1 Eto ungotena ere kogora amo ungotenau hamo te visi te amo iji tuho irari donda pure horoma aingeko avo irae au God na ungotenau irari bande nei embo ta ingeni na ae teho irerembari uhu i ta iraguja avo ikau humbuto daroho iresora. 2 Eto ungotena enda ei ta mihie amo uhu ta irari donda avo humbuto asukasi uje ue bija puri ue simba ue mihera. 3 Eto ungotenau hamo te visi te irae ahihi pere na mihiroro amo Keriso na hambaute avo ungotena joru ere ora 4 avoeto ungotena enda ta iji tuho irari hamo ga mihie avo houkari uje ae ue bija puri eagora te daingeto daroho irari donda humbuto hamo ta asukaehera avo hotembagora, amo hamo visi te amiga tapa uhu ta pambuto iresi uje ere ora. 5 Rate ari ainge ara God na ungotena ove ena amo daroho irari hamo ikau humbasi simba ue mihera amo God na ikasi oje ena amita hajire amo ungotenau jo ta Ahihi Otohu ikena iraguja. 6 Avoeto ungotena Bada ta irari degi ta irae enda ta hamo te visi te ga irari iji te Ahihi Otohu avoembo sovera ari humbuto mihie 7 teho tihi na kiari avo ae rate God humota ari na iragora. 8 Eto enda eita mihie ungotenau hamo te visi te avo toto pambuto ungotenau da be Bada ta degi pambuto iresi uje eagora te hamo ta sovera ari humbuto mihera 9-10 eto ungotena tapa na iji tutumota pambuto Bada ta tihi ta heteto mihiroro amina ungotenau ari tapa penite isapate enda ta mihie ere uahera avo siriketo hajire javotoho te sapura te ikau kesora avo eto ari avo hotembihe, ungotenau hamo iroutemo irae au amo ke peni be mane rate dombo be amo ari deina ururoro Bada na kito osa aisuja ari avo perekari eagora.

11 Eto Bada joru eagora avoeto embomeni na ke ingito jo haperekarote avoeto enana ta degi Keriso ta ke hande eagora. Eto dagota jo amo God na ere kogua te ungote tapa dagota jo kiagova uje ereona. 12 Eto ke erevi erera amo ungona dago ke be ava ke ae rate enana ungo oenga embo peni ke ijie embota jo avo hotembae ue ahe poekari sokova embomeni amita degi ke mine ava erera, amo dagota ari be avo ungona kito tunga javotoho ue ke mine enana ta degi aisova. 13 Eto dagota ke erevi eheketo kogue dago uha sapura ari ke ijie ere hotembiheva te God avoembo ere ora te dagota ke amo ke be ere hotembiheva amo ungoembo ere ora. 14 Eto Keriso ta osa ari peni vahai avo hotembihe haha puha eagora. Eto osa ari aita ere kogora amo embo vahai na embo tapa avoembo pehena te pehae toaehija amo embo tapa na pepehekaehera. 15 Eto amina embo tapa avoembo pehena avoeto embo na enda ta vasiri te irari iji te enana ta hamo ta ujeje neite neite avoembo mane iresora te embo enana embo peheto vasiri te erena amita uje avo asi iresora.

16 Avoeto iji eha eto ambota amo dago na enda ta hotembari na embo ari javotoho te sapura te avo mane sirikasora. Eto dagona Keriso enda ta mihinu amiga isa ue enda ta hotembari avo ere uahera te eha emikote ari ainge avo iraera 17 te embo amuna Keriso ta jo ta mihia amo ove eha ari ra te embo kihi enda ta vasiri na ari amo irae ehei ove eha ari avo pere mihia. 18 Eto ari amo God na eaguja amo mahu kihita ungotena amita kitoho rate Iesu Keriso ta pehari na peka humbuto peka humbari ta ke amo dagona hande ara ikena. 19 Eto ke erena amita be amo God na Iesu Keriso ta pure amina enda embomeni tapa ta degi peka humbuto enana ta ari sasapura avoeto kitoho ari ehako mane hotembasuja, eto duru javotoho erevi dagona hande ara ikena. 20 Avoeto dago Keriso ta ke hande ari embopora, amo God na pe dagota na embomeni ta degi ke eria avoeto Keriso ta javota erera amo ungo God ga peka umbuvujo. 21 Eto God na ari sapura irae embo Keriso ta degi embomeni ta ari sasapura tapa overekena avoeto ungotena amita jo ta mihera avoeto God na Keriso ta ari jajavotoho perekari avo ere kogua.