16
Tawuloh ta Pol
1 Pe yo nakupwai kisa kili wawu tehe pisu tou Poupe, ara yiy pihin hamou para poya mbulen pe ngara kisopwat sios itakol ngawan Senkriya. 2 Usok wawu para akarawulohani yiy kiya ngala Yapan kisa kili wawu tehe yiy ara hamou yau haiyan, pe sehe melit indroisiy ita kili wawu, ara akasopwat yiy kiya aliy, paratesah, sopwat tan ara namandran isa kili yo pe hu ndramat soyon i.
3 Pe akarawulohani Prisilla pe Akwila, hilu mepo hilpo mbulen sura yo iya mbulya Yesu Kristus. 4 Pe hiluiki mwoiwa hilu para hilu kamat kiya mbulya Ngindrai sura yo. Yo ko kuntawulohani hilu pwi, hapeko hu sios masih ta hu Ndramira Lah, ara hu rawuloh iyata hilu.
5 Pe akarawuloh i kiya kili sios mepo ngara hu karawurehu koro suwe hilu.
Pe akarawulohani kowase imwonen Epenetus, yiy irapaiwani ndriyan imu iya kili Kristus iro kol namandran iya Esiya.
6 Akarawulohani Meri, yiy mepo ipo mbulya wawu pwokeyan.
7 Akarawulohani Antronikus pe Yuniyas, mepo yowu hapat pe yowuro nondriya kou iya wule. Pe hu aposel, ara hu kanpakeh kili hilu pwi, pe hilusa pahasani Kristus iho mu kili yo.
8 Akarawulohani Ampliyatus, yiy mepo kowase pe nere para pakeh kili yo, pe ngara kippai kiyapolo Yapan.
9 Akarawulohani Urpanus, yiy mepo ipo mbulen sura tou iya mbulya Kristus, pe kowase pe nere imwonen Stakis.
10 Pe akarawulohani Apelles, mepo iro tine pwokeyan iya nondriya hu nohonou handra-handra pe irahatini yiy iya mbulya Kristus.
Akarawulohani hu ndrai sih ta Aristopulus.
11 Pe akarawulohani Herotiyon, youlu ara hapat.
Akarawulohani hu ndrai sih ta Narkisus kiya ngala Yapan.
12 Pe akarawulohani Trayepena pe Trayeposa, hu pihin ara, ara humbulyani mbulya Yapan pwokeyan.
Akarawulohani kowase pe nere Persis, pihin hamou i mepo ngara kimbulyani mbulya Yapan pwokeyan.
13 Pe akarawulohani Rupus, Yapan irakinima hilu tinan, pe tinan, ara irayah tino yi.
14 Pe akarawulohani Asinkritus, pe Pilekon, pe Hermes, pe Patropas, pe Hermas, pe hu nali hu hayah i para sios hutora sura hu.
15 Akarawulohani Pilolokus, Yuliya, Nereyus pe pisun, pe Olimpas pe hu yau haiyan hutora sura hu.
16 Akarawulohani hamou-hamou ta wawu kiyapolo tahunghung haiyan.
Yihu sios masih ta Kristus, ara hurawulohani wawu.
17 Wawu nali, urakamam isa kili wawu, para akoro hinehes kiyata hu mepo ngara hu kambusi sopat, pe ngara kasingori saya wawu pe andre kimbusi wele hu ndramat kimai kiya hinonou mepo wawu kanwiriy pe hu kandrih. Akoro mawen kili hu. 18 Paratesah, hu ndramat tehen tora, ara hu konho mbusi mbulya Yapan Kristus torou pwi, hapeko lohongahu, ara purahu ko. Nongna hu andre kirang waison pe lahin para kipakarawani lohongahu ndramat mepo humakokowu. 19 Wawu ngara koho ndruwa nongna Ngindrai pe hu ndramat masih, ara hu kanhilong wawu pwen. Pwen pe upwesani wawu namandran iya; hapeko unamiliy para lohongai waison kiro kili wawu kiya melit hiyan, pe akoro mawen kili kultuw mwomwan.
20 Pe Ngindrai para ndriyan wayis, ara andre kindrou pwi kiraluluwi pwoke ta Sinai, pe kiyki yiy kisa pahandra wawu. Pahas ta Yapan Yesu torou kiro sura wawu.
21 Ndramat para susuyo Timoti irawulohani wawu, pe Lusiyus, pe Yason, pe Sosipata yi, yowu ara hapat para Yutah.
22 Yo Tertiyus, uratuluwi nongna Pol sahin isa kili wawu, para kirawulohani wawu iya ngala Yapan.
23-24 Pe Kayus mepo ipwokere yo, pe suwen ara yo pe hu para sios aripo ngara kapwes pe kambultere koro aliy, ara yowu rawulohani wou.
Erastus, yiy ara ndramat ngara kiro nimnim kiya sombule pat para kol namandran, pe nali tou Kuyartus ara hilu rawulohani wawu yi.
25 Wawu kahari ngala Ngindrai, para koro tine pwokeyan kiya lohongai ndrisiyon tawawu iya nongan hiyan pe iya pohoweya nongan ta Yesu Kristus, iya nongan ndrokonan kokohe mepo ikohon kili hu ndramat hasap iyau hasap kanna, ara isa yelan ngawan. 26 Hapeko mahapo hu nongan ndrokonan kokohe mepo Ngindrai kinto-kinto ipwandrandrahani hu poropet para hu karatuluwiy, ara kinsa yelan ngawan. Pwen andre hu ndraye ndramat para kol pwan masih andre hu kapwotisingi lohongahu pe hu koho ndruwan— 27 pe Yesu Kristus mepo yiy Ngindrai pe lohongan waison, ara andre tukahari ngalan lang masih! Ndrokonan.