1 Huyana hetala gegagega wa ye gehe kabo Paulo tau hemuliwatani wa ye yogagogoidi na ye hedede hebayaodi, na kabo ye laukaiyoniyedi na ye dahalai ye lau Masedoniya. 2 Masedoniya tehana maudoina ye tauhetakikili, na tausunuma tamowaidiyao wa ye hedede hebayaodi, na kabo ye kadau ye dobi Akaiya* Dimdim unai se kuli Greece, iya ede Giliki kalina Saliba unai, meta Akaiya hesana hesau. . 3 Temenai ye miya nawalai haiyona, na kabo ye kabinonoha na bena ye gelu ye lau Siliya. Na ye lapui meta Dius tamowaidiyao se koitalaliu bena kabo se unui, ede nuwana ye hineli uyoi bena ye seuyo Masedoniya. 4 Paulo tau hemuliwatanina kadau ta unai, siya ede teina: Sopatelo meta Pilas natuna, iya Beleya tamowaina; Alistakas yo Sikandas Tesalonika tamowaidiyao; Timoti; Gayas Debi tamowaina; yo Tikikasi yo Tolopimas siya teha Eisiya tamowaidiyao. 5 Teina tamowai ta se baguna se lau Tolowasi unai se nayanayaigai* Luka ye kuli kai gonogonowana doha Apo 16:10 unai. Kaniyona ede iya hinage Paulo maiyana se miyamiya Pilipi unai na kabo se dahalai se kadau. . 6 Na kai Pilipi unai ka miya, na Pwalawa Nige Yistina Henuwaisinina mulina ena kabo ka gelu. Na mayadai haligigi ka kadauyei, kabo ka duna Tolowasi unai kama kahao wa ka lobaidi, ede temenai ka miya mayadai haligigi-labui.

7 Yoma miya Tolowasi unai mayadaina gehegehenana meta Sabati* Sabati ta meta Dius yodi huya kaiyawasi mayadaina, iya ede yoda Satade. , na memelahina ne unai ka laomagogoi numa hesau unai bena Guiyau yona kaikaigogo henuwaisinina ka hai. Na Paulo ye lauguguya tamowai wa udiyedi, na ye hedehedede ye lau ee boniyai duwaduwalina, matawuwuna mala ye tom kabo ye dahalai uyo. 8 Numa wa heisina hehaiyonana yoma kaba koigogo bilina unai meta lampa gwaudi se gabudi na se kalakalasi. 9 Na bili wa windona unai hewali hesau ye tutuli hesana ede Yutikas, Paulo ye hedehedede ye lau ee hewali wa matana ye kenokeno ede ye keno. Na ye kenomwaloi ede ye beku ye dobi bwatano wa unai ye talu. Na se dobi se hai wa meta ye boitako. 10 Paulo ye pesa ye dobi ede ye gulidobi hewali wa unai na kewana ena ye sapwali, na kabo ye hededelau tamowai wa udiyedi ye wane, “Tabu kwa nuwadubu! Hewali ta ye silasilawa, nige ye boita.” 11 Na kabo Paulo maidanao tamowai wa se mwalae se seuyo bili wa unai na Paulo pwalawa ye hai ye kesi na maudoidi se kaikaigogo. Na ye hedehedede ye lau ee mala ye tom kabo ye lautokiyedi na ye laugabaedi. 12 Na hewali wa ye namwanamwa, unai nuwadi se talu na se lau magai.

13 Tolowasi unai Paulo hineli ye ginauli meta ye bom ye yona ye lau Asosi, na kai meta waga ena ka gelu ka baguna ka lau magai wa unai iya ka nayai. 14 Asosi unai ye lobaigai ede ka usai na ka lau Mitilini. 15 Mayadai helabuina Mitilini unai ka gelu ka lau Kaiyosi bwanabwanaluwana ka laugabaei, na mayadai hesauna unai meta Samosi unai ka duna ka kaiyawasi. Na mayadai hehasina unai Miletusi unai ka duna. 16 Paulo ye nuwatuhekasa nonohaiyako meta taba nige Epeso unai se duna, matawuwuna meta nige ye henuwa mahana ye gabaei teha Eisiya ne unai, na ye henuwa bena ye lau mwamwayau ye lau Yelusalema na kabo Pentekosi mayadaina henuwaisinina.

17 Miletusi unai Paulo wasa ye hetamali saei Epeso, bena dubu babadadiyao se dobima na maiyadi se hedehedede. 18 Se dobima Paulo se hailobai na kabo ye hededelau udiyedi ye wane, “Huya bagubaguna yogu lage teha Eisiya ta unai ye laoma ee teina mayadai ta unai meta yogu paipaisowa maudoidi kabidi kwa katako. 19 Guiyau yona paisowa ta ya ginauli ma nuwadobidobigu yo ma matasulugu. Na laukita ya hekalodi meta Dius tamowaidiyao hekadi se koitalaliu bena se unuigau. 20 Yo hinage kabina kwa katako meta ma nuwabayaogu kaba saguigomiu Guiyau wasana ta ya lauguguyaei boda matadi yena yo numa kesega kesega udiyedi. 21 Huya maudoina ya hededelau Dius yo Giliki udiyedi bena taba se nuwabui yo se patulau Yaubada unai yo Guiyau Yesu se sunumaei.

