2
Iesu avo Mary na ingena
(Matthew 1:18-25)
Eto John meni isapa ta irari iji te embo peni Caesar Augustus na enda embo tapa census ue javo humbasi ke ikenu pambuna. Eto census umbae peko ta enda Syria ta gavana Querinius hetari iji te census aravo ihiketo ea. Avoeto embo tapa na pambuto tohota ohihi ta da be ai ta javo kajara ke ena.
Eto embo Joseph amo King David mahu mihahija amita ahije vahai avoeto da Nazareth enda Galilee jo ai ta mihimihe toto David ta da Bethlehem Judea enda ai ta pambasi ue Mary amo amita mahu kerari avoeto humbuto pambau census ta javo vahaita kajara humbuto pambuna. Eto Mary amo mahu urete ari avoeto da Bethlehem ai pahunu meni ingari iji puvunu amita kihi ta meni singa ingeto bo na togeto o ta indari ikari besi ai ta jurukenu evina, (bande tapa amo embo na enetari avoeto).
Anera na o ‘sheep’ simba ari embopo ta degi puvua
Eto enda ai ta o ‘sheep’ simba ari embopo na ehe tambuta o ‘sheep’ simba ere uahera amita degi Bada ta Anera na sariketo puvunu Bada ta usasa peni vahai na puvuto daha daha ue joekenu enana tututu ue joru uo 10 Bada ta Anera na enana ta degi ke einge ena, “Joru mane aisova te kivujo, tunga javotoho ari isapamane embo tapa ta degi puvuto ere hua amita duru avo humbuto ere puvuhona. 11 Amo Bada Keriso ungota orekari embo avo eha David ta da ai ta ungo avoembo e na eha ingehija. 12 Ungo amita hajire kesova amo meni avo bo na togeto o ta indari ikari besi ai ikehere mihia,” 13 eto ke ainge enu uhu ta Anera isapamane amina sasariketo puvuto God jakeka ijie haveni einge ea, 14 “God i ta amita degi osa jakeka erera eto enda ei ta God osari embomeni ta degi peka iroi,” 15 ainge eto irae eto uhu i ta pahuo o simba ari embopo na ke mine ara einge ea, “Bada na ke ikehei puvuto ehere ingera avo ungote da Bethlehem ta pambuto kesora,” 16 ainge eto ereto sausau pambuto meni o ta indari ikari besi ai ta jurukeo hereketo mihina amite Mary te Joseph te ainge hambuto 17 kito meni amita ke Anera na enu ingia tapa avo hande eo 18 embomeni na o simba ari embopo ta ke ingito mana mana ea. 19 Rate o simba ari embopo na ke ea tapa avo Mary na ingito amita jo ta hotembari isapamane ena.
20 Eto o simba ari embopo na pambuto Anera na do ea tapa avo ainge inono ta kia avoeto God osa jakeka ue egerembeto pambua.
Iesu ta javo ikea
21 Eto meni ingenu iji 8 irae enu Judea ta ke pepeni avoeto vi hamo tiukea. Eto Mary urete ae mihinu Anera na javo Iesu ikara ke ena avoeto meni ta javo Iesu ikea.
