan tan mbukenan, ara pwi, hapeko pwayan kinpwai toro: “Hu nongan hu pwasisiman ana wawu iya aliy, ara hu pwasisiman ano yi.” 4 Paratesah, hu nongan mepo kantatuluwiy mamu kinna, ara ratuluwiy para kiyki hinonou kisa kili tou, para kipwokeyani worou para tukoro tine pwokeyan, pe pwahanou para Nongan Haiyan, ara andre kimbusiy para tukapwotisingi lohongan tou kiya melit itapo isa.
5 Ngindrai mepo imbusi wawuho ndruwa Kristus Yesu, ara iyki kultuw para akasusuye kiya harong, pe irahatini wawu pe ipwahanou wawu para akoro tine pwokeyan, 6 pwen pe ndriya rou pe nongna rou, ara andre kiya wule handra ko para tukahari ngala Ngindrai pe Tamarou Yapan Yesu Kristus.
7 Pwen tehen torako, akarawulohani hamou-hamou tawawu tehe Kristus irawulohani wawu, pwen andre hu ndramat kahari ngala Ngindrai. 8 Paratesah, iya nongan ndrokonan ta Ngindrai yo upwai isa kili wawu, tehe Kristus ara irayah ndramat hamou para poya mbulya hu Yutah. Pe nongan mepo Ngindrai ipwatisingiy iya kili tumbun hu, ara andre kisahamanan. 9 Pwen andre hu Ndramira Lah kahari ngala Ngindrai kiya koisirai tan. Pe tehe pwayan kinpwai pwen toro:
“Yo andre kuhari ngalam kiro mwalingahu Ndramira Lah;
Yo andre kupa waliy kiya hu waliy para kuhari ngalam.”
10 Pe nongan ipwai paiwe yi toro:
“Kiya wawu Ndramira Lah, akapwes kiyapolo ndramiran hu.”
11 Pe nongan ipwai paiwe yiy toro:
“Wawu Ndramira Lah masih akahari ngala Yapan,
Pe wawu ndramat masih akapowaliy kiya hu waliy kiya kili yiy.”
12 Pe Yisayah ipwai paiwe yi toro:
“Hamou para Ndraye Yessi andre kisarayah,
yiy andre kiro mu kiyata hu ndraye ndramat masih,
pe hu Ndramira Lah andre hu kapwotisingi lohonga hu kiya kili yiy kiya melit itapo isa.”
13 Pe Ngindrai mepo ipwotisingi lohonga wawu iya melit itapo isa, ara andre kiyki pwesai kipep pe ndriya wayis kisa kili wawu para akapwotisingi lohonga wawu kiya kili yiy. Pwen pe andre wawu kapep kiya pwoke ta Mwoiwan Haiyan kiya melit itapo isa.
Mbulya Pol iya kili hu Ndramira Lah
14 Wawu nali pe pisu, yo mbukeno upahasaniy tehe wawu mbukena wawu, ara wawu pep iya kultuw hiyan, pe wawu pahas iya lohongai hiyan, pe wawu lahiy para akayuk pwahanou kiya kili hamou-hamou tawawu. 15 Pe nongan hayah uratuluwiy isa kili wawu, ara kunkule handra lohongai pwi, pe ipwai isa kili wawu para akalohonganiy paiwe yi, paratesah, iya pahas Ngindrai kiniykiy pwen kinsa kili yo. 16 Pe para kurayah ndramat hamou para poya mbulya Kristus Yesu kiya kili hu Ndramira Lah. Pe iyki mbulen para pris para pohoweya nongan hiyan ta Ngindrai. Pwen andre Mwoiwan Haiyan kimbusi hu Ndramira Lah karayah haiyan tehe yukyuk handra mepo andre kiyki pwesai kiya kili Ngindrai.
