2 Tesalonika
Paulo yona leta helabuina ye lau ekalesiya Tesalonika unai taumiya udiyedi
Buka ta hededehemasalahana
Apostolo Paulo maiyana Sailasi yo Timoti yodi leta bagubagunana se kuli ekalesiya magai Tesalonika unai taumiya kalidiyena (1 Tesalonika). Na huyana nige ye loha kabo Tesalonika wasadi se lapui meta pilipili yo nuwatupwano hesau ye tubu kalidiyena. Unai teina leta helabuina ta (2 Tesalonika) hinage se kulilaei udiyedi. Yodi huyakulina bolimaina wa meta 51 o 52 ad. Huyana ne unai taudi haiyona wa se miyamiya magai lakilakina Kolinito unai.
Teina leta ta nuwanuwatuna meta siya Tesalonika unai ekalesiya wa yodi nuwapwanopwano, kaniyona ede tamowai hekadiyo se hededepeloweta bena Guiyau yona huyaꞌuyoma mayadaina ye laomako (2 Tesalonika 2:2), yo hinage taulaulaugaibu tamowaidiyao wa sola luwadiyena se miyamiya (1 Tesalonika 5:14 yo 2 Tesalonika 3:6-15). Unai teina leta ta Paulo ye kuli na ye hededebayaolau kalidiyena. Yona kabahedehedede haiyona:
(1) Guiyau yona hekasa mayadaina meta sola matadiyena, na mayadaina ne unai yona hekasa ne kabo se dudulai (2 Tesalonika 1:5-10).
(2) Kawayagala lakilakina kabo ye tububaguna, na mulina ne unai kabo Guiyau yona huyaꞌuyoma mayadaina ye laoma (2 Tesalonika 2:1-12).
(3) Taba tabu se miyamiyagaibu, na bena se bom yodi se paisowa (2 Tesalonika 3:6-15).
Buka ta hedehededena lakilakidi
• Lautoki 1:1-2
• Guiyau yona huyaꞌuyoma ne unai kabo tamowai ye hekasadi 1:3-12
• Guiyau sola nige ye uyoma 2:1-12
• Taba se tolobayao 2:13-17
• Taba se tapwalolo yo se paisowa 3:1-15
• Kabagehe tapwalolona 3:16-18
1
Lautoki
1 Teina kulikuli ta meta Paulo, Siluwanusi,**Siluwanusi meta Sailasi hesana Loma kalinadi Latini unai. yo Timoti, kai ka kuli ye laowa Tesalonika yona dubu tamowaidiyao, komiu kaiteyadi Yaubada Tamada yo Guiyau Yesu Keliso udiyedi taumiya wa kalimiuwai.
2 Taba Yaubada Tamada yo Guiyau Yesu Keliso yodi kabinamwa yo nuwadaumwali se lediwa kalimiuwai.
Paulo yodi ye lautoki yodi sunuma hesabana
3 Kama kahao, hesabamiu na huya maudoina taba Yaubada ka laulautokiyei. Teina ta ye namwakalili matawuwuna ede yomi sunuma meta ye kini ye laki ye laulau na yomi haigadogadosisiꞌuyoigomiu ne meta huya maudoina ye laki ye lau. 4 Unai ma nuwanamwamai na wasamiu ka hedehededehemasalaha Yaubada yona tamowai bodadi maudoidi udiyedi, kaniyona ede hewaiunu yo pilipili udoiꞌudoi kwa hekalodi ne udiyedi kwa tolotahitahi yo kwa sunumabayao.
Paulo ye hededehebayaodi hewahewaiunu luwanaena ye wane, Yaubada yona hekasa kabo se dudulai
5 Ginauli maudoidi ta meta se hemamohoi ede Yaubada yona kitahekasa ne se dudulai, na teina unai ede Yaubada ye kitahenamwagomiu yona basileiya hesabana. Basileiya ne debanaena ede teina kamkamna ta udiyedi kwa kamkamna. 6 Yaubada yona hekasa ne se dudulai, na kaiteyadi se hemiyapilipiligomiu, iya kabo ye hemiyapilipilidi, 7 na komiu taupilipili kabo ye hesaguhaigomiu yo kai kabo hinage. Teina ta kabo ye masalaha huyana yoda Guiyau Yesu galewa ne unai ye masalahama kaiwa kalapulupululuna**Kaiwa kalapulupululuna ta meta nige hekilaino kaiwana kalakalasina, na Yesu yona didiga yo gigibwali hekihekinoidi. luwanaena, yo yona anelu gigigigibwalidi maidanao. 8 Na kaiteyadi siya Yaubada nige kabina se kata yo yoda Guiyau Yesu Keliso wasana namwanamwana nige se kawakabiyei meta iya kabo ye hekamkamnadi. 9-10 Guiyau yona huyaꞌuyoma mayadaina ne unai kabo heyababa nige kana siga unai ye hekamkamnadi yo Guiyau matanaena yo yona gigibwali didigana unai ye tolehesuwaladi. Mayadaina ne unai kabo yona tamowai se hededetausaei yo se nokoei, siya kaiteyadi taukawamamohoiyeina maudoidi. Yo teina ta meta komiu kabo maidamiyao, matawuwuna ede yoma hededehemasalaha kalimiuyena wa kwa kawamamohoiyei.
11 Unai huya maudoina yomiu ka tapwatapwalolo taba yoda Yaubada ye henonohaigomiu na yona yoganeigomiu ne kwa miyahedudulai, yo taba yona gigibwaliyena ye saguigomiu na laulau namwanamwadi kwa gadosisikaliliyeidi ne se masalaha kalimiuwai na yomi sunuma paisowana kwa ginaulinamwanamwaeidi. 12 Unai kabo tamowai maudoidi yoda Guiyau Yesu hesana se hekasisiyei komiu debamiuyena, na komiu hinage se hededetausaeigomiu iya debanaena. Teina ta yona kabalaoma ede yoda Yaubada yo Guiyau Yesu Keliso yodi kabinamwa.