28
Tiuka javo Malta ta puvua
Eto dago embo tapa hora ta puvuo tiuka amita javo Malta avo eo ingia. Eto Malta embomeni na dago peketo hondate uo ga ihiketo venu dago jajemo unu ji undukeo evekihinu Paul na ituha jirembeto sundurari vahai ai o koso o jihuri ainge na jo ta horeto mihina avo humbuto ji ta ikenu evikihie vevere enu serimbeto puvuto Paul ta ingeni ta kambuto vahaikenu da asa embomeni na kito ke mine ara eto ke einge ea, “Embo emo embo tari embo rate eva piri na tae pehae puvei koso o na kambei pehasi ere ua.” ainge eo Paul na ingeni ihovekenu o koso o na ji ta veto evekenu memenga kiae eto nei do ae unu embo na Paul ingeni pajirou veto pehasuja avo hotembea eto iji koso simba ea Paul pehae enu kito ke einge ea, “Embo emo ahihi ra,” ainge ea.
Eto tiuka amita embo tihi jigari amita javo Publius amita da amo hoi ta mane avoeto ai pambuo dago kito pekari osa ari undurari javotoho unu amiga ai iji 3 mihie Publius ta mamo amita ambure sapura hamo vevere te se sapura te unu Paul na amita evari bande jo ta horeto pari ue ingeni hamo ta tembenu kojena. Eto embomeni na ari avo kito ambure embomeni humbuto puvutuhore Paul na pari uoi kokojikihahera. 10 Eto embomeni dago jakeka ue hande ikihahera eto dago pambasi uo dagota indari te o te umo te ikeo humbuto e nga jo ta ikea.
Dago Malta toto Rome ta pambua
11 Eto dago hariga tapa 3 tiuka Malta ta mihahera da Alexandria ta e nga vahai javo Ahihi Heriso amo pisara te jajemo iji avo eto mihahija amina pambasi unu kito e nga ai pambua. 12 Eto pambuto da Syracuse ta iji 3 irae enu 13 pambuto da Rhegium ta evio pisara kaina hena ta ihiketo puvutuhunu pahuo iji heriso irae unu da Puteoli Rome enda ta puvuto e nga toa. 14 Eto ai dagota namei kamei Iesu ta ambotani hambuo amiga irora ke eo ai hura vahai mihimihe ereto pahuo 15 dago ta namei kamei Rome ta iragora amina dago puvurari ke ingito puvuto market besi javo Appius ai namei kamei nei huna na puvuto hambuo amiga pambuhumihe namei kamei nei huna amo degi javo ‘Three Inns’ ai hambuto Paul na namei kamei kito tunga javotoho ue God jakeka ijie sovera ari humbuto Rome ta puvua.
Paul na Rome ta mihahija
16 Eto da Rome ta puvuo isoro ta tihi jigari embo na isoro embo vahai ikenu Paul bande nei ta humbuto simba ue mihahija. 17 Eto iji 3 irae enu da Rome ta Judea embomeni okokose jage enu puvuto vahai ta horukeo Paul na ke einge ena, “Nau namei kamei na ungotenau ari mahu ungotenau ohihi ta eto puvurari eto ungotenau embomeni ta degi sapura ae rate Jerusalem da ta na humbuto Roman embo ta ingeni ta ikehere tipura ta ikehera. 18 Eto Roman embo na na taro pehana eto nau sapura jombure eto hambae eto arahata pambana uje ehera te Judea embo na jo ngahia ehere kito 19 Rome embo okose ta degi pambasona ainge eto puvena rate na nau embomeni Rome embo okose ta tihi ta pehumba asi puvurae, 20 rate ungotena Judea embomeni na oreka embo vahai simba eagora avoeto na chain na ingeni ta pundurari avoeto ungota degi ke asi uje ehena.” ainge enu 21 enana na amita degi ke einge ea, “Eto dago ahari Israel ta eto umbae eto nei Israel enda ta namei kamei na duru humbuto puvuto ae ingae eto nei no degi ta sapura ari ke ae ingae 22 rate embomeni tapa na no pure embomeni vahai ta degi sapura ari ke eagora avo eto dago no ke be avo ao ingesi uje ere ora.” 23 ainge eto iji ikena avo puvunu embo isapamane puvuto Paul ta bande ta horuketo Paul ta ke ingia eto ihote eto mumete God na embomeni amita toho siriketo humbuto enana ta King asuja amita ke avo harikena. 24 Ainge Paul na ijinu embo nei uhoho na Paul ta ke avo ke be ijio embo nei uhoho na ke sokova ke ea. 25 Eto Paul na Moses ta ke pepeni te peroveta ta ke avo ehekihe Iesu amo embo ta orekari embo be avo puvuna 26 eto Paul na ke nei einge ena, “Eto peroveta Isaiah na ungota Ohihi ta jo ngahia avoeto enana ta degi Ahihi Otohu ta ke be avo einge ena, ‘Nau embomeni ta degi pambuto ke einge ejo. Eto ungo ingito ingito mane ingesova. Eto ungo kito kito mane kesova 27 amita be amo ungo oje sundurari eto tihi vahaikari eto uha sapura ari ra. Eto ainge ae amo tihi na kito oje na ingito uha na hotembeto nau degi ta puvutohururoro na ungo hondate ahena.’ ainge ungota ohihi avoembo God na enu peroveta Isaiah na kajena 28 eto ungo ainge iteko kogona,” ainge Paul na eto ke tutumota amo einge ena, “Ungo kogova amo God na embo oreketo humbasuja ke amo enda nei embomeni ta degi hande ore ere ingihera.” ainge enu 29 tapa sisiketo pahue jujune ke peni vahai be mine ara ijie pambua. 30 Eto jua heriso amita jo ta Paul na bande koro na ombuto humbuto mihinu embo na umoro puvutohuo Paul na pekari javotoho ue 31 God na embomeni amita toho humbuto enana ta King asuja amita ke te Bada Iesu Keriso ta ke avo joru ae ke tapa araha ta ahe poekihahija. (Eto Iesu ta ambotani ta ke ereita irae ua.)