17 Pwen tunan ara ko, yo usikiye yo iya kili Kristus Yesu iya mbulyo iya kili Ngindrai. 18 Pe andre kunkose para kuwong kiya tesah Kristus kinmbusiy kinsarayah iyau kili yo, ara pwi. Yiy ipwokeyani yo pe uluwani hu Ndramira Lah para hu koho ndruwa Ngindrai, iya tesah upwai pe umbusiy— 19 pe iyki pwoke para kumbusi hu kaipisa pwoke pe hu kinima pwoke iyau pwoke ta Mwoiwan Haiyan ta Ngindrai. Pwen pe nongan hiyan ta Kristus, ara kunpohowei topwei, uro Yerusalem ipoo uya tusuye uya kol Ilirikum pe urakayaniy. 20 Hu kol mepo nongna Kristus kinna han kinna aliy mapu, ara namiliwai para pohoweya nongan hiyan, ara irayah kono para kuya pohowe nongan kiya kili hu. Pwen pe mbuna kumbulyani mbulya hamou mepo kintandroiyin ita. 21 Pwi, pwayan kinpwai pwen ipa toro:
“Hu ndramat mepo kanpohowe nongan kinna kili hu pwi, ara andre hu kanimei,
pe hu ndramat mepo hu konho hilingi nongan pwi, ara andre lohonga hu kileu.”
22 Pwen ndroiyin ara ko pe Ngindrai ipenani yo para kusa kili wawu.
Pol ilolohonge para kiya saisai kiya Rom
23 Hapeko mahapo lohongo iti wawu hayou soyon iya para kusa nime wawu, hapeko hakol kol kinto nondriya kol namandran hape iye para kuyapo mbulen kiya aliy, ara pwi. 24 Pe yo ulolohonge para kumbusiy tehen aliy kiromwonen kuya kol Spen. Pe ulohonganiy para kusa nime wawu kiromwonen kusayau, pwen upwes para kurosura wawu, pe andre akasopwat yo para tokuyo para nakuya kol ara. 25 Hapeko mahapo urupopo nakuya Yerusalem para kuya sopwat hu ndramira Ngindrai haiyan hutora aliy. 26 Paratesah, hu para Masetoniya pe Akaya ara hupwes para hu kayuk yukyuk kiya kili hu yau haiyan ta Ngindrai mepo hundroisiy hutora Yerusalem. 27 Pe hu pwes para hukambusiy tehen aliy, ara ndrokonan nahanah tahu iya kili hu Yutah. Paratesah, kapa hu Ndramira Lah hu kawiri lomwes tahu Yutah, ara nahanah tahu Ndramira Lah, para hukaposoiwin kiya kili hu ara lomwes para nombuwe ndramat. 28 Pe kiyamulan para kunmbusi mbulen aro kihipwen, pe kunimei tehe hu kanwiri hu yukyuk iye, pwen kiyamulan andre kuya kol Spen, pe nakusayau ara andre kusa saisai kusa kili wawu. 29 Pe upahasaniy tehe kiro mwonen kusa kili wawu, ara andre kuiki lomwes ta Kristus kipopo ko kisa kili wawu.
30 Wawu nali pe pisu, urakamam isa kili wawu, iya ngala Yapan Yesu Kristus torou, pe iya namiliwa Mwoiwan Haiyan para akorotine pwokeyan kisapolo yo pe akatohun kisato kiya kili Ngindrai kiya nopwaran to. 31 Pe akatohun para Ngindrai kisopwat yo kiyata hu ndramat mepo hukanpwotisingi lohonga hu pwi hutora Yutiyah, pwen yukyuk mepo kiya Yesrusalem ara andre hu ndramira Yapan hutora ariya, ara andre hukawiriy kiyapolo pwesai. 32 Pwen pe iya namiliwai pwokeyan ta Ngindrai opu, andre kusa kili wawu kiyapolo pwesai, pe andre worou masih kawiri pwoke. 33 Ngindrai para ndriya wayis kiropolo wawu masih. Ndrokonan.