22 Na Yaluwa Tabuna yona lauheliligau ta unai kabo ya lau Yelusalema, na nige kabina ya kata menai kabo saha ye tubu kaliguyena. 23 Na yogu kaba lau magaidi lakilakidiyao maudoidi udiyedi meta Yaluwa Tabuna ye hekatagauko kabo Yelusalema unai se tolegau numa tutugudu unai yo se hekamkamnagau. 24 Na iyamo yogu mauli meta nige ya modei, Guiyau Yesu paisowa ye haiyama ta taba ya hegehe. Na paisowana ede meta Guiyau yona katekamkamna yo yona gadosisi wasana hededehemasalahana tamowai maudoidi udiyedi.

25 Na kabina ya kata komiu kaiteyadi Guiyau yona basileiya wasana ya lau guguyaeiyako kalimiuyena ta meta taba nige kwa kita uyoigau. 26 Teina unai ya hededelaowa maudoimiu kalimiuyena: Ena kaiteya ye boita na ye lau kaiwa kalakalasina unai, giluna meta yau nige kaliguwai, 27 matawuwuna yau nige ya matausi yo nige ya talutolo, na Guiyau yona nuwatu maudoidi meta ya hededehemasalahadiko kalimiuyena. 28 Unai kwa kitahetete uyoigomiu yo hinage Yaubada yona mamoe yawoina* Mamoe yawoina iya ede ekalesiya bodadiyao heyaheyasonina; Act 20: 29 unai hinage. kwa kitahetetedi. Yaluwa Tabuna ye hetologomiu komiu tau woyawoya, unai Yaubada yona ekalesiya bodadiyao iya kwasinana unai ye hemaisahaidiko wa kwa kitahetetedi. 29 Kabina ya kata kalili meta yau ya laugabaeigomiu ta mulina ne unai kabo taulauhekata lupolupo doha kedewa kaikaikalasidiyao se laoma luwamiu yena, na Yaubada yona mamoe yawoina kabo se hetatagwaligwalidi. 30 Yo hinage bodamiu ta unai kabo tamowai hekadi se tolosaema na hedehedede lupolupo se ginaulidi bena Yaubada yona tamowai se woya hesuwaladi. 31 Unai bena matamiu se nega yo kwa kita namwanamwa kalili! Bena kwa nuwanuwatui meta bolimai haiyona udiyedi nige ya kaiyawasi na boniyai yo mayadai ya hedehedede hasahasaigomiu ma matasulugu.

32 Unai Yaubada nimana ena ya tolegomiu. Yona katekamkamna yo yona gadosisi wasana bena kwa nuwanuwatui. Wasa wa gonowana ye hebayaogomiu yo yona kainauya* Kainauya ta meta Yaubada yona hededehesunuma maudoidi yona tamowai udiyedi, doha mauli nige kana siga, Yaluwa Tabuna, yababa nuwatugabaedi, galewa, yo yona henamwa maudoina. ye mosehekawa kalimiuyena doha hinage ye mosei yona tamowai* Yaubada yona tamowai meta kalina Giliki unai kaniyona ede tamowai Yaubada ye heꞌaꞌadi na se dudulai iya matanaena. maudoidi udiyedi.

33 Yau sola nige tamowai hesau yona moni o yona gogo gole o siluba, yo kana kaleko ya henuwa na ya haigaibui. 34 Komiu maudoimiu kabina kwa kata meta yau nimagu ta unai ya paisowa, na paisowa ya ginaulidi ta meta udiyedi yau yo kagu kahao ya saguigai. 35 Ginauli maudoidi ya ginaulidi ta udiyedi ya hekatagomiu meta bena kwa paisowa bayao deha tamowaidiyao kwa saguidi. Ginauli ta kwa ginaulidi na Guiyau Yesu yona hedehedede kwa nuwanuwatuidi, doha ye wane, ‘Taukaikainauya kabo namwa ye lobai, na kabo kainauya tauhaina.’* Yesu yona hedehedede ta kulibuina ye pilipili. Meta hinage gonowa ta kulibui ta wane, ‘Taukaikainauya ye gwauyala na kabo kainauya tauhaina.’, yo hinage, ‘Ta kaikainauya meta laulau namwanamwana, na kabo kainauya ta haidi.’”

36 Paulo ye hedehedede gehe kabo maiyanao se tulibono na ye tapwalolo. 37 Ye tapwalolo gehe kabo se haitalagadoi yo se sumtai na se dou. 38 Saha ye henuwayababa kaliliyeidi meta Paulo yona hedehedede ye wane, “Taba nige kwa kita uyoigau.” Na kabo maiyanao se laulaugogoi se dobi waga.