8
Mo saua badowa bokisiwa wadane God duwe itui
1 Warere Solomon Israelwa eiau uduudu, uwa daitada ita dan daitada uwaula diamona Iawe God sauawa badowa bokisiwa Dawid bolawa debamawa Saion bedewe awanepue do Ierusalemwa wimpu.
3 Tane Israelwa eiau uduudu wimoieno pirisi saua badowa bokisiwa wadanaposideiena. 4 Pirisi ita Liwai damba apanawa Iawe God sauawa badowa bokisiwa ita ape kakaiwa do nituwa kakaibu awanamone God duwa bedewe odeiena. 5 Warere Solomon ita Israel apanawa uduudu saua badowa bokisiwa danawe enane sipsip ita kau uaraia pulontoie, pue ema mai wisiau rua uarakadinton.
6 Tauma pirisi Iawe God sauawa badowa bokisiwa awanene bola kakaiwaida bedewe God duwe odeiena ita kerubim mabupa atowe teamoiena.
10 Tane pirisi bola kakaiwa ene antono giou debamaia iene Iawe God duwa nopesan.✡Ekisod 40.34,35 11 Ita giou sa pirisi bodamono nolau enatuwaiena ipawa Iawe God sapawa debama du sa nopesan.
Warere Solomon Iawe God auwasade
22 Tane warere Solomon wata danawe enena, sa ipa me Iawe God danawe eneno ita apana uduudu me adiwe eneiena. Solomon witapa uboo wadenposie rauparilen. 23 Me rauparilene wanase,
“O Iawe Israelwa Godiu, mai God da e ruaa uboo wainipona ba tawo emauwo wainipona, dia. E dima sauaitena rua walama uduudu dewasaiana, e walama uduudu apanaa nuawadawadamoiana, apana mida mo nuau uduudu mampe e aiaa eteie ruawantoia.
27 Iawe God tawo ema osowe e wana rua, ba? Uba ema mai debamalepona e wadeepitudepi! Sa baiwa wadapos duwa ne wadana bedewe e mai wana rua, dia. 28 Iawe ne Godna, ne e manawo iedina dima raupari bedewe iririedina ete ita saunea. 29 E du ema umanawa ema epe waana, ‘Ne ebona du ema bedewe winompa.’ Sa baiwa wadapos duwa ema walama uduudu oniena. Ne naina leusapine wadaposi duwa ema mampesapine rauparintepino etanena. 30 Tane no nainimba bola ema itunta ne ita e apanaa Israelwa do rauparimba etona. E uboo wainiana ita rauparimba etone kadimba insadabuamona.
41-42 Tane bola da nambea apanawa mai Israelwa e eboa debama, mukaa ita dewa debamau dewamoana umanawa etapu. Mo mida bolau nowadawo wadapos awa ieia wimopue nambu du ema mampesapue manawo rauparintopu. 43 E bolaa uboo wainiana, mo raupariu etone dima iririwantoia wanamona. Ita tawo osowe wanwanlala atentopue e eboa wadaposisapu, no Israel apanawa dewantitana rua. Mo atentopu du ema ne wadana ipa e wadaposia duwa.”