1 Eto na Paul te Timothy te amo Iesu Keriso ta pure ari embopo na ungo God ta embomeni Keriso ga kaju ari da Philippi ta miheva amite ekalesia ta tihi jigirikari embopo te hondate ari embopo te tapa ungota degi ahari erevi ere kajihera. 2 Eto ungotenau Mama God te Bada Iesu Keriso te enana ta hondate ari te pekari te ungota degi ikasora.

3 Eto na ungo hotembihe God ta degi osa ue 4 iji tapa ungo embo God ta degi pari eagona amo tunga javotoho be ue pari eagona 5 amita be amo ungona na ihiketo Keriso ta duru hande ea iji te eto puvuto eha oroho emite amo ungo na na hondate ue God ta duru javotoho embo ta degi hande ere ovova. 6 Eto na be kogona amo ungota jo ta amita pure ihikena embo God na pure javotoho avo mane toasuja te ungota jo ta pure ere uma Iesu Keriso ta puvurari ijite pure irae aisuja. 7 Eto amo ke be eto mahainge na ungo hotembihone jo eaguja amo pure nau God na ikena ai ta ungona kajueto ere ova amo na arahata mihie enda ta hembuhe ke sapura peikihe God ta duru javotoho avo hande ere uaehena amite eto eha tipura ta mihena emite amo ungona na hondate ere ova avoeto ungo osa ere ona. 8 Eto ke erena emita be amo God na ere kogua amo na Iesu Keriso ta jo ari na ungo osa peni vahai ere ona. 9 Eto ungota degi God kiari te ari sirikari te osa ari te ainge avo pajito inono ara God ta degi pari eagona 10 amo ungona ari jajavotoho davore avo be kiagova pari ere ona. Eto ari ainge avo ungota degi inono aro Keriso puvuresuja iji te amo amina ungota degi sapura nei do mane hambasuja. 11 Te Iesu Keriso ta ari jajavotoho amina ungota irari eneteto inono au kogurou God ta degi usasa te peka te puvuresuja.

12 Eto nau namei kamei, ungo be kiagova uje ere ona amo osaga memenga nau degi ta puvija amo God ta duru javotoho hande ari ta pure avo peni aja puvija. 13 Amita be amo na Keriso ta pure ari embo avoeto na tipura ehena avo tipura ta simba ari embopo te embomeni tapa eita mihera amite tapa amina na kiarira. 14 Eto na tipura ta mihena te ungotenau namei kamei na na kogue joru ae rate Bada ta degi hamo ta sovera ari humbuhe embomeni ta degi duru javotoho hande ere ora. 15 Eto ke nei amo embo nei uhoho na Keriso ta ke hande ere ora amo hini kambari na ere orate nei uhoho amo osari tunga humbari amina ke hande ere ora. 16 Eto enana osa ari na God ta ke hande ere ora embomeni amina na God ta ke avo simba ue hande ana God na umbuna amo embomeni amina kiari ra te 17 embo nei uhoho amina ungo oenga embo peni asi ue Keriso ta ke amo jo te tapa hande ae rate hamo na hande ere ora amo na tipura ehena avoeto nau degi ta osaga hamota hamota puvuroja ari ainge amo ere ora.

18 Rate ari ainge amo tehora. Embo nei amo ke sokova na hande ore embo nei amo ke be na Keriso ta ke hande ere ora te embomeni na Keriso ta ke hande ore embo na ere ingihera avoembo na tunga javotoho ere ona. 19 Eto na kogona amo ungota pari te Iesu Keriso ta Ahihi ta hondate ari te na aro tipura toto arahata pambasona avoembo humota ari ke be na osa osa te mihena 20 eto na jo tapa na uje ereona amo pure nau mane toasona te sovera ari inono ta humbuto eha oroho eto ambota amo vasiri te ironote pehano amo pure nau avoembo embomeni na Keriso otohu ue jakeka aisora. 21 Amita be amo na eha vasiri te iresona amo Keriso avoembo iresona rate Keriso vahai amita javota pehasora amo nau degi ta javotoho pere puvuresuja. 22 Avoeto pehanote vasiri te mihie pure javotoho nei anote, na do asona amo na be kiaera. 23 Jo nau amo herisora, eto na nau vasiri toto pambuto Keriso ga mihie irari javotoho humbasi uje ere ona. 24 Rate na uje nau avo toto ungo avoembo hamo te visi te ei ta iresona 25 eto na kogona amo ungota tunga javotoho ari te God humota ari te na peni vahai aja ungote iresona. 26 Eto na ungote mihirono ungo Keriso ga kajuari ai ta namo avoembo tunga javotoho ari pajire be humbasova.

27 Eto ke peni be amo Keriso ta ahepoekari avo kogue inono ta irivujo. Eto na ungota degi pambuto ungo kionote mane kiono ungo na jo vahai eto ari vahai na heteto God ta duru javotoho avo ke be ijie ari sasapura ta degi isoro ereova ke avo ingesi uje ere ona. 28 Avoeto ungota kitoho embo joru mane aisova te sovera ari humbuto ijirovo enana na kito ungona dembihirovo enana veasora avo ke be aisora amita be amo embo na dembari inono ae rate God na au dembasuja. 29 Eto ungo na Keriso ta pure ava God na umbuna amo ungota ke be ari amina pere mane rate ungota memenga osaga kiari amina Keriso ta pure ere ova. 30 Avoeto namoga kajueto isoro evujo. Amo isoro nei mane rate da ungota ta one kogueva eto oroho eagore ingagova isoro vahai aravora.