Meni Iesu humbuto Temple jo ta pene ikea
22 Eto meni humbuto doru eto mihina amita iji irae aja Moses ta ke pepeni avo agi eto da Jerusalem ta pambuto God ta degi hande pene gaga ta ikihe Iesu Bada God ta toho aja hande ikasi humbuto pambua. 23 (amita be amo God ta ke pepeni ke kajari ai ta ke einge mihia, evohu na meni singa bugo ingasuja amo God ta ke agi ue otohu aja 24 di dipo heriso ikarotemo di dirogu meni heriso ikaro avo Bada God ta ke pepeni avo agi eto Iesu humbuto pambua.) 25 eto embo vahai javo Simeon da Jerusalem ta mihahija amo embo javotoho eto God ta ke agi ari embo amina God na Israel embomeni hondate aisuja iji avo simba ere uahija eto Ahihi Otohu na amita jo enetihahija 26 avoeto amo mane pehasuja te kihi Bada God ta hondate ari Meni Keriso avo kito pehasuja avo Ahihi Otohu na harikenu ingina. 27 Eto Simeon na Ahihi Otohu ta ke agi eto temple jo ta horenu Mary te Joseph te na ke pepeni agi ue meni Iesu God ta toho aja humbuto horeo 28 Simeon na kito meni humbuto vinduketo God jakeka ijie ke einge ena, 29-32 “Bada God, inena embomeni no siriketo humbasi embo tapa ta tihi ta ereoa avo tihi nau na ere kogona amo enda nei embomeni na God ta usasa kesora eto embo tapa na Israel jakeka aisora, avoeto no ke ehei ingihana avo ejo no pure ari embo peka ta pambai,” ke ainge Simeon 33 na Iesu avoembo ijinu amita e te mamo te ingito mana mana eo 34 Simeon na e te mamo te javotoho ari iketo e Mary ta degi ke einge ena, “Kijo, God na au meni eremina Israel embo nei vihesuja nei veasuja. Eto meni emo God ta hajire avoeto embo isapamane na kito urumbasora. 35 Eto meni amina au embo ta hotembari jo ta ojikari avo arahata puvurou kesora. Eto jo no ta memenga osaga isapamane kesoa,” ainge Simeon na ena.
36 Eto evohu peroveta vahai javo Anna amo embo Phanuel ta iae eto amita ohihi javo amo Asher ra amo kakara ta embo jimbuto jua 7 ainge ena rate amita ivu pehenu 37 doru eto mihie amita jua tapa 84 avo humbuhunu evovo ena. Eto temple jo toto araha ta pambae asa jo ta mihie indari ajireketo God jakeka ijie ijite mumete pari ue mihahija. 38 Eto meni Iesu humbuto temple jo ta puvua iji amikote evohu Anna na puvuto meni avo kito God jakeka eto da Jerusalem avo God na oreto humbasuja iji simba ere uahera embopo amita degi Iesu ingari ta duru avo hande ena.
Da Nazareth ta egerembeto pambua
39 Eto Mary te Joseph te Bada God ta ke pepeni agi ue temple jo ta tapa eo irae enu tohota da Nazareth enda Galilee jo ai pambua. 40 Eto meni Iesu aravo pajito sovera ari te kiari te humbunu God na kito osa ue javotoho ari ere ikihahija.
Meni Iesu na temple jo ta ahe poekena
41 Eto jarukari ta pondo iji puvutohoi Iesu ta e te mamo te jua mahainge da Jerusalem ta pambuhahera. 42 Eto Iesu ingea avo jua 12 humbuhunu enana ta ari ainge avoeto pambae peko ta 43 pambuto pondo eo irae enu egerembeto puvutuhue meni singa Iesu amo asata mihinu e te mamo te na hotembae toto ere puvutohumihe 44 embo isapamane ere puvutuhora avoeto embo ga puvurari ke ijie toto pahuo iji irae enu Iesu kiae eto amita toho uho nei amiga irari ke ijie jombure ea rate 45 hambae eto egerembeto Jerusalem ta pambuto jombure ea. 46 Eto jombure uo iji 3 irae enu Iesu temple jo ta ahe poekari embo ga arumbeto mihie ke ijio ingihe ke mine ara ijie mihio hambua 47 eto embomeni na meni amita kiari te ke mine ari te avo kogue ingihe mana mana eto uje peni vahai ea. 48 Eto amita e te mamo te na kito mana mana ue e Mary na ke einge ena, “Nau meni, umo do eto dagota degi osaga ikehe? Namo te no mama te na umo hotembu hotembu ue iji koso umo jombure ehera.” ainge enu, 49 amina ke mine einge ena, “Ungo do eto na degi nei nei ta jombure eheve? Na degi neita iraerate nau Mama ta bande ta mihena avo ungo kiae ue jombure eheve?” ainge enu 50 ingito amita be avo deire avo hotembae ea.
51 Eto amina enana ga pambuto da Nazareth ai mihie e ta mamo ta ke tapa agi ena rate amita e na amita ari tapa avo jo ta ere hotembihahija 52 eto Iesu pajito kiari javotoho humbunu God te embo te na kito osa ea.