2
Yesu itupuwa.
(Mat 1:18-25)
1 Nani maranai kiivavo ghamana Sisa Ogastas sisiya iterei da iyavo kava Rome damsi i rewapana gaburinai imakamakai na kudubisi vivavatura ita berai, kii vava ita giruma da iti yavisi. 2 Weni tuna na vivavatura karena maranai Kwiriniyas ivivi kiivavo Siriya dobunai. 3 Ma wawaya kudubisi ivovira i ku dobu da kii dam kamosiyai iti vavatura.
4 Tuna kubiine Gariri dobunai tomowa sago kana vava Josepa ivomiiri da ina kwanatu Nasaret ikiibutawei. Inae ina kaekiki David ina ku dobu, ku Beteliyem kwanatuna Judiya dobunai. 5 Josepa kana vopapara Meri na roperopeyina ma tuna yavata inae da iti vavatura. 6 Ma Beteliyem kamonai Meri ina mara inekiibau, damina iviiya da iti tuwa. 7 Vaghina ma ivi tuwa, natuna iyarokona ivi tuwei da tomowa. Ma pepeyina kwarewa sinasinamisiyai igerei. Ma numataya i numa itupo kubiine, ghamoghamo kii siga kamonai ivi kenai.
Sipu kii koyakoyagha ma aneya.
8 Ma Beteliyem ririnai tomotomowa viya warereyai ivivi makiiyana, didibarai i sipu ikoyakoyagha. 9 Ma Bada ina aneya inekiibau kurisi, ma bade Bada kana kadara ioru da gweyurina nani gawarina iyasegana yavui da sipu kii koyakoyagha iyabumana kirakai. 10 Ma aneyina ivonesi bo, “Ke kona yabumana. Kurimi apisi da vara biibiina ata vonemi. Weni varana kubiine, wawaya peyarisi ini nuwabiibii kirakai. 11 Karako David ina kwanatu kamonai kami Viviyawa itupuwa. Tuna na Bada, God ina Vivinevine Wawayina.*Keriso: Grik damsi gamosi evonavona bo ‘Keriso’ ma Hibru damsi gamosi evonavona bo ‘Mesaya.’ Ivi ruwa iyamna ‘God ina Vivinevine Wawayina.’ 12 Weni ini matakira kurimi da pepeyina kona panani, tuna kwarewa sinasinamisiyai igerei ma ghamoghamo kii siga kamonai ekenakena.”
13 Aneyina ivi sisiya ikovi na yaghiyaghinai aneya korotona ghamana inekiibau da God ivovokavakavari. 14 Peyarisi ivonavona bo,
“God kiidamo makamakiina tavokavakavari ma tighegheni da kana kadara ina rakata.
Ma iyavo kava dobuwai God nuwanuwami eviiviiya na ina nuwanuba gwabimiyai ina makai.”
15 Aneya ikuyowesi ighae ku kunuma na muriyai sipu kii koyakoyagha ti mani kamosiyai ivona bo, “Tanae ku Beteliyem. Ma weni berana Bada ivoneta da itupuwa na takitai.”
16 Yaghiyaghinai ivomiiri inae da Meri da Josepa ipananisi ma bade pepeyina ikitai, tuna ghamoghamo kii siga kamonai ikenakena. 17 Sipu kii koyakoyagha ikitai ikovi na ikikava aneyina wawaya kikei ivi sisiyei na peyarina wawaya ivonaveresi. 18 Ma iyavo kava ivi yanesi na kudubisi inota kavakavai. 19 Ma Meri na weni berasi kudubina ku nuwanuwana iterei ma ivivi nuwanotanotei. 20 Ma sipu kii koyakoyagha ivovira ku warere ma God ivivi ghegheni ma kana kadara ivovokavakavari iyamna bera ghamaghamasi ivi yanei ma ikitai. Ikikava aneyina ivonesi na nakanani ipanani da vonavaghata.
Yesu ivi vavei.
21 Meri ivi tuwa murinai mara ivi 8 ikovi na kana mara vaghata inekiibau da wawaya kikei kwimata bekana ita tuviviratawei. Ituviviri ma ivi vavei Yesu. Nani vavana na aneyina iverei ma muriyai Meri iropeya.*Lev 12:3; Luk 1:31
22 Ikikava Moses ina vonaviyoyovana iterei na kana mara vaghata ipisi na Josepa da Meri natusi ita kavari ita nae ku Jerusalem da Bada kurina iti maghibeyei ma taparoro babada iti biibiinisi,†Moses igiruma da wavine ini tuwa na tarana kubiine, tuna na puyapuyakina. Mara 40 ina kovi ma muriyai ina nae ku Taparoro Numana da taparoro babadisi ina suwara ina kapuni ma ini biibiini. 23 iyamna Bada ina vonaviyoyovana kamonai igiruma da Israel damsi natunatusi tomotomowisi iyiyarokosi na vovokaravisi ma God rapenai.*Exod 13:2, 12 24 Ma bade igiruma da gabubu ruwa bo kughukughu ruwa ita suwara da taparoro babadisi ita kapuni. Josepa da Meri nani girumisi inununuri da ivomiiri ku Jerusalem.
25 Ma Jerusalem kamonai tomowa sago imakamakai, kana vava Simiyon ma tuna na wawaya maninina ma God iyabuyabumanei. Ma ivivi koyakoyagha da Israel kana Viviyawa ita nekiibau, iyamna Kanuma Vovokaravina gwabinai irunuma 26 ma ivi debei kurina da muriyai da ina rabobo na matanai Bada ina Vivinevine Wawayina ina kitai. 27 Mara sago God Kanumina ivi nowei da Taparoro Numana garina ku kamona irui. Ma Josepa da Meri inekiibau, vonaviyoyovana inununuri da natusi Yesu ikavarapiyei ma ti bade irui. 28 Simiyon pepeyina ipewai ma God ivi ghegheni, ivonavona bo,
29 “Bada, ikikava kuriku vonakiiyapa bagibagina kuterei na karako berana itupuwa.
