6
Emone mamone te meniundi te ta ke
Eto ungo meni isasaraho ungo Keriso ta toho avoeto emone mamone agi ari ta jaha mane aisova te agi aisova. Eto God ta ke 10 Moses ta ikenu kajena ai ta ke vahai amo embo na agi ururou javotoho ari amita degi puvuroja God na oje ena amo erevira “No aja mama avo Otohu ue ke agi ejo” ke ainge mihia eto javotoho ari God na oje ena amo eingera “Eto ke agi ururovo God na au irari javotoho ue iji koso enda ta iresova” ainge God na ijie oje ena. Eto ungo emamo ta degi erena, amo ungota meniundi na ungota degi hini kambari eagora avo kaiketo mane isembasova te Keriso na embomeni ahe poekena ainge dombo ue oje kahihe ahe poekavo ari jajavotoho na pajirore.
Pure mamone te pure embomeni te ta ke
Eto ungo embo nei ta ke agi ue pure ari embomeni ta degi erena amo ungota pure mamone amo Otohu ue ungota jo te tapa na enana ta ke agi evujo, amo ungona Keriso ta ke agi eagova ainge inono ta enana ta ke agi evujo. Eto enana na ungo koguroro jakeka ari ta pure mane aisova te ungo Keriso ta pure ari embopo avoeto God ta uje avo jo tapa na eagova ainge dombo enana ta ke agi evujo. Eto jo tapa na pure ngahia asi ue embo avoembo mane aisova te Bada avoembo asi hotembevujo. Eto ungo kogova amo embo nei ta pure embo rete tohota pure embo re amo Bada na ari jajavotoho tapa kogue mine inono ta ikau humbasora. Eto ungo pure tihi jigirikari embopo ta degi ke erena amo ari javotoho ainge amina ungota ke agi ari embopo ta degi evujo. Eto enana tasi ke mane aisova te tihi jigari embo enana ta eto ungota amo uhu i ta mihia amita tihi ta amo embo nei peni embo nei isapa ainge manera te embo tapa inono inonora.
Ari sasapura ta degi isoro evujo.
10 Eto ke tutumota erena amo Bada ta sovera humbuto irivujo. 11 Eto Satan ta ke gamo ta degi isoro asi Bada ta ki emi te isoro donda te humbuto asevujo. 12 Amo ungotena embo visi te amita degi isoro ae rate mume ta tihi jigirikari Ahihi neite neite eto mume ta sovera neite neite amo Satan ta isoro ari embopo Ahihi sasapura ta irari degi ta isoro eagora amita degi isoro ereora 13 avoeto God ta ki emi tapa humbuto asuketo nununga evujo. Eto ari sapura puvuresuja iji te amo isoro ue mane veasoa te sovera ari humbuto heteto iresova. 14 Avoeto isoro embo na pupuri tigito eaguja aingeko God ta ke be jigito heteto irivujo, eto ungota jenge ta asukari amo javotoho ari na oreka aisuja. 15 Eto ungota utu goru amo God ta peka ta duru javotoho avo hembuhe hande asi uje evujo. 16 Eto God humota ari amo beha aingeko ungo oreka ururou Satan ta ki vevere te amina ikau puvuto ungo mane kajaro evekasova. 17 Eto ungo God na oreketo humbasuja amo ungota siro kope ainge hotembevujo eto God ta ke Ahihi Otohu na ikasuja amo isoro asivo aingeko avo ikau humbuto jigivujo. 18 Eto iji tapa ari tapa avoembo pari evujo amo Ahihi ta sovera na kaiketo pari ue siro pure eto God ta embomeni tapa hotembihe enana embo pari evujo. 19 Eto God na nau degi ta ke ikau ingito amita duru javotoho mahu ojikari avo joru ae ue embo ta degi hande ana pari evujo. 20 Amo na amita ke hande ari embo ‘Chain’ na tigere mihena te na embo joru ae ue sovera ari humbuto ke hande ana God na pari avo uje ere ua.
Pekari ta ke
21 Eto Bada ta ke agi ari embo javotoho ungotenau namei Tychicus amina ungota degi pambuto ke nau eto ari nau na do ereona amo amina au ingesova 22 avoeto ungota degi ikano pambuto dagota ke avo au ingito sovera ari humbasova.
23 Eto God Mamo te Bada Iesu Keriso te na ungo namei kamei ekalesia tapa ta degi pekari te osa ari te humota ari te avo ikaro humbasova 24 eto jo tapa na Bada Iesu Keriso osa eagora embomeni amita degi God ta hondate ari iresuja.