1 Eto dago God ta pure vahai embopo na ungo ari erevi ava erera amo ungo God ta hondate ari humbuheva avo be ambu ainge aja avojo 2 amo God na amita ke einge enu kajena “Eto na ungo kehene jo ehija iji te amo na ungota pari ingena eto ungo orekehena ijite amo na ungo hondate ehena”, ke ainge kajari mihia avoeto erena amo God na ungo jo ururou oreketo humbasuja iji amo eha oroho erevira.

3 Eto embo na dagota pure kito eoi sapura eaguja avo hotembihe dagota ari nei eagore embo hini kambari eagora ari avo mane eagora, 4 te ari tapa avo dago God ta ke agi ari embopo na ari avo embo na kiagora eagora avoeto osaga kiari iji te amo hamo ta sovera ari humbuto ngahia eto bouka humbari te, 5 hamo ta tari te, tipura ta gosukari te, embomeni na ereto ejembeto tari te, pure ngahia ari te, evo ae ari te, beuje te tapa amo sovera ue kiagora. 6 Eto embomeni na dago God ta pure ari embopo be kiagora dagota ari amo tongopa irae, hotembari javotoho ue, sausau ereto mane tumo eagora te embomeni tunga humbuto Ahihi Otohu ta ke be ari na embomeni osa eagora. 7 Eto God ta sovera humbuto amita ke be na ijie God ta isoro ari donda ingeni be ta eto anga ta jigito nununga ue mihera amo javotoho ari avo jigito mihera. 8 Eto dago nununga ue embona dagota javo otohu arote sapura aro, jakeka arote pehumba aro, dago ke be arote ke sokova aro avo tapa kesi nununga ue mihera. 9 Eto embomeni na dago kiari rate kiae ke ko eagora. Eto dagota hamo mahu pehari rate vasiri te mihera, eto embo na mahu tari pehari ke eagora te vasiri te mihera. 10 Eto dago tunga osaga ere kogorate tunga osa osa ue mihera eto dago ta degi donda irae rate embomeni isapamane na dagota degi ta donda ere humbuhora eto dagota hajae vajae irae rate dagota degi hajae vajae isapamane be mihia. 11 Eto da Corinth embomeni ungo ke erevi be ingova hariketo ke araha ta erera. 12 Eto dagona ungo jo tapa na osa ere ora te ungona jo tapa na dago osa mine ae 13 avoeto nau meniundi ungota hande mine inono ta ue jo tapa na osa evujo.

14 Eto ari jajavotoho te ari sasapura te vahaita iresuja amo sapura, eto ainge dombo usasa te mume te na vahai ta mane iresora avoeto God kiae embomeni ga kaju avojo. 15 Eto ungo kivujo Keriso te Satan te na tunga vahai ari inono rete? Ainge mane avoeto God ke be ari embo te God ke be ae embo te na tunga vahai ari inono aera. 16 Eto God ta bande Otohu aita amo God sokova ingeni na ari mane hambasora eto ungotena amo God ta bande otohura. Amita ke amo God na einge kajena “Eto embomeni nau amina nau irari bande ururoro na aita iresona, eto na enana ta God ururono enana embomeni nau aisora”. 17 Ke ainge ena eto Bada na ke nei einge ena “Ungo oenga iresi ue sasapura embomeni toto pambuvujo. Eto donda tapa tongopa te avo toto teho irirovo na ungo humbuto 18 ungota Mama ano ungo nau meniundi aisova, ke amo na Bada sovera isapamane te nanena erena”.