Tuna kubiine taku am bigabiga kevotaweku da ere nuwanubaku dobu ana kuyowei,
30 Iyamna karako matakuwai am Viviyawa akitai ikovi,
31 Am Viviyawa kuvovunaghi na dam ma dam kudubisi ina kitai.
32 Tuna am yasegana da ini debem kupuna damsi kurisi, *Isa 42:6, 49:6, 52:10
Ma bade tuna na kam kadara am wawaya Israel kamosiyai.”
33 Simiyon weni nakanani wawaya kikei ivi sisiyei na ina mamai da ina maduwa ivi yanei ma ivi deyei. 34 Ma Simiyon ivi biibiinisi ma Meri kurina ivona bo, “God weni wawaya kikina ivinei da tuna tepanai wawaya viya Israel kamonai ina tereoruwesi ma viya ina terepisi. Ma bade ini matakira da wawaya viya ina vonavikoniyei 35 na ti mani i nota gavugavusi ini debei. Ma tam ina maduwa na mara epipisi da nuwapoya nuwanuwam ina tonai.”
36 Ma nani kamonai kwapura sago inekiibau. Tuna na God ina peroveta ma kana vava Ana. Ina mamai kana vava Panuweru ma kii dam na Asera. Itavine ma madegha miikovimaruwa murinai ikwapura. 37 Ma namada imagura kirakai, kana madegha na 84. Mariyai ma didibarai Taparoro Numana ikivukivui da Bada ivovokavakavari, ivivi siya ma iniponipowana. 38 Ma kwapurina inekiibau da wawaya kikei ikitai ma God ivi kiikiiwei. Muriyai inae da iyavo kava nimonimoriyai Jerusalem kana Viviyawa ikoyakoyaghi da ita pisi ma iti yawasisi na kurisi wawaya kikei ivi sisiyei.
Josepa da Meri ivovira ku Nasaret kwanatuna.
39 Josepa da Meri, Bada ina vonaviyoyovana inunura bubuni da bera kudubina ivi kovini ma ivovira i ku kwanatu Nasaret, Gariri dobuna kamonai.*Mat 2:23 40 Ma natusi imagura ma ivi rewapana. Ina nuwagiura irakata ma God ina agabiibai gwabinai imakamakai.
Yesu gisinai inae ku Taparoro Numana.
41 Madegha nununai Yesu ina maduwa da ina mamai inumanumataya ku Jerusalem Pasova kamna kubiine.*Exod 12:1-27; Deut 16:1-8 42 Ma Jiu damsi i kiki inunuri da Yesu kana madegha ivi 12 na yavata inae nani kamna kubiine. 43 Pasova murinai Josepa da Meri ivomiiri, ibaba ivovovira i ku dobu. Ma ke itakovi da natusi Yesu iverukuyowei, tuna na Jerusalem kamonai imakai. 44 Inotai da tuna turaturasi kamosiyai. Tuna kubiine ibaba ku pom ma raviyai turaturasi ma i rakaraka kamosiyai iekwa kavai. 45 Ke ita panani na ivovirame ku Jerusalem da nani dobunai itekwai. 46 Mara aroba ikovi ma Taparoro Numana garina kamonai natusi ipanani, tuna vibeyebeyena wawayisi kamosiyai imakamakai da ivivi yanesi ma ivivi tarakiikiiyanesi. 47 Ma iyavo kava ivivi yanei da ikikava Yesu ina akova irakata ma ina nuwagiura tepanai ivonavonapote na peyarisi ivivi deye kirakiiyei. 48 Ina maduwa da ina mamai ipanani na inota kavakavai. Ma Meri ivona bo, “Akuu! Natuku, avi kubiine weni nakanani kuberai kurikai? Am mamai yavata kavi nuwapoya kirakiiyem da kaekwekwim.”
49 Ma ivi tarakiiyanesi bo, “Avi kubiine koekwekwiku? Tami kotakovi da taku na aku Mamai ina numiiyai ata makamakai.” 50 Ma ti na ke itakovi da aviyavisina ivivi sisiyei.
51 Nani murinai ina maduwa da ina mamai yavata ivovira ku Nasaret. Ma mara nonowa ina yawasa kamonai ivovotekatekesi. Ma ina maduwa na weni berasi kudubina ku nuwanuwana iterei da ivivi nuwanotanotei. 52 Ma Yesu imagura, tupuwina ivi rewapana ma ina nota ikiivimaguri da ina nuwagiura irakata. Ma God ma wawaya ku matasi tuna na wawaya biibiina da peyarisi ivi ghegheni.*1Sam 2:26; Prov 3:4
*2:11: Keriso: Grik damsi gamosi evonavona bo ‘Keriso’ ma Hibru damsi gamosi evonavona bo ‘Mesaya.’ Ivi ruwa iyamna ‘God ina Vivinevine Wawayina.’
†2:22: Moses igiruma da wavine ini tuwa na tarana kubiine, tuna na puyapuyakina. Mara 40 ina kovi ma muriyai ina nae ku Taparoro Numana da taparoro babadisi ina suwara ina kapuni ma ini biibiini.
*2:23: Exod 13:2, 12
*2:32: Isa 42:6, 49:6, 52:10
*2:41: Exod 12:1-27; Deut 16:1-8
*2:52: 1Sam 2:26; Prov 3:4