1 A, Pol, xen Sailas yuu Timoti, xen kɨvuu kɨyang ga vô xam Tesalonaika wê xam vông i vin Yesu ge. Xam tu il Mag Anutu yuu Apumtau Yesu Kɨlisi xe pyap.

2 Mag Anutu yuu Apumtau Yesu Kɨlisi yuu i vông xam dô vac vɨzid nivɨha dɨ vông kɨyang malehe i hɨvun xam xôn.

3 Xam lige, xe nɨlôm kɨdu xe om xe pɨmil Anutu ên xam tɨyi buc vɨhati. Môp tige môp bôbac, ên vông vinên wê xam vông ge dɨyêp xêkɨzêc dɨ vô levac tɨyi buc vɨhati, dɨ xam toto xêmyaa mi vin lecma nôn, dɨ môp xêmyaa vin lecên tige dɨvô levac vac xam mahɨgun tɨyi buc vɨhati. 4 Mêgem xe yong xam lêm vô levac vac konglegesen vɨyang vɨyang ge bêga ên xe nêbê xomxo vông vɨyin yuu myavɨnê levac vô xam lec wê xam vông i vin ge, lêcom xam le xêkɨzêc ta dɨ kɨlê vɨyin dɨ hôm vông vinên wê xam vông ge xôn pɨlihi.

5 Xam mi le xêkɨzêc ta vac vông vinên, om xam môp bêge nêl xam kɨtong ên nêbê Anutu yaxên xam ya môp bôbac, om gwêbaga xam kô vɨyin levac ên wê xam tu Anutu nue ge, lêcom vɨyin tige ob vông xam vô nivɨha tɨyi wê xam ob la dô vac Anutu ben lag puunê ge. 6 Dɨ Anutu ob vông môp bôbac ngwe hɨxôn bêga bê ob vông myavɨwen nipaên vô he wê vông vɨyin vô xam ge, 7 dɨ ob vô vɨyin vêl ên xam, dɨ ob vông il xôn dô seac vêl vô buc tɨmuên wê Apumtau Yesu hɨxôn angela xêkɨzêc wê i vông ge obêc sea ben lag puunê dɨ lop mɨ lam le seac ge. He ob lam hɨxôn ngwax mahelac levac, 8 dɨ ob vông myavɨwen nipaên vô xomxo wê lungên Anutu gee hɨxôn he wê vô nɨnya kɨtu vô il Apumtau Yesu xolac gee. 9 Om he ob kô myavɨwen nipaên bêga bê Apumtau obêc ngɨloo he la vêl tevabanê ên i manôn hɨxôn xêkɨzêc levac yuu xêseac wê i vông ge, om he ob la dô vac nipaên luta lêc luta 10 vô buc tɨmuên wê Kɨlisi obêc lop mɨ lôm ge. Vô buc tige xomxo wê vông i vin dɨ tu i nue gee vɨhati ob nêl Yesu lê vô levac dɨ pɨmil i hɨxôn xêyaa nivɨha yang. Mêgem xam êno ob vông bêge ên xam vông i vin Anutu kɨyang wê xe nêl vô xam ilage.

11 Xe xovô ên xe nêbê xe nêl xolac vô xam ilage dɨ xam vông i vin. Mêgem xe kɨtaa vô il Mag Anutu tɨyi buc vɨhati bêga bê i ngɨdu xam xôn ên xam tu xomxo nivɨha tɨyi wê xam ob vông môp yuu yuac nivɨha vɨhati wê Anutu tyuc xam ên nêb xam ob vông ge. Dɨ xe kɨtaa vô Anutu bêga bê i ngɨdu xam xôn ya xêkɨzêc wê i vông ge êdêc xam vông môp nivɨha vɨhati i tɨyi wê xam nêb xam ob vông ge, dɨ xam vông yuac vɨhati wê xam vông ên wê xam vông i vin Yesu ge i dɨyêp nivɨha. 12 Xe kɨtaa bêge ên xe nêb môp wê xam vông ge i vông il lig Apumtau Yesu lê i vô levac, dɨ Yesu i vông xam lêm i vô levac êno. Il Mag Anutu hɨxôn Apumtau Yesu Kɨlisi obêc vông bêge ya vɨzid nivɨha wê yuu vông ge.